24.11. ქუთაისი. ცენტრალური, 5000 მაყურებელიტორპედო ზესტაფონი 1:1
1:0 გამეზარდაშვილი (34. ბოლქვაძის პასით), 1:1 დვალი (84)
ტორპედოზესტაფონი
4-5-14-4-2
მიგინეიშვილი მამალაძე
დ.ფოფხაძე ალადაშვილი
ს.თოდუა ონიანი
გამეზარდაშვილი საჯაია
გურული ღონღაძე
დოლიძე აფციაური
გ.დათუნაიშვილი ბაბუნაშვილი
დიღმელაშვილი ძარია
თარხნიშვილი გრიგალაშვილი
დ.ბოლქვაძე დვალი
გოცირიძე გელაშვილი
მწვრთნელი: მწვრთნელი:
გ.გეგუჩაძე გ.ჭიაბრიშვილი
ტორპედო
65. ბოლქვაძე-იოსელიანი
81. გოცირიძე-საბანაძე
85. დოლიძე-კუხიანიძე
სათადარიგოები: ქვილითაია, ფარულავა, ჯანელიძე, მეგრელაძე
ზესტაფონი
66. ალადაშვილი-ელიავა
74.ბაბუნაშვილი-გორგიაშვილი
84.გრიგალაშვილი-ჭანკოტაძე
სათადარიგოები: მეშველიანი, სარდალიშვილი, ფიფია, ლომია
გაფრთხილება: ონიანი (33), ძარია (54), ალადაშვილი (58), ბოლქვაძე (64)
არბიტრი: მ.ბეუქლიშვილი
ჩემპიონატშიც და თასზეც იმერული დერბი მუდამ გამორჩეულ ინტერესს იწვევს და გამონაკლისი, ცხადია, არც ეს შეხვედრა ყოფილა.
წინა სეზონში "ზესტაფონისა" და "ტორპედოს" თასის ნახევარფინალურ შეხვედრას დიდი ვნებათაღელვა მოჰყვა, წლეულს კი ეს გუნდები ჩემპიონატში ორჯერ შეხვდნენ ერთმანეთს და დაძაბული თამაშების მიუხედევად, გულშემატკივრებს შორის ინციდენტი აღარ მომხდარა. გუშინდელმა მატჩმაც უექსცესოდ ჩაიარა.
შეხვედრამ, რომელიც მეოთხედფინალურ მატჩებში აშკარად გამორჩეული იყო, მოლოდინი სრულიად გაამართლა. გულშემატკივარმა განსაკუთრებით "ტორპედოს" მეკარის, ომარ მიგინეიშვილის შესანიშნავი თამაშით ისიამოვნა, რომელმაც არაერთი რთული ბურთი მოიგერია. იგი 85-ე წუთამდე უმკლავდებოდა სტუმართა შეტევებს, მაგრამ ჯაბა დვალის დარტყმას ვეღარაფერი მოუხერხა და შეხვედრაც ლოგიკური შედეგით დასრულდა. ლოგიკურით იმიტომ, რომ "ზესტაფონი, მთელი მეორე ტაიმი მეტოქის ნახევარზე რომ გაატარა, წაგებას ნამდვილად არ იმსახურებდა.
პირველი ნახევრის დიდი ნაწილი კი თანაბარ ბრძოლაში წარიმართა. ზესტაფონელები უფრო მეტს უტევდნენ, მაგრამ მასპინძლები დაცვაში ყურადღებით თამაშობდნენ და მეტოქეს სწრაფი კონტრშეტევებითაც პასუხობდნენ. პირველი ხიფათიც სტუმრებმა შექმნეს, ძარიამ ხელსაყრელი პოზიციიდან ააცილა. ზესტაფონელები შემდგომაც მწვავედ უტევდნენ და მალე ბაბუნაშვილს ანგარიშის გახსნაც შეეძლო, მაგრამ მცველებმა ხიფათი განმუხტეს. შემდეგ შოთა გრიგალაშვილმა ითამაშა კარგად, გამეზარდაშვილი იოლად მოატყუა და მახვილი კუთხიდან დაარტყა, მაგრამ ქუთათურები მიგინეიშვილმა იხსნა.
მალე გია გეგუჩაძის გუნდიც გააქტიურდა, რიონისპირელებიდან განსაკუთრებით თორნიკე თარხნიშვილი და დავით ბოლქვაძე გამოირჩეოდნენ, თუმცა კარში დარტყმამდე საქმე არ მიდიოდა. ერთ ეპიზოდში თარხნიშვილის წაქცევისთვის ქუთათურები პენალტსაც ითხოვდნენ, მაგრამ ამაოდ. მასპინძლების პირველივე მეტ-ნაკლებად სახიფათო შეტევას გოლი მოჰყვა: ბოლქვაძემ ბურთი მეტოქის საჯარიმოში ჩაჰკიდა, ზესტაფონელ მცველებს გამეზარდაშვილი გამოეპარათ და მანაც უჩვეულო დარტყმით ანგარიშიც გახსნა. გატანილმა გოლმა ქუთაისელები გაააქტიურა და მალე თარხნიშვილს შეეძლო ანგარიშის გაზრდა, მაგრამ ზუსტად ვერ დაარტყა. ტაიმის ბოლოს დასწრებაზე დვალი თამაშობდა კარგად, მაგრამ მიგინეიშვილმა ისევ ივარგა.
შესვენების შემდეგ სტუმრები ერთობ გააქტიურდნენ და საკუთარ საჯარიმოში გამოკეტილ ქუთაისელთა კართან მომენტი მომენტზე იქმნებოდა, მაგრამ გიორგი ჭიაბრიშვილის შეგირდებმა მიგინეიშვილის კარს გასაღები ვერა და ვერ მოარგეს. ჯერ გრიგალაშვილმა და ძარიამ სცადეს გატანა, მაგრამ სიზუსტე დააკლდათ, შემდეგ ქუთაისელთა მეკარემ აფციაურის, დვალისა და საჯაიას სახიფათო დარტყმები მოიგერია, აღარაფერს ვამბობთ ზესტაფონელთა მიერ აცილებულ ბურთებზე. მასპინძელთა მეკარემ მასთან პირისპირ გასულ დვალსაც დაასწო და ერთხელაც იხსნა თანაგუნდელები, შემდეგ აფციაურის ორ ძლიერ დარტყმას დაუხვდა ყოჩაღად.
ფეროელებს მხსნელად ისევ ჯაბა დვალი მოევლინათ, მან მატჩის მიწურულს საჯარიმოში მიიღო ბურთი, მცველებს შორის დატრიალდა და ძლიერი დარტყმით "თვით" მიგინეიშვილსაც არ დაუტოვა შანსი - 1:1. გია გეგუჩაძის შეგირდები მეორე ტაიმში ფეროელთა შეტევების მოგერიებით იყვნენ დაკავებული და მეტოქის კართან ღირებული არაფერი შეუქმნიათ.
ქუთაისში მიღწეული ფრე განმეორებითი მატჩის წინ ზესტაფონელებს უკეთეს მდგომარეობაში აყენებს, მაგრამ იმერული დერბი ბოლო დროს ძნელად საპროგნოზო გახდა, ასე რომ, არანაკლებ საინტერესო ზესტაფონური მატჩი გველის.
ყოველდღიური სპორტული გაზეთი "ლელო"
