ლევან კობიაშვილმა საარჩევნო კამპანია დაიწყო. ის თავის კანდიდატურას დღეს, 1-ელ სექტემბერს დაარეგისტრირებს. ეროვნული ნაკრების ყოფილმა კაპიტანმა კვირის ბოლომდე სამუშაო შეხვედრები დაგეგმა რეგიონულ ფედერაციებთან, ასოციაციებთან და ყველა თაობის ვეტერან ფეხბურთელებთან. 31 აგვისტოს კი სასტუმრო "ჰოლიდეი ინში" საქართველოს ჩემპიონატის უმაღლესი და პირველი ლიგის კლუბების წარმომადგენლებს არაფორმალურად შეხვდა და საარჩევნო პროგრამა გააცნო. შეხვედრის შემდეგ კობიაშვილმა პრესასთან ილაპარაკა:
- საუბარი შეეხო საფეხბურთო მართვის სისტემის გაუმჯობესებას, მისი ფინანსური მდგრადობის უზრუნველყოფასა და ქართული ფეხბურთის შესაძლებლობების განვითარებას. მინდა აღვნიშნო, რომ ეს პირველი ღონისძიებაა, რომელზეც უმაღლესი და პირველი
ჩემთვის მნიშვნელოვანია საარჩევნო კამპანიის ამ შეხვედრით დაწყება. კლუბებს გავაცანი ჩემი ხედვა და სამოქმედო სტრატეგია, თუ როგორ ვგეგმავ ქართული ფეხბურთის განვითარებას. ჩემთვის ერთ-ერთი პრიორიტეტი ეროვნული ჩემპიონატი და მისი პროგრესის ხელშეწყობაა. ამიტომ თითოეული კლუბის მოსაზრება ღირებული და გასათვალისწინებელია.
მიმაჩნია, რომ ძალიან პროდუქტიული შეხვედრა იყო. ჩვენ ვიმუშავებთ გუნდურობის პრინციპით, რადგან ასე ვიზრდებოდი, ასე ვცხოვრობდი და ესაა ჩემი ცხოვრებისეული ხედვა. ერთიანობით ქართული ფეხბურთის წინსვლას მოვახერხებთ.
- თქვენთვის თუ არის ცნობილი, რომ ადგილობრივ ხელისუფლებაში დაიბარეს გურიის რეგიონული ფედერაციის ხელმძღვანელი, რომელიც მხარს რევაზ არველაძეს უჭერს? ხომ არ ფიქრობთ, რომ ეს ზეწოლაა?
- ამ ფაქტზე არაფერი ვიცი და როცა დავაზუსტებ, კომენტარსაც მერე გავაკეთებ. საერთოდ, ჩარევების წინააღმდეგი ვარ. ბოლო დროს ბევრი რამ გახდა მიუღებელი. უპირველესად, ეს ფეხბურთის ფედერაციის ქმედებებს ეხება. მან აბსოლუტურად ყველა კანდიდატს უნდა მისცეს საშუალება, რომ საარჩევნო კამპანია თანაბარ პირობებში წარმართოს. ყველა სუბიექტი უნდა შეხვდეს კანდიდატებს და არჩევანი მხოლოდ ამის შემდეგ გააკეთოს.
- ამას ფეხბურთის ფედერაცია უშლის ხელს?
- იმ ქმედებებით, რასაც ბოლო დროს ფედერაცია სჩადის, რასაკვირველია, საარჩევნო პროცესს აფერხებს და კანდიდატებს თანაბარ პირობებში არ აყენებს.
* * *
ამის შემდეგ ლევან კობიაშვილმა "ლელოს" კითხვებს უპასუხა:- ქართული ფეხბურთის ლეგენდა მურთაზ ხურცილავა გულდაწყვეტილი იყო, რევაზ არველაძეს მხარს იმიტომ ვუჭერთ, რომ სხვა კანდიდატებმა ვეტერანებთან შეხვედრა არც ისურვესო...
- ვეტერანთა კავშირის წევრები რევაზ არველაძეს 20 აგვისტოს შეხვდნენ. დარეგისტრირების ბოლო ვადა კი 7 სექტემბერია და ყველა სუბიექტს შევხვდები, ცხადია - ვეტერანთა კავშირის წევრებსაც. ლოგიკური იქნება, რომ საბოლოო გადაწყვეტილება ყველა სუბიექტმა კანდიდატებთან შეხვედრისა და მათი პროგრამის გაცნობის შემდეგ მიიღოს.
მაგრამ არჩევნების თარიღი რომ 14 აგვისტოს ცხადდება, 17-ში კი კანდიდატს წარადგენენ, ეს ძალიან არასწორი დამოკიდებულებაა და სხვა კანდიდატებს პროგრამის გაცნობის საშუალებას არ აძლევს. ამიტომაც ვამბობ, ფეხბურთის ფედერაციის მიერ შემოთავაზებული თამაშის წესები არც ქართულ ფეხბურთს წაადგება და საარჩევნო პროცესსაც დააზიანებს. მე გამჭვირვალედ, წესების დაცვით ვიმოქმედებ და სამართლიანობის პრინციპს არ გადავუხვევ.
- სუბიექტების გაზრდასთან დაკავშირებით რას ფიქრობთ?
- წარმოუდგენელია, რომ კლუბები სფფ-ის ეგიდით გამართულ ტურნირებში თამაშობენ, მერე მას ევროტურნირებზე წარადგენენ, უეფასა და ფედერაციისგან თანხებს იღებენ და ამ ორგანიზაციის წევრები არ არიან. ეს ცალსახად მიუღებელია.
მეორე და მნიშვნელოვანი საკითხი - ფეხბურთის ფედერაციის წესდებაში გარკვევით წერია, რომ ყრილობა ოთხი წლით ირჩევს ახალ პრეზიდენტსა და აღმასკომის ახალ წევრებს, ანუ ასე უნდა მოხდეს 3 ოქტომბერს. მაგრამ სფფ-ის აღმასკომის დადგენილება რომ მოგვაწოდეს, იქ წერია, ყრილობის დღის წესრიგში ამ ორიდან მხოლოდ პრეზიდენტის არჩევნებია შეტანილი.
ეს ფედერაციის წესდების უხეში დარღვევაა. ამით პირდაპირ დასტურდება, რომ ამ სისტემას ვინც მართავს, სამართლიანი არჩევნებისთვის მზად არ არის და ეს არც უნდა. რასაკვირველია, ჩვენ ამას უეფას ვაცნობებთ.
- თქვენი აზრით, ქართული ფეხბურთის უბედურება რისი შედეგია? უფულობის, არაორგანიზებულობის თუ არსებული სისტემის?
- ყველაფრის ერთად! ვითარება მარტო ფულით ვერ გამოსწორდება. საჭიროა წესდების შეცვლა და მისი ევროპულ სტანდარტებთან მისადაგება. ამას გარდა, პრობლემაა სისტემა, დაფინანსება, ბავშვთა ფეხბურთი, ინფრასტრუქტურა, განათლება - ყველაფერზე დიდი შრომა დაგვჭირდება.
ეს ყველაფერი ჩემს საარჩევნო პროგრამაში გავითვალისწინე, რათა კონკურენტუნარიანები გავხდეთ. სხვაგვარად, ამ მდგომარეობას თავს ვერ დავაღწევთ.
(იბეჭდება მცირე ცვლილებით)
ყოველდღიური სპორტული გაზეთი "ლელო"
