ლა ლიგა. XV ტური: "ბარსამ" 2 გოლი გაანიავა [VIDEO]

12 დეკემბერს ესპანეთის ლა ლიგის მე-15 ტურის 5 შეხვედრა გაიმართა.

"ბარსელონამ" ორგოლიანი უპირატესობა ვერ შეინარჩუნა "კამპ ნოუზე" და "დეპორტივოს" 2:2 დაუზავდა.

ლიდერი ლეო მესიმ და ივან რაკიტიჩმა დააწინაურეს, მაგრამ 77-ე წუთზე ლუკას პერესმა გაიტანა, მერე კი მანვე ალექს ბერგანტინიოსს გაატანინა.

ლუის ენრიკე (ბარსელონა): "ტაქტიკური თვალსაზრისით, თამაში უცნაური გამოდგა, რადგან "დეპორტივომ" სამი შემტევი დააყენა, რომლებიც თითქმის, არ ეხმარებოდნენ დაცვას. გამოვიდა, რომ ჩვენი 7X7-ზე ვთამაშობდით. "დეპორტივო" არ შეუშინდა რისკს, მაგრამ მხოლოდ რისკი არ იყო მათი პლუსი დღეს. ბოლო 15 წუთი ისე რა ფეხბურთი ვითამაშეთ და ამით მეტოქემ ისარგებლა. დღევანდელ თამაშს "ვალენსიასთან" ფრეს ვერ შევადრიდი, აქ სულ სხვა მომენტი იყო, ბოლოს წაგებაც კი შეგვეძლო. ცოტა, იმედგაცრუებულები ვართ, მაგრამ ქულების დაკარგვის გარეშე როგორ ითამაშებ. შეცვლების განხორციელება მიყვარს, მაგრამ დღევანდელი ფრე ჩემი ბრალია, ყველაფერი მაშინ დაიწყო, როცა შეცვლები განვახორციელე. ასე რომ, ეს დაკარგული ქულები ჩემი "დამსახურებაა".

"სევილიამ" ათკაციან "სპორტინგს" კევინ გამეიროს დუბლის წყალობით მოუგო.

ბარსელონა-დეპორტივო 2:2
გოლები: 1:0 მესი (39), 2:0 რაკიტიჩი (62), 2:1 ლ. პერესი (77), 2:2 ბერგანტინიოსი (86)

სელტა-ესპანიოლი 1:0
გოლი: 1:0 ასპასი (42)
გაძევება: პ. ერნანდესი (47. სელტა)

ლევანტე-გრანადა 1:2
გოლები: 0:1 პენიარანდა (50), 1:1 სიმაო (66), 1:2 პენიარანდა (88)

სევილია-სპორტინგი 2:0
გოლები: 1:0 გამეირო (75-პენ), 2:0 გამეირო (80)
გაძევება: ლ. ერნანდესი (74. სპორტინგი)

ლას პალმასი-ბეტისი 1:0
გოლი: ვილიან ჟოზე (93)

1. ბარსელონა - 35 ქულა; 2. ატლეტიკო - 32; 3. რეალი - 30; 4. სელტა - 28; 5. ვილიარეალი - 24.