სამწვრთნელო საკითხი ბუნდესლიგის არაერთ კლუბშია გასარკვევი - სეზონის ბოლოს კონტრაქტები შემდეგ მწვრთნელებს უმთავრდებათ:იუპ ჰაინკესს (ბაიერნი), იენს კელერს (შალკე), ბრუნო ლაბადიას (შტუტგარტი), არმინ ფეეს (აინტრახტი), მაიკ ბიუსკენსს (ფიურტი) და მიხაელ ვაიზინგერს (ნიურნბერგი).
ცხადია, ყველაზე საინტერესო "ბაიერნია". "კიკერი" წერდა, რომ ყინული დაიძრა: რეკორდმაისტერის ვიცე-პრეზიდენტი კარლ-ჰაინც რუმენიგე ჰაინკესს ამ დღეებში უნდა შეხვდეს.
როცა მწვრთნელს კლუბთან კონტრაქტი სეზონის ბოლოს უმთავრდება, გერმანული კლუბები დამრიგებლებთან მოლაპარაკებებს იანვარში იწყებენ ხოლმე, მაგრამ ჰაინკესმა არაერთხელ თქვა, შეფებს სავარაუდოდ მარტში დაველაპარაკები, მანამდე კი საჩქარო არაფერიაო.
როგორც ჩანს, რაღაც შეიცვალა,
პრეზიდენტი ული ჰიონესი და სპორტული დირექტორი მათიას ზამერი ჰაინკესს მუდმივად აქებენ და გაიძახიან, რაც უნდა მოხდეს, "ბაიერნს" მომდევნო სეზონშიც ბრწყინვალე დამრიგებელი ეყოლებაო. თუ ჰაინკესი რუმენიგეს ეტყვის, რომ მუშაობის გაგრძელება უნდა, მერე ბოსები ერთმანეთში მოილაპარაკებენ, როგორ უნდა მოიქცნენ; ხოლო, თუ პენსიაზე გასვლას მოისურვებს, ჰიონესს, რუმენიგეს და ზამერს ყველა შემთხვევაში ახალი სპეციალისტის მიწვევა მოუწევთ.
"კიკერის" ინფორმაციით, დღეისათვის "ბაიერნში" სერიოზულად მხოლოდ სამი კანდიდატურა განიხილება: ხოსეპ გვარდიოლა, რობერტო დი მატეო და მეჰმეთ შოლი.
პირველი კანდიდატი: გვარდიოლა
მიუხედავად იმისა, რომ გერმანული ენა არ იცის, 41 წლის გვარდიოლა რეკორდმაისტერის ხელმძღვანელებს მაინც სერიოზულად აინტერესებთ. მეტიც: "კიკერი" წერს, რომ ჰაინკესის წასვლის შემთხვევაში "ბარსელონას" ყოფილი თავკაცი ყველაზე სასურველი კანდიდატია.
თუმცა "ბაიერნს" პეპისთვის ბრძოლაში "ჩელსის" და "მანჩესტერ სიტის" სახით სერიოზული კონკურენტები ჰყავს.
14 იანვარს "მიუნხენერ თაგესცაითუნგმა" ძალიან საინტერესო ინფორმაცია გაავრცელა: ხსენებულ გამოცემაში ვკითხულობთ, რომ გვარდიოლას მრჩეველი ხოსეპ მარია ორობიტგი რამდენიმე დღის წინ მიუნხენში იმყოფებოდა და "ბაიერნის" ხელმძღვანელებს შეხვდა. გაზეთი წერს, რომ ეს ინფორმაცია სანდო წყაროს მეშვეობით მოიპოვა.
"თაგესცაითუნგი" იმასაც იტყობინებოდა, რომ გვარდიოლას მიუნხენური გრანდის ბოსებისთვის შეუთვლია, გადაწყვეტილებას მარტში მივიღებო.
გაგახსენებთ, რომ შარშან, მაისში, გვარდიოლას კიდევ ერთ მრჩეველს და ძმას, პერეს, მიუნხენური კლუბის ყოფილი სპორტული დირექტორი კრისტიან ნერლინგერი შეხვდა. ინგლისური პრესა წერდა, პეპს ინგლისში მუშაობა უნდა და გადაწყვეტილებას ან "სიტის", ანაც "ჩელსის" სასარგებლოდ მიიღებსო; გერმანული "თაგესცაითუნგი" კი ირწმუნება, რომ ინგლისი პეპის პირველი არჩევანი არ არის.
მეორე კანდიდატი: დი მატეო
"კიკერის" ცნობით, გვარდიოლას შემდეგ ბავარიელები 42 წლის დი მატეოს კანდიდატურას განიხილავენ, რომელმაც წინა სეზონში "ჩელსის" ჩემპიონთა ლიგა მოაგებინა, "ბაიერნს" კი "ალიანს არენაზე" საოცნებო ფინალი ჩაუმწარა.
დი მატეო შვეიცარიაშია დაბადებული და გერმანულად საუბრობს.
სხვადასხვა წყაროს ცნობით, დი მატეო პირადად ზამერის ფავორიტია - თუ, რა თქმა უნდა, გვარდიოლას ვერ დაითანხმებენ.
მესამე კანდიდატი: შოლი
გვარდიოლასთან და დი მატეოსთან ერთად, ბოლო დროს "ბაიერნთან" მიმართებაში ყველაზე ხშირად ექსბაიერნელი მეჰმეთ შოლის გვარს ახსენებენ.
42 წლის მეჰმეთმა კარიერა 2007 წელს დაასრულა, 2008 წელს კი "ბაიერნის" 13-წლამდელთა ბავშვთა გუნდში დაინიშნა. 2009 წელს შოლს "ბაიერნის" მეორე გუნდი ჩააბარეს, 2010-ში გაათავისუფლეს, მაგრამ მიმდინარე სეზონში ისევ დანიშნეს და ახლა კვლავ რეკორდმაისტერის მეორე, რეგიონალლიგის გუნდის დამრიგებელია.
ყოველდღიური სპორტული გაზეთი "ლელო"
ასევე იხილეთ:
ვინ გაწვრთნის "ბაიერნს"?
