ლა ლიგის მომავალ ტურში "ესპანიოლი" "რეალ სოსიედადს" მასპინძლობს. ეს დაპირისპირება ბასკთა ფორვარდ რაულ ტამუდოსთვის განსაკუთრებულია. 33 წლის ტამუდო "ესპანიოლის" აღზრდილია, ის თითქმის 10 წელიწადი კაპიტნობდა "ესპანიოლს" და ამ გუნდის სიმბოლოდაც ითვლებოდა. მან 400-ზე მეტ მატჩში გამოიყვანა კატალონიური კლუბი კაპიტნის სამკლავურით და მარტო პრიმერას მატჩებში 129 გოლი გაიტანა. გუნდში მაურისიო პოჩეტინოს დანიშვნის შემდეგ (არადა ადრე ისინი თანაგუნდელები იყვნენ) ტამუდოს კარიერა "ესპანიოლში" აირია, პოჩეტინომ მას კაპიტნობაც კი ჩამოართვა. აგვისტოდან მოყოლებული რაული "რეალ სოსიედადის" ღირსებას იცავს. ტამუდო აღნიშნავს, რომ მისთვის ეს მატჩი ძალიან
ფორლანი კოჭმა დააღალატა...
ოთხშაბათს მადრიდის "ატლეტიკოს" ვარჯიშზე კოჭი დაიზიანა დიეგო ფორლანმა, რის გამოც ურუგვაელმა უმალვე შეწყვიტა ვარჯიში და ექიმებს მიაკითხა. ექიმებმა მას კოჭის პირველი ხარისხის დაზიანება დაუდგინეს. მიუხედავად იმისა, რომ ტრავმა არ არის სერიოზული, მუნდიალის საუკეთესო ფეხბურთელი შაბათს "სევილიასთან" მატჩს 90%-ით გამოტოვებს. 31 წლის ფორლანმა ამ სეზონში 22 თამაშში 7 გოლი გაიტანა.
... ფორლინი ხელმა
ფორლანის შესახებ დავწერეთ, ახლა გადავიდეთ ფორლინზე - ხუან ფორლინი 23 წლის არგენტინელი მცველია, რომელმაც ოთხშაბათს მარცხენა ხელის ოპერაცია გაიკეთა. ძვლების შეხორცების დასაჩქარებლად ექიმებმა ფორლინის მეტალის ელემენტები "ჩაუშენეს" ძვალში. მედიკოსთა დასკვნით, ოპერაცია წარმატებული გამოდგა. არგენტინელი კვირის ბოლომდე სახლში დაისვენებს, შემდეგ კი სარეაბილიტაციო კურსს დაიწყებს. ფორლინი 3-4 კვირას ვერ ითამაშებს, შემდეგ კი მოედანზე დამცავი შალითით გამოვა. სამხრეთ ამერიკელმა ხელი "ალმერიასთან" მატჩში, 5 თებერვალს მოიტეხა, ამ სეზონში სულ ფორლინმა 20 მატჩში მიიღო მონაწილეობა.
ვალენსიას ჯოვინკო მოუნდა
"ვალენსიას" სებასტიან ჯოვინკოს შეძენა სურს, ამტკიცებს იტალიური "ტუტოსპორტი". 24 წლის შემტევი ნახევარმცველი "იუვენტუსის" საკუთრებაა, თუმცა იჯარით "პარმაში" თამაშობს. სხვათა შორის, ამ სეზონში ჯოვინკომ "იუვეს" კარში დუბლი შეასრულა. "ლოს ჩეს" ხელმძღვანელობა უკვე მართავს მოლაპარაკებას ჯოვინკოს აგენტთან, თუმცა სეზონის ბოლოს, საიჯარო შეთანხმების თანახმად, "პარმას" შეუძლია ფეხბურთელზე უფლებების ნახევარი გამოისყიდოს "ბებერი ქალბატონისგან". "პარმა" კი მოწადინებულია ჯოვინკოს დატოვებით, მან 20 მატჩში 5 გოლი გაიტანა და იმდენად კარგად წარმოაჩინა თავი, რომ იტალიის ნაკრებში დაიბრუნა ადგილი. "ტუტოსპორტი" ამტკიცებს, რომ "ვალენსია" ჯოვინკოზე ტურინელთა მფლობელობის ნაწილს გამოისყიდის, ხოლო "პარმას" მის სანაცვლოდ ალეხანდრო (ჩორი) დომინგესს შესთავაზებს.
