თუკი 31 მაისს ლიონელ მესი ჯანლუიჯი ბუფონს გაუტანს, ის ჩემპიონთა ლიგის (ტურნირის რეორგანიზაციის შემდეგ) ისტორიაში პირველი ფეხბურთელი გახდება, რომელსაც სამ ფინალში ექნება გოლი გატანილი. 2009 წელს რომში "ბარსელონამ" 2:0 მოუგო "მანჩესტერ იუნაიტედს" და ესპანელთა მეორე გოლი ლეომ გაიტანა. ორი წლის შემდეგ, "უემბლიზე" იმავე გუნდების შეხვედრაში "ბარსამ" ისევ იმარჯვა, ლეომ ისევ გუნდის მეორე გოლი გაიტანა, თუმცა თამაში 3:1 მორჩა.
ლეო მესიმ ჩემპიონთა ლიგა სამჯერ მოიგო, მაგრამ 2006 წლის ფინალში მას ტრავმის გამო არ უთამაშია. ჩემპიონთა ლიგაზე ორ-ორ ფინალში გაუტანიათ სამუელ ეტო'ოს,
სულ მესიმ პროფესიულ კარიერაში 23 ფინალი ითამაშა და 20 გოლი გაიტანა. ორჯერ მან ჰეთ-თრიკიც კი შეასრულა (ორივეჯერ ესპანეთის სუპერთასზე). აქვე ვიტყვით, რომ "რეალის" ლეგენდა ალფრედო დი სტეფანოს ევროპის ჩემპიონთა თასის 5 ფინალში აქვს გატანილი - სულ შვიდი გოლი. 7 გოლით დი სტეფანო ფინალების რეკორდსმენია ფერენც პუშკაშთან ერთად.
არგენტინელმა სუპერვარსკვლავმა 6 ივნისის ფინალის წინ მცირე ინტერვიუ მისცა უეფას ოფიციალურ საიტს.
ბარსელონაზე
"ძალიან მადლიერი ვარ კლუბის, ყველაფრისთვის, რასაც ფეხბურთში მივაღწიე. კარიერის განმავლობაში "ბარსელონა" ძალიან ბევრჯერ დამეხმარა, გვერდში დამიდგა. ამიტომაც მე ძალიან მიყვარს ეს გუნდი და, რაც შეიძლება, დიდხანს ვაპირებ აქ დარჩენას". წინა ორი ფინალი
"ჩემპიონთა ლიგის ორივე ფინალი ჩემს კარიერაში უმნიშვნელოვანესი მომენტი იყო. ახლაც კი მახსენდება 2011 წლის ფინალი, როცა გოლი გავიტანე და ანგარიში 2:1 გავხადე. ის გოლი გიჟურად ვიზეიმე და ამის მიზეზიც მქონდა. "მანჩესტერთან" მატჩებში ამ ფინალებში ჩემი კარიერის ერთ-ერთი ყველაზე საჭირო გოლები გავიტანე". იუვენტუსზე
"მომდევნო ფინალსაც დიდი ენთუზიაზმით ველი, რადგან ჩემპიონთა ლიგა დიდებული ტურნირია. ფინალში მოსაღწევად ჩვენ ძალიან ბევრი ვიშრომეთ. ყველამ კარგად ვიცით, რომ არ იქნება იოლი მატჩი, "იუვენტუსი" ძალიან ძლიერი მეტოქეა, ის დიდი კლუბია. ფინალში კი აბსოლუტურად ყველაფერი შეიძლება მოხდეს". ჩავის შესახებ
"ძალიან მიჭირს დავახასიათო ჩავი, როგორც ფეხბურთელი. ვფიქრობ, ყველამ კარგად იცის, რა შეუძლია მოედანზე მას. სწორედ ჩავია ის ფეხბურთელი, რომელიც თამაშის რიტმს აკონტროლებს, ის ნამდვილი ლიდერია. ჩემთვის უდიდესი პატივია, ამდენი ხნის განმავლობაში მისი თანაგუნდელი რომ მერქვა. მე გული ვიჯერე მისი ფეხბურთით და არა მარტო თამაშებზე, არამედ ვარჯიშებზეც. ჩემი აზრით, ჩავი ესპანური ფეხბურთის ისტორიაში საუკეთესო ფეხბურთელია და ამით ბევრი რამ არის ნათქვამი. ჩავი არის ფეხბურთის ისტორიაში ერთ-ერთი ყველაზე სრულყოფილი ფეხბურთელი". დანი ალვეშზე
"დანი ალვეში მსოფლიოს საუკეთესო განაპირა მცველია. დღეს ასეთი ტიპის ფეხბურთელს იშვიათად ნახავთ. როგორი მონდომებითაც ის თამაშობს ნებისმიერ შეხვედრაში, საოცარია. მისი შემცვლელის პოვნა ურთულესი რამაა".ყოველდღიური სპორტული გაზეთი "ლელო"
