გზა, რომელსაც ოცნებასთან მიჰყავხარ - ფერნანდო ტორესის დარიგებები ბავშვებს

დოკუმენტურ ფილმ The Other Kids-ში მადრიდის "ატლეტიკოს" ფორვარდმა ფერნანდო ტორესმა განაცხადა, რომ მოენატრა ის დრო, როცა ფეხბურთს მხოლოდ სიამოვნებისთვის თამაშობდა.

ფილმი მოგვითხრობს უგანდელი ბიჭის, რეიგანის შესახებ, რომელსაც სურს გახდეს პროფესიონალი ფეხბურთელი. "ელ ნინიო" კი პარალელებს ავლებს მასსა და უგანდელ რეიგანს შორის.

"მართლაც ძალიან მენატრება ის დრო, როცა თქვენს ასაკში ვიყავი და ჩვენთვის ფეხბურთი მხოლოდ გართობა იყო. ერთი სული მქონდა, როდის წავიდოდი სკოლიდან, შეასრულებდი დავალებებს და გავიქცეოდი ფეხბურთის სათამაშოდ. ჩვენ ბედნიერები ვართ, რადგან ესპანეთში ვცხოვრობთ და ფეხბურთის პროფესიად ქცევის შანსი მოგვეცა. ბავშვობაში ოცნებად მქონდა, მეთამაშა "ვისენტე კალდერონზე", სადაც ბაბუასთან ერთად თამაშების სანახავად დავდიოდი", - უყვება ტორესი მადრიდის ერთ-ერთი სპორტსკოლის ბავშვებს.

ტორესი ასევე ჰყვება, რომ საფეხბურთო ოლიმპომდე მისასვლელი გზა ია-ვარდით არ არის მოფენილი:

"როცა 10 წლის ასაკში "ატლეტიკოს" აკადემიაში აღმოვჩნდი, მქონდა როგორც კარგი, ისე ცუდი დროება. მაგრამ ჩემი ოცნება ჩემი მოტივატორი იყო და მის მისაღწევად ბევრ რამეს ვწირავდი. ეს ბევრი ეძახის ამას შეწირვას, თუმცა მე ასე არასოდეს მიფიქრია, ჩემთვის ყოველთვის ნორმალური იყო ისეთი რამის გაკეთება, რაც ჩემს ოცნებას მიმაახლოებდა და ერთ დღესაც ჩემი ოცნებაც ასრულდა. ყოველთვის უნდა გჯეროდეს, რომ მიზანს მიაღწევ.

მაშინაც, როცა მიზნამდე მისასვლელი გზა რთული და შორია; მაშინაც, როცა შენი არ სჯერათ, არ ეიმედებათ; როცა აღმოაჩენ, რომ შენი ზოგიერთი მეგობარი სინამდვილეში არ ყოფილა შენი ნამდვილი მეგობარი. ამ გზაზე ბევრ სინანულსაც იგრძნობ, განსაკუთრებით, როცა მიხვდები, რომ სწორ გზაზე არ იდექი", - ამბობს ფილმში "ელ ნინიო".

ყოველდღიური სპორტული გაზეთი "ლელო"