­გაბალა-დინამო (თბ) 2:0 - მშვიდობით, ევროპავ! [VIDEO+PHOTO]

თბილისიდან გაბალასაკენ გეზი დილის 8 საათზე ავიღეთ. ფეხბურთზე მწერალი სამი ჟურნალისტი ევროპალიგის პირველი საკვალიფიკაციო ეტაპის საპასუხო შეხვედრის გასაშუქებლად თბილისიდან "დინამოს" ადმინისტრაციისა და აკადემიის წარმომადგენლებთან ერთად გავემგზავრეთ.

უნდა ითქვას, რომ რვასაათიანი გზის მიუხედავად, წამითაც არ მოგვიწყენია - მთელი ეს დრო ფეხბურთის პრობლემებზე საუბარს, ძველი ამბების გახსენებასა და მომავლის პერსპექტივაზე საუბარს დავუთმეთ.

საზღვარზე საპასპორტო ფორმალობების მოგვარებამ დაახლოებით საათს გასტანა. ჩვენ წინ გადაიშალა აზერბაიჯანი. გავიარეთ შამქორი - ქართველთა ისტორიული ძლევამოსილების უტყვი მოწმე და მივადექით განჯას, სადაც სასადილოსთან გავჩერდით.

განჯის შესანიშნავი რესტორნის მიმტანებმა "დინამოს" წარმატება უსურვეს - თქვენი გამარჯვება გაგვახარებს, რაკი ჩვენ "ქიაფაზის" ფანები ვართ და "გაბალა" ჩვენთვის ისტორიული მოწინააღმდეგეაო...

გაბალამდე ერთი საათი გვაკლდა. ამ დროს ქალაქ ევლახს გავცდით. იქვე პოლიციის ესკორტი დაგვხვდა და სტადიონამდე მიგვაცილა.

შევედით თუ არა გაბალაში, ადგილობრივ ქომაგთა განწყობა ეგრევე ვიგრძენით - ხელს გვიქნევდნენ, თითქოს გვაგრძნობინებდნენ, ამ თამაშში კარგი არაფერი გელითო...

სტადიონს რომ მივუახლოვდით, სასიამოვნოდ გავვოცდით - ხუთვარსკვლავიანი, დიდებული სასტუმრო დაგვხვდა, სადაც გუნდი ცხოვრობს. ვნახეთ უმაღლესი ხარისხის სამი სავარჯიშო მინდორი, ასევე, სტადიონი - რვაათასიანი კოხტა ნაგებობა, რომელიც ავ თვალს არ ენახვება...

თამაშს საპატიო სტუმართა ლოჟიდან უცქერდნენ "დინამოს" პრეზიდენტი რომან ფიფია და "ზესტაფონის" მფლობელი ილია კოკაია.

თავიდანვე გამოჩნდა, რომ "დინამო" შეტევაზე აკეთებდა აქცენტს. ყოველ შემთხვევაში, გია გეგუჩაძემ მეტოქის კარზე ერთბაშად ორი შემტევი მიუშვა - გიორგი ქვილითაია და თბილისური მატჩის ერთ-ერთი გმირი - ალექსანდრე იაშვილი.

"დინამოს" ვერ დაეხმარნენ დისკვალიფიცირებული გიორგი გველესიანი და ტრავმირებული ოთარ კაკაბაძე. მასპინძელთა შემადგენლობა კი ოპტიმალური იყო. ეგაა, რომან გრიგორჩუკმა პირველი შეხვედრის შემდეგ სასტარტო თერთმეტეულში კორექტივები შეიტანა...

პირველი მომენტისმაგვარი "გაბალას" ჰქონდა. ჰუსეინოვის ჯარიმის შემდეგ ზენიოვმა კუთხე დროულად ვერ ჩაკეტა.

მასპინძლებმა სწრაფ გოლზე გააკეთეს აქცენტი და თავიდანვე მძლავრად შემოგვიტიეს. სადიგოვის დარტყმა კარს სცდება...

"დინამომ" კარში პირველად მე-8 წუთზე დაარტყა - გიორგი პაპუნაშვილს "გაბალას" უკრაინელმა მეკარე დმიტრო ბეზოტოსნიმ იოლად აუღო.

"გაბალას" სასტარტო შეტევების შემდეგ თამაში თანდათან დაწყნარდა და პოზიციურ ორთაბრძოლაში გადავიდა. მასპინძელთაგან განსაკუთრებით ჰუსეინოვი გამოირჩეოდა, რომელმაც, ჯერ კიდევ თამაში საწყის 20 წუთში, მარცხენა ფლანგზე უამრავი თავსატეხი გაუჩინა "დინამოს".

21-ე წუთზე ანტონოვმა ერთი მცველი მოატყუა, მეორეს თავზე გადაუგდო ბურთი და იგივე დაუპირა ლიბორ ჰრდლიჩკასაც, მაგრამ იმ ეპიზოდში უკრაინელს კოვზი ნაცარში ჩაუვარდა. ბურთი ზემოდან გადასცდა კარს.

24-ე წუთზე აზერბაიჯანელმა ქომაგებმა გაშალეს რუკა, რომელზეც საქართველოს ტერიტორიები აზერბაიჯანის კუთვნილებად იყო გამოცხადებული. ჩვენგან ეს შორს მოხდა. ამ შემთხვევაში ვეყრდნობით თვითმხილველთა ინფორმაციას.

32-ე წუთზე რიკარდინიომ მარცხენა ფლანგიდან ჩაჰკიდა ბურთი საჯარიმოში. ჰრდლიჩკამ გამოსვლაზე კარგად ითამაშა. იქვე ფლორესკუმ გაუშვა დაბალი ბურთი - საკმაოდ არაზუსტად.

როგორღაც გადავაგორეთ პირველი ტაიმი. მეორე ტაიმში "გაბალამ" უფრო შემოგვიტია. "დინამო" ძალიან ღრმად იხევდა უკან და კონტრშეტევაში ელოდა შანსს. ჰრდლიჩკა მეორე ტაიმშიც საქმეში იყო და ერთ ეპიზოდში სასწაულით მოიგერია ახლო მანძილიდან დარტყმული (თუმცა გამოსვლებისას ყოველთვის ვერ იყო დამაჯერებელი).

...ამასობაში "დინამომ" გაიტანა. მეკარის მიერ მოგერიებული ბურთი ქვილითაიას მოხვდა და კარში შეგორდა, მაგრამ... მსაჯმა გოლი არ ჩათვალა - "დინამოს" ფორვარდს ბურთი ხელზე მოხვდა. სამართლიანობა მოითხოვს, ვთქვათ - მსაჯი მართალი იყო...

რაც დრო გადიოდა, "გაბალა" სულ უფრო აძლიერებდა დაწოლას. ვერ ვიტყვით, რომ ეს კარგად გააზრებული სვლები იყო, მასპინძელთა შეტევებში ქაოსი სჭარბობდა, მაგრამ დინამოელთა შეცდომები გრიგორჩუკის შეგირდებს საგოლე მომენტების შექმნის საშუალებას აძლევდა...

71-ე წუთზე, ისევე, როგორც თბილისურ მატჩში, "დინამო" 10 კაცით დარჩა. ლაშა თოთაძე გაშლილი ფეხით წავიდა მეტოქეზე და ფრანგმა რეფერიმ უმალ "წითელი" აუნთო. ძნელია ამ ეპიზოდზე კამათი. არბიტრს შეეძლო, არ გაეძევებინა თოთაძე და ყვითელ ბარათს დასჯერებოდა, მაგრამ მთლად ვერც იმაში გავამტყუნებთ, რა გადაწყვეტილებაც მიიღო.

ისე, თოთაძე გუშინ ნამდვილად არ ჰგავდა საკუთარ თავს. პირველ ტაიმში, ორწუთიანი ინტერვალით, ორჯერ ჩააბარა ბურთი მეტოქეს საკუთარი კარის სიახლოვეს... შეიძლება, ლოგიკურიც იყო, რაც 71-ე წუთზე მოხდა...

ამის მიუხედავად, "დინამოც" არ მჯდარა ყრუ დაცვაში, როგორც კი შანსი ეძლეოდათ, გეგუჩაძის ბიჭები კონტრშეტევებს არ იზარებდნენ, თუმცა ბურთს ძალიან მალე კარგავდნენ. მაგრამ იყო ეპიზოდი, როცა გიორგი პაპუნაშვილის დარტყმული გაჭირვებით მოიგერია ბეზოტოსნიმ.

იგივე პაპუნაშვილს ფლანგური გარღვევის შემდეგაც შეეძლო გატანა, მაგრამ მახვილი კუთხიდან მარჯვენათი დასცხო და ააცილა...

ბოლო წუთების კოშმარმა შარშანდელი "აქტობე"-"დინამო" გაგვახსენა. 88-ე წუთზე გავიდა გოლი, რომელმაც "გაბალას" ფრთები შეასხა.

"დინამოს" მაინც რჩებოდა შანსი, წინაც წავიდა, მაგრამ საპასუხო კონტრშეტევისას ოთხი აზერბაიჯანელის წინააღმდეგ ორი დინამოელი დარჩა და მეორედაც შეირხა ჰრდლიჩკას კარის ბადე. ეს იყო საბოლოო წერტილი - 2:0.

ქართული ფეხბურთის ფლაგმანი ევროპის მიღმა დარჩა.

გაბალადან ესკორტის თანხლებით გამოვაღწიეთ. იყო ქართული დროშების დაწვა და ფიზიკური დაპირისპირების მცდელობა. ამაზე უფრო ვრცლად შთაბეჭდილებებში დავწერ. მანამდე კი ორიოდ სიტყვით პრესკონფერენციაზე:

გია გეგუჩაძე: "მსაჯების შეცდომებზე არ ვლაპარაკობ ხოლმე. სამწუხაროა, რომ დავმარცხდით, მაგრამ ბიჭებს ვერ დავუკარგავ მონდომებას".

რომან გრიგორჩუკი: "მსაჯების შემფასებელი ვერ ვიქნები. ეს არ იყო მთავარი ამ მატჩში. საბედნიეროდ, გავიმარჯვეთ, მაგრამ არ შეიძლება, არ ვთქვა - ჩემი პატივისცემა "დინამოს" ახალგაზრდულ გუნდს".

­ევროპალიგა. I საკვალიფიკაციო ეტაპი. საპასუხო მატჩი
09.07. გაბალა. 5 000 მაყურებელი
გაბალა-დინამო თბ 2:0
პირველი მატჩი 1:2
გოლები: 1:0 ზენიოვი (88), 2:0 ანტონოვი (90)
გაბალა: (4-4-2): ბეზოტოსნი - რიკარდინიო, ვერნიდუბი, რაფაელი, აბასოვი (86. დაშდამიროვი) - ჰუსეინოვი, ფლორესკუ (77. დოდო), გაი, სადიგოვი (82. მამადოვი) - ზენიოვი, ანტონოვი.
სათადარიგოები: პოპოვიჩი, სტანკოვიჩი, მირზაბეკოვი, ზარგაროვი.
მწვრთნელი: რომან გრიგორჩუკი
დინამო (4-4-2): ჰრდლიჩკა - ტვილდიანი (84. ჯანელიძე), ჭელიძე, რენე ფერეირა, თოთაძე - პაპუნაშვილი, ჯიღაური, ცინცაძე, ჭანტურიშვილი - იაშვილი (61. კიტეიშვილი), ქვილითაია (74. გურული).
სათადარიგოები: ბეგაშვილი, არაბული, პარუნაშვილი, ლობჟანიძე.
მწვრთნელი: გია გეგუჩაძე
გაფრთხილება: ვერნიდუბი (37), ფლორესკუ (49), ჰუსეინოვი (54)
გაძევება: თოთაძე (71)
არბიტრი: ამორი დელერუ (საფრანგეთი)

(იბეჭდება მცირე ცვლილებით)
ყოველდღიური სპორტული გაზეთი "ლელო"