მარკო როისი ბუნდესლიგის პირველი წრის უმთავრესი აღმოჩენა და ერთ-ერთი საუკეთესო ფეხბურთელია (10 გოლი, 4 საგოლე პასი). ფაქტია, რომ მიონხენგლადბახის "ბორუსიას" 22 წლის უნიჭიერესი და უკვე ვარსკვლავად ჩამოყალიბებული გარემარბის შენარჩუნება გაუჭირდება. მეტიც: შეგვიძლია თამამად ვთქვათ, რომ როისი "გლადბახში" მაქსიმუმ წელიწადნახევარი თუ დარჩება, ისე კი, დიდი შანსია, რომ მარკომ მიონხენგლადბახი სეზონის ბოლოს ან სულაც ახლავე დატოვოს, რადგან მთხოვნელთა რაოდენობა მუდმივად იზრდება.
ჩვენი გერმანელი კოლეგები დარწმუნებულები არიან იმაში, რომ როისისთვის გადამწყვეტი ბრძოლა მიუნხენის "ბაიერნსა" და დორტმუნდის "ბორუსიას" შორის გაჩაღდება. ახლა კი, რამდენიმე გამოცემა
"ბაიერნის" ხელმძღვანელებმა როისზე ხმამაღლა საუბარი ორიოდე თვის წინ დაიწყეს, თუმცა დეკემბრის დასაწყისში რეკორდმაისტერის ვიცე-პრეზიდენტმა კარლ-ჰაინც რუმენიგემ თქვა, რომ მარკოსთვის მიუნხენში გადასვლა ჯერ ადრეა, თუმცა იქვე დასძინა, ცხადია, ჩვენთვის ის ძალიან საინტერესო ფეხბურთელიაო.
"ბაიერნს" როისი, რა თქმა უნდა, აინტერესებს. ჩვენ ვიცით, რომ მის კონტრაქტში ჩადებულია პუნქტი, რომლის თანახმად, მსურველმა "გლადბახს" 17.5 მილიონი ევრო უნდა გადაუხადოს. ეს ჩვენთვისაც კი დიდი თანხაა, მაგრამ თუ მარკო პროგრესს განაგრძობს, უკან არაფერზე დავიხევთ. ისე კი, მიმაჩნია, რომ მისთვის "ბაიერნი" ჯერ მაინც ადრეა. ვფიქრობ, უმჯობესია, მიონხენგლადბახში კიდევ ერთი სეზონი გაატაროს," - განაცხადა რუმენიგემ.
ახლა კი გაზეთები "ბილდი" და "დერ ვესტენი" ავრცელებენ ცნობას იმის შესახებ, რომ თავად როისი "დორტმუნდისკენ" იხრება. ხსენებული გამოცემების ინფორმაციით, როისი უკვე შეხვდა და ესაუბრა გერმანიის მოქმედი ჩემპიონის ბოსებს. ფაქტი ის არის, რომ როისი 16 წლამდე სწორედ "დორტმუნდის" ბავშვთა გუნდში თამაშობდა, მერე კი წავიდა - ამბობენ, დორტმუნდელებმა მას ფიზიკური კონდიციები დაუწუნესო. დორტმუნდიდან მარკომ "ალენში" ამოყო თავი, მერე "გლადბახში" მოხვდა, მაგრამ მისი ოჯახი დღემდე დორტმუნდში ცხოვრობს. დორტმუნდელია მისი მეგობარი გოგონაც.
BVB-ს შეფები როისზე საუბარს თავს არიდებენ. კითხვაზე, მართლა შეხვდა თუ არა მარკოს, დორტმუნდელთა გენერალურმა მენეჯერმა ჰანს-იოახიმ ვატცკემ ასე უპასუხა: "მე მხოლოდ იმ ფეხბურთელებზე მსურს საუბარი, რომლებიც ჩვენთან თამაშობენ."
მარკო როისს "გლადბახთან" კონტრაქტი 2015 წლამდე აკავშირებს. "ბაიერნი" მისთვის ჯერ მართლაც ადრეა, რადგან მიუნხენურ გრანდში მას ძირითად შემადგენლობაში თამაშის გარანტიას ვერავინ მისცემს – რეკორდმაისტერს მის პოზიციებზე ხომ ფრანკ რიბერი, არიენ რობენი და თომას მიულერი ჰყავს. შესაბამისად, თუ როისი მართლაც "დორტმუნდს" ანიჭებს უპირატესობას, ეს სავსებით ლოგიკურია.
ყოველდღიური სპორტული გაზეთი "ლელო"
