ფეხბურთის ფედერაციის პრეზიდენტობის კანდიდატმა მამუკა კვარაცხელიამ "დინამო არენაზე" პრესკონფერენცია გამართა და ბევრ მნიშვნელოვან თემაზე ილაპარაკა.ასე ხომ არ შეიძლება?!.
- საარჩევნო პროცესში კიდევ ბევრი დარღვევა აღმოვაჩინე. მაგალითად, გურიის რეგიონული ფედერაციის პრეზიდენტ კახა ებრალიძეს არ ჰქონდა უფლება, ერთპიროვნულად დაესახელებინა დელეგატი. გურიის ფედერაციის წესდების მე-5 მუხლის მე-16 პუნქტში წერია, რომ პრეზიდენტი ასრულებს გამგეობის და საერთო კრების მიერ მიღებულ გადაწყვეტილებებს. ასე რომ, გურიის ფედერაციის გამგეობას თამამად შეუძლია მოიწვიოს საერთო კრება და შეცვალოს პრეზიდენტის უკანონოდ მიღებული გადაწყვეტილება!..
...სფფ გამოვააშკარავე საკუთარი წესდების წამდაუწუმ და უკანონო ცვლაში.
...ინტერესთა კონფლიქტზე მე-5 მუხლში წერია: "დანიშვნამდე, ნებისმიერ თანამდებობაზე კანდიდატმა უნდა ამოწუროს ნებისმიერი პირადი ინტერესი, რომელიც შესაძლოა უკავშირდებოდეს მის მომავალ საქმიანობას".
...ასე რომ, არავითარი უფლება არ აქვთ, დელეგატად დანიშნონ ადამიანი, ვინც ფედერაციაში ხელფასს იღებს! ფედერაციამ კი ასეთი პრეცედენტები რეგიონებში დაუშვა, სადაც დელეგატებად საკუთარი თანამშრომლები შეარჩია.
მიბაძეთ იმერეთის გუბერნატორს!
- ძალიან კარგია, რომ ჩემი გამოსვლების შემდეგ კლუბები ხმის უფლებას ითხოვენ. ამიტომ მივესალმები იმერეთის გუბერნატორის, გოგი ჭიჭინაძის ინიციატივას, რომ გაეგზავნოს ყველა კლუბს მიმართვა ფედერაციაში სასწრაფოდ გაწევრიანების თაობაზე. ...მომავალში, სახელმწიფო კლუბებს ფულს თუ გამოუყოფს, ადმინისტრაციული ერთეულის, გუბერნიების მეშვეობით უნდა გადაურიცხოს და ამიტომ ყველა გუბერნატორს მივმართავ - მიბაძეთ გოგი ჭიჭინაძეს და სხვა კლუბებსაც იგივე მოუწოდეთ. ოღონდაც, სწორად შეადგინეთ ფედერაციის სახელზე გაგზავნილი მიმართვა. ჯერ უნდა მიმართოთ სფფ-ს წევრობაზე და არა ხმის უფლებაზე, რადგან წევრობა ამას ავტომატურად გულისხმობს!
მზად ვარ, ყველა კლუბს დავუწერო განცხადება, თუ იურიდიულ მხარეში ვერ ერკვევიან.
სად ხართ, სპონსორებო?!
- ფედერაციის პრეზიდენტი რომ გავხდები, პირობას გაძლევთ, ამ ორგანიზაციას მინიმუმ 10 სპონსორი ეყოლება და სახელმწიფოსთან ერთად ვიმუშავებთ, ფეხბურთს ბიზნესად გადავაქცევთ! სხვაგვარად, საქართველოში ფეხბურთს მომავალი არ ექნება. ...განა ნორმალურია, რომ "პირველი არხი", რომელიც ჩვენი ფულით საზრდოობს, ლამისაა აქეთ გვთხოვს ფულს მატჩების ჩვენებაში?! მერამდენე პრესკონფერენციას ვატარებ და ყველა ტელევიზია მოდის, "პირველი არხის" გარდა! რაში იღებენ ჩვენი და ჩვენი შვილების ფულს ხელფასად?! ნუთუ, ქართული ფეხბურთი ფეხებზე ჰკიდიათ?!
გამოუყენებელი მილიონები
- როგორც უმაღლესი პირების გამოსვლებიდან ვიცი, სახელმწიფო აპირებს 5-წლიანი პროგრამის გატარებას, რომლის მიხედვით, ყოველ წელს ფეხბურთისთვის 50 მილიონი ლარი გამოიყოფა. განცხადებაც დავუწერე, მაგრამ დიდი თხოვნის მიუხედავად, არ შემიყვანეს სახელმწიფო კომისიაში, სადაც ორი წლის განმავლობაში, ლაპარაკის გარდა, არაფერი გაკეთებულა! ...აგერ, ბატონო, 15 წუთის საქმეა. ჩემი ხედვით, ფეხბურთის განვითარებისთვის თქვენ მიერ დასახელებული 44 მილიონიც საკმარისია, 50 მილიონით კი პროგრამა უფრო შედეგიანი იქნება.
...სახელმწიფო პროგრამის მიხედვით, ამ 44 მილიონიდან უმაღლეს ლიგაში 11,64 მილიონი ლარი დაიხარჯება. სეზონამდე ყველა გუნდი 500 ათას ლარს მიიღებს. 8 მილიონი პრიზიორებისაა: ჩემპიონისთვის - მილიონი, მეორეადგილოსნისთვის - 500 ათასი, ხოლო ბრინჯაოსმედალოსნისთვის - 300 ათასი. დანარჩენი 3 მილიონიც ადგილების მიხედვით ნაწილდება.
თასის მფლობელი 250 ათასს მიიღებს, ფინალისტი - 100 ათასს, ნახევარფინალისტები - 25 ათასს, მეოთხედფინალისტები - 10 ათასს. ანუ ამ გათამაშებაში სულ 490 ათასი იხარჯება. გარდა ამისა, სუპერთასზე 150 ათასია გათვალისწინებული, მისი მფლობელი 100 ათასს მიიღებს, ფინალისტი - 50 ათასს.
...პირველი ლიგის 20 გუნდზე კი 6,8 მილიონს გასცემენ: სეზონამდე თითოეულს 250 ათასი დაერიცხება, გამარჯვებულებს - 150 ათასი, მეორეადგილოსნებს - 120 ათასი.
უფასო ბავშვთა ფეხბურთი
- დანიაში ჩემს მეგობარს, ცნობილ ფეხბურთელ პერ ფრიმანს ბავშვების წვრთნაში ვეხმარებოდი. 6-დან 13 წლამდე ასაკის ბავშვებს, მთავარია, ფეხბურთი შევაყვაროთ, შემდეგ თავად გადაწყვეტენ, რა გზას დაადგნენ. ასეთი მიდგომა ფეხბურთს უფრო მასობრივს გახდის. დანიაში მარტო 80 ათასი ქალი ფეხბურთელია, 300 ათასი კი - კაცი. ...ჩვენს 150 სკოლაში კი 6-18-წლამდელი სულ 12 ათასი ბავშვია. მასობრიობის გარეშე ამხელა ჩამორჩენის აღმოფხვრა როგორ გვინდა? მაგრამ პირობას გაძლევთ, ამ რიცხვს გავაორმაგებ. ამ მიმართულებით 4 მილიონია გათვალისწინებული. ჩემი ხედვა ემსახურება იმას, რომ ყველა ბავშვის ოცნება ასრულდეს და ამ თანხით 6-დან 13 წლამდე ასაკის ყველა ბავშვი გადასახადისგან გათავისუფლდეს!
ფეხბურთის მასობრიობისთვის საჭიროა მეტი განათლებული, ლიცენზირებული მწვრთნელი. C და B კატეგორიის ასაღებად, შესაბამისად, 400 და 800 ლარია საჭირო და ბევრ დამწყებ მწვრთნელს ამის საშუალება არ აქვს. ამ მიმართულებით წელიწადში 88 ათასის გაღება საკმარისი იქნება.
მასობრიობისთვის აუცილებელია რეგიონული ფედერაციების გაძლიერება და მათი დაფინანსების 50 ათასამდე გაზრდა. 13 რეგიონია და წელიწადში სულ 650 ათასი ლარი დაგვჭირდება.
მსაჯობაზე გათვალისწინებული 500 ათასიდან 100 ათასი სეზონისწინა შეკრებას მოხმარდება, 400 ათასი - სეზონის ბოლოს მსაჯების პრემირებას. აქედან 100-100 ათასი თანაბრად დაიხარჯება უმაღლეს, პირველ, მეორე ლიგებსა და ბავშვთა ჩემპიონატებში.
სტადიონები, ანუ გახსოვდეს აფხაზეთი!
- სამწუხაროდ, ბევრ ქალაქში ფეხბურთი აღარ არის. თუ სახელმწიფო ჩემს ხედვას გაითვალისწინებს, ყველა ქალაქში აღდგება გუნდი, მათ შორის, ოკუპირებული ტერიტორიების - სოხუმის "ცხუმიც", ოჩამჩირის "ამირანიც" და გალის "მზიურიც"! ...რომ არა ბესო ჩიხრაძე, აფხაზური ფეხბურთი არავის ემახსოვრებოდა. ჩემეული ხედვით, "გაგრა" იმსახურებს სტადიონს და თუ პრეზიდენტი გავხდი, ზუსტად წელიწადში ავუშენებ კიდეც თბილისში ანდაც მუხრანში, სადაც "გაგრას" ბაზა აქვს!
...არსებული პროგრამით, ინფრასტრუქტურაზე 12 მილიონი გამოიყოფა, დაპირების შემთხვევაში კი - 6 მილიონი დაემატება.
ბოლო წლებში ბევრს ლაპარაკობენ ბათუმის სტადიონის აშენებაზე, მაგრამ ტენდერი მერამდენედ ჩაიშალა? ჩემი პრეზიდენტობის შემთხვევაში, 2016 წლის 3 ოქტომბერს ბათუმში ვახტანგ ქორიძის სახელობის, ხოლო ზუგდიდში ოთარ გაბელიას სახელობის ახალი სტადიონი გაიხსნება.
...აუცილებელია სტადიონების აშენება ტყიბულში, მაუდისა და ფეიქრის არენების რეკონსტრუქცია, უმაღლესი ლიგის ყველა სტადიონზე განათების სისტემის მოწყობა და ბაზების მშენებლობა...
ცხადია, ფული უნდა გადანაწილდეს ფუტსალზე, ქალთა, უნარშეზღუდულთა, ქვიშისა და ეზოს ფეხბურთის ასოციაციებზე, ვეტერანებზე... ფეხბურთის ფედერაციამ კი სახელმწიფოსგან 4 მილიონი უნდა მოიკლოს, რადგან ფიფასა და უეფასგან ფულს საკმაოდ იღებს.
(იბეჭდება მცირე ცვლილებით)
ყოველდღიური სპორტული გაზეთი "ლელო"
