გუშინ, 4 ივლისს, საფეხბურთო სამყაროს კიდევ ერთი ნაღმი აუფეთქეს - სამშენებლო ტექნიკით შეიარაღებული ჯგუფი დილით საქართველოს ტექნიკური უნივერსიტეტის ტერიტორიაზე მდებარე სტადიონზე შევიდა და ხელოვნური საფარის აღება დაიწყო...- "სისხლი დაიღვრება!" - სააკაშვილის დედის უნივერსიტეტში სტადიონს ანგრევენ [VIDEO]
მომხდარით აღშფოთება ვერ დამალა სფფ-ის სტადიონების განყოფილების უფროსმა, უეფას მედიაოფიცერმა მამუკა კვარაცხელიამ, რომელიც წლებია საფეხბურთო არენების გასხვისებას ეწინააღმდეგება. მისი თქმით, მოედნის ადგილზე კორპუსის აშენება იგეგმება.
"წინასწარ მქონდა ინფორმაცია, რომ სტადიონის დანგრევას ორშაბათს დაიწყებდნენ. ასეც მოხდა და კიდევ ერთი სტადიონი ნადგურდება! ხალიჩა ააგლიჯეს და
სტადიონის გარეშე დარჩა კიდევ ერთი საფეხბურთო სკოლა და 200-მდე ბავშვი. ასეთ დღეში ვართ 21-ე საუკუნეში! და ეს მაშინ, როცა საბურთალოს მოსახლეობის ოდენა პატარა ისლანდიამ სასწაული მოახდინა და ევროპის 8 საუკეთესო გუნდში მოხვდა, ეს კი იმიტომ, რომ იქ სტადიონებს არ ანგრევენ. ასეთი ტემპით, საქართველოში მალე სტადიონი აღარ დაგვრჩება", - ამბობს კვარაცხელია.
მომხდარით არამხოლოდ საფეხბურთო სამყარო აღშფოთდა: სამთო-გეოლოგიური ფაკულტეტის პროფესორის, ანზორ აბშილავას ცნობით, მოედნის ქვეშ საქართველოს ტექნიკური უნივერსიტეტის უნიკალური სასწავლო ლაბორატორიაა განთავსებული და ცხადია, მშენებლობა მასაც დიდ ზიანს მიაყენებს.
კვარაცხელიას თქმით კი, მომხდარის მიზეზი ტექნიკური უნივერსიტეტის კუთვნილი ტერიტორიისა და კორპუსის უკანონო პრივატიზაციაა:
"2008 წელს, მაშინდელმა პრეზიდენტმა სააკაშვილმა ეს ყველაფერი საკუთარ დედას, გიული ალასანიას აჩუქა, მან კი ახლა სტადიონის დანგრევა გადაწყვიტა. ჩემი ინფორმაციით, აქ შვიდსართულიანი სასწავლო კორპუსის აშენებას აპირებენ. ეს ყველაფერი კი იმიტომ კეთდება, რომ საქართველოს უნივერსიტეტს ამ სტადიონზე მშენებლობის უფლება არა აქვს.
სინჯების შემდეგ უნდა გადაწყდეს, შესაძლებელია თუ არა აქ მშენებლობა, რის შემდეგაც მშენებლობის უფლება მერიამ უნდა გასცეს. რაც მთავარია, საფრთხის წინაშე დგება უნიკალური შახტა, რომელიც სწორედ სტადიონის ქვეშაა და რომლის შეტანა თავის სიაში სურდა იუნესკოს".
საქართველოს უნივერსიტეტის კანცლერი კოკა თოფურია ამტკიცებს, რომ ეს ყველაფერი სპორტული ინფრასტრუქტურის გასაუმჯობესებლად კეთდება, რომ აშენდება საცურაო აუზი, კორტები, საფეხბურთო მოედნები, ფიტნესდარბაზი...
...ეს ცუდიაო? - იქვე იკითხა თოფურიამ, მაგრამ სტანდარტული მოედანი რომ იკარგება, ეს კი ნამდვილად ცუდია და თემის ბანზე აგდებით პრობლემა არ მოგვარდება - სტანდარტულ სტადიონს მინი-ფეხბურთის არენა ვერ შეცვლის.
* * *
ანალოგიური სატკივარი აქვთ წყნეთელებსაც. ორი კვირის წინ იქ ერთადერთი სტანდარტული მოედნის აღება მოინდომეს, მაგრამ ხალხმა კარვები გაშალა და მშენებლობას შეეწინააღმდეგა. წყნეთის მცხოვრები რევაზ ხეჩუაშვილი გვიყვება:"1985 წელს რამდენიმე წყნეთელი ჯუმბერ პატიაშვილთან შევედით, რომელიც მაშინ რესპუბლიკის ხელმძღვანელი იყო და სტადიონის გაკეთება ვთხოვეთ. ის კაცი ფეხბურთის მოყვარული იყო, ჩვენ კი სტადიონი საკუთარი ხელებით ავაშენეთ.
2002 წლამდე გუნდიც არსებობდა, რომელსაც წყნეთის სამკერვალო ფაბრიკა პატრონობდა და სტადიონიც მის ბალანსზე იყო, მაგრამ ფაბრიკა გაუქმდა და ტერიტორია გაასხვისეს. მაშინ გამომძიებელმა სოსო ჯუღელმა აღმოაჩინა, რომ პრივატიზაცია უკანონოდ ჩატარდა: სტადიონი დაბას ეკუთვნოდა და გამგებლებს რატომ უნდა გაესხვისებინათ? 3 თვის წინ კი ტერიტორია სხვებს მიჰყიდეს.
პირადად თბილისის მერს, დავით ნარმანიას შევხვდი და მითხრა, რომ მშენებლობის უფლებას არ გასცემდა, სანამ ამას ხალხი არ დათანხმდება. ახლა კახა კალაძის სახელზე გავამზადე წერილი, რომ ეს უკანონობა შეაჩეროს.
წყნეთში გუნდი აღარ დარჩა, ფეხბურთი ჩამკვდარია და კიდევ სტადიონს გვართმევენ?! ვერ გავიგე, ეს რა ქვეყანაა?!
არადა, ჩვენს დაბაში მოსამზადებლად იდეალური კლიმატია და სტადიონი სტადიონზე უნდა შენდებოდეს, რადგან ამით დაბის და ქვეყნის შემოსავალიც გაიზრდება და ფეხბურთით დაინტერესებაც".
ამ ვითარებას სტალინის ცინიკური სიტყვების პერიფრაზა შეესაბამება: ერთი სტადიონის განადგურება ტრაგედიაა, მილიონის კი - სტატისტიკა. სადავო აღარ არის, რომ პრივატიზაციის კანონი, რომელიც სტადიონების გასხვისებას უშვებს, სანაგვეზეა გადასაგდები. ასე გაგრძელება აღარ შეიძლება!
(იბეჭდება მცირე ცვლილებით)
ყოველდღიური სპორტული გაზეთი "ლელო"
