ბრენოზე ამბობენ, საკუთარ ვილას ცეცხლი თვითონ წაუკიდაო. არის თუ არა ეს სიმართლე, ჯერ არავინ იცის. სამაგიეროდ, ნაღდი ისაა, რომ მიუნხენის "ბაიერნმა" ბრაზილიელი მცველის გარეშე მართლა დაანთო ცეცხლი "ლევერკუზენთან" მატჩში და მიუნხენში მუდამ განწირული, მაგრამ მაინც ამბიციური მოწინააღმდეგე გაამასხარავა. როდოლფო ესტებან კარდოსო ჰამბურგში გმირი გახდა, კრისტიან ლელმა და ადრიან რამოსმა კი ბერლინი გააუბედურეს.
სამწუხარო ფაქტია ის, რომ გერმანიის ჩემპიონატის მეშვიდე ტურს მძაფრად უარყოფითი არასპორტული ლაიტმოტივი გასდევდა: აქეთ რალფ რანგნიკის გად
არადა, ამ ტურმა სპორტული თვალსაზრისითაც საკმაოდ ბევრი ისეთი რამ შემოგვთავაზა, რაც სალაპაროდ ღირს. პოზიტივები: ბრწყინვალე ფორმაში მყოფი "ბაიერნი", "ჰამბურგის" გამოცოცხლება და "გლადბახი", რომელიც ჯერჯერობით სეზონის აღმოჩენაა. ნეგატივები: "ფრაიბურგის" დაცვის ხაზი, ორი პრობლემატური ბერლინელი და "ლევერკუზენის" მწვრთნელი რობინ დუტი.
ოჰ, ეს ბავარიელები
შეგვიძლია, მიუნხენური გრანდი ზღაპრული ეპითეტებით შევამკოთ, მაგრამ ვფიქრობთ, რომ ეს არ არის საჭირო. შეგვიძლია, კონკრეტული გმირები გამოვყოთ და ისინი მაინც ვაქოთ, მაგრამ არც ესაა საჭირო. მოდით, ამ "ბაიერნის" იდეალურობაზე ამჯერად მხოლოდ ციფრები ვალაპარაკოთ: 838 წუთია, მანუელ ნოიერს გოლი არ გაუშვია, რაც არა მარტო მისი, არამედ მთელი დაცვის დამსახურებაა და აღსანიშნავია ისიც, რომ იუპ ჰაინკესის ხელში, დაცვას თვით ფრანკ რიბერიც გულმოდგინედ ეხმარება.
7 ტურის შემდეგ რეკორდმაისტერი პირველ ადგილზეა და ბურთების ისტორიული შეფარდება აქვს: 21:1. "ლევერკუზენთან" 3:0 (ეს გუნდი მოქმედი ვიცე-ჩემპიონია) ზედიზედ მეექვსე გამარჯვება იყო მშრალი ანგარიშით. "ბაიერნის" კაპიტანმა ფილიპ ლამმა მშვენივრად თქვა, ახლა ისეთ ფორმაში ვართ, რომ ჩვენს თავს მხოლოდ ჩვენ თუ დავამარცხებთო.
გლადბახი, შარშანდელი მაინცი
ერთადერთი გუნდი, რომელმაც ამ სეზონში "ბაიერნის" დამარცხება შეძლო, რაც არ უნდა პარადოქსულად ჟღერდეს, მიონხენგლადბახის "ბორუსიაა", თუმცა ეს გუნდიც იმდენად კარგ ფორმაშია, რომ ეს ყველაფერი პარადოქსულად აღარ ჟღერს.
"გლადბახმა", რომელსაც წინა სეზონში მეორე ბუნდესლიგაში დაქვეითებამდე ძალიან ცოტა დააკლდა, რეკორდმაისტერს პირველივე ტურში, თანაც მიუნხენში მოუგო (1:0). ცხადია, მაშინ ყველამ იფიქრა, რომ "ბაიერნს" კრიზისი ეწყებოდა, მიონხენგლადბახელებს კი ძალიან გაუმართლათ, მაგრამ ნახეთ: შვიდი ტურის შემდეგ ლუსიენ ფავრის გუნდს 16 ქულა აქვს და "ვერდერთან" ერთად, ცხრილში "ბაიერნთან" ყველაზე ახლოსაა.
ფავრის ბიჭები ბრწყინვალე "ბაიერნს" მხოლოდ ორი ქულით ჩამორჩებიან და ეს კიდევ არაა ყველაფერი: "გლადბახმა" 1987/88 წლების სეზონის შემდეგ საუკეთესო სტარტი აიღო.
ამიტომაცაა, შვეიცარიელ სპეციალისტს ახლა ყველას დამშვიდება და ეიფორიის ჩაცხრობაზე ზრუნვა რომ უწევს. "ნიურნბერგთან" 1:0-ის შემდეგ მან თქვა, ყველანი ძალიან კმაყოფილები ვართ, მაგრამ ახლა ცაში ფრენა არ შეიძლება, მიწაზე უნდა დავრჩეთო. მაგრამ "გლადბახის" ფანებს ახლა რაღა დაამშვიდებს - მათ ლუსიენ ფავრი უკვე "ბორუსიას" ლეგენდარულ მწვრთნელ ჰენეს ვაისვაილერს შეადარეს.
ჰამბურგი ცოცხალი ყოფილა!
რაც ვითომ დროებითი მწვრთნელის, როდოლფო ესტებან კარდოსოს დამსახურებაა? ფაქტია, რომ მიხაელ იონინგის გათავისუფლებიდან ზუსტად 4 დღეში კარდოსომ ჩრდილოგერმანულ კლუბს შტუტგარტში მოაგებინა და ეს იყო "ჰამბურგის" პირველი გამარჯვება 13 ოფიციალური მატჩის ვერმოგების შემდეგ. თუმცა ამ უკანასკნელს პოსტზე მაინც არავინ დატოვებს - ჰამბურგელები ახალ მწვრთნელს ალბათ ამ კვირაშივე წარადგენენ.
ფრაიბურგი: სრული სვლით უფსკრულისკენ
საოცარია: რობინ დუტის ხელში "ფრაიბურგი" შესანიშნავად გამოიყურებოდა (გაიხსენეთ წინა სეზონი), ახლა კი, იგივე მწვრთნელი გაცილებით უკეთეს გუნდში ვერაფერს ახერხებს, მაგრამ დუტს თავი დავანებოთ, "ფრაიბურგი" გამოიყურება საშინლად.
შვიდ მატჩში 22 გოლის გაშვება კატასტროფის ტოლფასია. თანაც, ბრაისგაუელთა კარს ოლივერ ბაუმანი იცავს, რომელსაც ექსპერტები ცოტა ხნის წინ გერმანიის ნაკრებში, მანუელ ნოიერის შემდეგ, მეორე ნომრად მოიაზრებდნენ.
"შალკესთან" წაგების (2:4) შემდეგ, "ფრაიბურგი" ბოლოსწინა ადგილზეა და მხოლოდ 4 ქულა აქვს, რაც მეორე ბუნდესლიგაში დაქვეითების სერიოზულ საფრთხეზე მიუთითებს. გაგახსენებთ, რომ წინა სეზონში "ფრაიმ" ევროპის ლიგის საგზურისთვის იბრძოლა და საბოლოოდ მეცხრე ადგილზე გავიდა.
უტვინო ბერლინელები
ტურის ყველაზე ემოციურ მატჩში (ვერდერი-ჰერტა 2:1) "ჰერტა" ორმა ფეხბურთელმა დაღუპა. არადა, მარკუს ბაბელის გუნდისთვის ყველაფერი ისე მიდიოდა, როგორც ამ უკანასკნელმა დაგეგმა: რაფაელმა "ჰერტა" დააწინაურა და სხვათა შორის, ლევან კობიაშვილის გუნდი 1:1-ზეც ყაბულს იყო. მაგრამ მერე მსაჯი ფელიქს ბრიხი იძულებული გახდა, კრისტიან ლელი და ადრიან რამოსი გაეძევებინა.
ლელს და რამოსს ალბათ აღარ ახსოვდათ, რომ როცა მოთამაშეს ერთი ყვითელი ბარათი უკვე მიღებული აქვს, თითოეულ ორთაბრძოლას ტვინი უნდა დააყოლოს და არც აუტის ხაზთაც უნდა მოცელოს მეტოქე გუნდის მოთამაშე, თანაც, გაშლილი ფეხით (ლელი) და არც ბურთი უნდა მოიგერიოს მთელი ძალით, როცა მსაჯის გადაწყვეტილებითაა უკმაყოფილო (რამოსი). რა გასაკვირია, რომ ცხრა ბერლინელმა ბრემენში ქულაც კი ვერ გადაარჩინა. არადა, კობი და კომპანია ამ გმირულ წარმატებასთან ძალიან ახლოს იყვნენ.
რაო, რაო, რობინ?
"ლევერკუზენმა" მიუნხენში 0:3 წააგო - ამაში ახალი არაფერია, რადგან "ფარმაცევტები" ბავარიის მთავარ ქალაქში ყოველთვის სავსე შარვლებით თამაშობენ ხოლმე, თუმცა არც ესაა სიახლე. სამაგიეროდ, ცოტათი მაინცაა სიახლე ის, რომ "ლევერკუზენს" მიუნხენში 1989 წლის შემდეგ არ მოუგია. 1989? მაშინ ბერლინის კედელი ჯერ კიდევ ყოფდა გერმანიას, ლევერკუზენელი ანდრე შიურლე კი დაბადებულიც არ იყო.
"ლევერკუზენის" მიუნხენურ უბედურებაზე ბევრს არ ვილაპარაკებდით, რადგან ეს აღარავის უკვირს, რომ არა რობინ დუტი. მაინც რა ქნა ასეთი "ფარმაცევტების" მწვრთნელმა? ფეხბურთელები აბსოლუტურად ლოგიკური კრიტიკისგან დაიცვა, რაც იმაზე მიუთითებს, რომ რობინი რეალობის შეგრძნებას კარგავს.
ნაცვლად იმისა, რომ ეთქვა, და კოშტას ძირითად შემადგენლობაში გამწესებით დიდი შეცდომა დავუშვიო, ისე თქვა, ამ ფეხბურთელმა რიბერის განეიტრალებას თავი კარგად გაართვაო, რომ წარბიც არ შეუხრია. საერთოდ, დუტს მატჩის შემდეგ ისეთი განცხადებები გამოუვიდა, რომ თავისი შეგირდებით კმაყოფილი ჩანდა. ამასობაში, ვიცე-ჩემპიონი და ჩემპიონთა ლიგის მონაწილე "ლევერკუზენი" მე-11 ადგილზეა და საინტერესოა: კიდევ რამდენ ხანს მოითმენს გუნდის სპორტული დირექტორი რუდი ფიოლერი ამ კომედიას?
მე-7 ტურის სიმბოლური ნაკრები (3-2-3-2)
ჰაინც მიულერი (მაინცი, 1) - დანიელ ვან ბუიტენი (ბაიერნი, 3), ჰოლგერ ბადშტუბერი (ბაიერნი, 2), კრისტიან პანდერი (ჰანოვერი, 1) - საშა რიტერი (კიოლნი, 2), მატო ჟაჟალო (კიოლნი, 1) - მარკო როისი (ბორუსია მ, 2), თომას მიულერი (ბაიერნი, 3), ფრანკ რიბერი (ბაიერნი, 4) - კლაუდიო პისარო (ვერდერი, 2), ლუკას პოდოლსკი (კიოლნი, 2)
მეშვიდე ტურის სიმბოლურ ნაკრებს მხოლოდ სამი დებიუტანტი ჰყავს. დანარჩენი 8 მოთამაშიდან კი, რომლებიც "კიკერმა" საუკეთესო თერთმეტეულში მოახვედრა, ოთხი ბაიერნელია. ამათგან, ფრანკ რიბერიმ უკვე მეოთხედ შეძლო ტურის სიმბოლურ ნაკრებში მოხვედრა და კიდევ ერთხელ უნდა შეგახსენოთ, რომ ბუნდესლიგის ეს სეზონი ჯერ მხოლო შვიდ ტურს ითვლის.
ტურის გმირი
მარკო როისი (ბორუსია მ)
"გლადბახის" მცველი მარტინ შტრანცლი არ იზიარებს მოსაზრებას იმის შესახებ, რომ გუნდში ყველაფერი ერთ მოთამაშეზე უნდა იყოს დამოკიდებული და ფიქრობს, რომ მართლა კარგად მომზადებულ გუნდს წამყვანი ფეხბურთელის არყოფნა ვერაფერს დააკლებს. მისთვის ერთადერთი გამონაკლისი თანაგუნდელი მარკო როისია. "გლადბახმა" "ნიურნბერგს" 1:0 რომ მოუგო, ეს პირველ რიგში როისის დამსახურებაა, რომელსაც ფრანკებმა ვერაფერი მოუხერხეს. მიონხეგლადბახელები ყველა მომენტს როისის წყალობით ქმნიდნენ.
საუკეთესო ფეხბურთელები
7 ტურის შემდეგ, "კიკერის" შეფასებების მიხედვით
ფეხბურთელი კლუბი საშუალო შეფასება
1. ფრანკ რიბერი ბაიერნი 2.14
2. კლაუდიო პისარო ვერდერი 2.20
3. ჰოლგერ ბადშტუბერი ბაიერნი 2.21
4. მარკო როისი ბორუსია (მ) 2.29
5. მარიო გიოტცე ბორუსია (დ) 2.50
6. ანდრე ტერ შტეგენი ბორუსია (მ) 2.50
7. ანატოლი ტიმოშჩუკი ბაიერნი 2.50
8. ვილიამ კვისტი შტუტგარტი 2.57
9. ლუის გუსტავო ბაიერნი 2.63
10. თომას მიულერი ბაიერნი 2.64
გოლს პლუს პასის რეიტინგი
ფეხბურთელი კლუბი თამაში გოლი პასი ქულა
1. პაპის დემბა სისე ფრაიბურგი 7 6 3 9
2. მარიო გომესი ბაიერნი 6 8 1 9
3. ლუკას პოდოლსკი კიოლნი 6 4 4 8
4. ფრანკ რიბერი ბაიერნი 7 3 5 8
5. კლაუდიო პისარო ვერდერი 6 5 2 7
6. რაული შალკე 7 4 3 7
7. კლაას-იან ჰუნტელაარი შალკე 7 5 1 6
8. თომას მიულერი ბაიერნი 7 2 4 6
9. რაიან ბაბელი ჰოფენჰაიმი 7 4 1 5
10. მარტინ ჰარნიკი შტუტგარტი 7 4 1 5
ყოველდღიური სპორტული გაზეთი "ლელო"
