ხავი მარტინესი "ბაიერნს" ტრავმის გამო დაახლოებით 7 კვირის მანძილზე აკლდა; ახლა კი 25 წლის ესპანელმა საყრდენმა ნახევარმცველმა, რომელიც რეკორდმაისტერს 40 მილიონ ევროდ ჰყავს ნაყიდი, სრული დატვირთვით ვარჯიში განაახლა და ბრუნდება. თუმცა, ცხადია, რომ შესანიშნავად შეთამაშებული "ბაიერნის" ძირითად შემადგენლობაში თავიდანვე დამკვიდრება ძალიან გაუჭირდება და ალბათ ამიტომაც ამბობს, დაცვაშიც შემიძლია თამაშიო.
"წარმატებულ გუნდს ბევრნაირი ტიპის ფეხბურთელი სჭირდება. მაგალითად, გუნდში საჭიროა როგორც მებრძოლი, ისე მუშა, ტექნიკური და პასების გამნაწილებელი ფეხბურთელი. ვფიქრობ, ჩემი უპირატესობა იმაში მდგომარეობს, რომ მრავალმხრივი მოთამაშე ვარ.
მარტინესი მზადაა, შეითავსოს ნებისმიერი როლი, რასაც რეკორდმაისტერის თავკაცი ხოსეპ გვარდიოლა დააკისრებს: "მთავარია, სასტარტო შემადგენლობაში ვიყო და სადაც მეტყვიან, იქ ვითამაშებ. თუ ნახევარდაცვაში ჩემი ადგილი არ მოიძებნება, დაცვის ცენტრშიც შემიძლია თამაში. "ბაიერნი" მსოფლიოში საუკეთესო გუნდია და ლოგიკურია, რომ ამ გუნდში უდიდესი კონკურენციაა. ჰოდა, ნებისმიერ პოზიციაზე თამაშით კმაყოფილი ვიქნები."
აღსანიშნავია, რომ გვარდიოლას მარტინესში ყველაზე მეტად სწორედ მისი მრავალმხრივობა მოსწონს: "ხავის ყველგან შეუძლია თამაში - ნახევარდაცვაში, დაცვაში, "ჩელსისთან" კი თავდამსხმელივით თამაშობდა. მიხარია, რომ ბრუნდება," - ამბობს პეპი.
შეგახსენებთ, რომ ხავი მარტინესი "ბაიერნში" მეორე სეზონს ატარებს. წინა სეზონში მან რეკორდმაისტერის ფორმით 43 ოფიციალურ მატჩში იასპარეზა და მნიშვნელოვანი წვლილი მიუძღვის იმაში, რომ "ბაიერნმა" ჰეთ თრიქი შეასრულა. ამ სეზონში კი მან მოედანზე მხოლოდ 81 წუთი დაჰყო და ოდენ სამ შეხვედრაში მიიღო მონაწილეობა.
ყოველდღიური სპორტული გაზეთი "ლელო"
ასევე იხილეთ:
ხავი მარტინესმა ვარჯიში განაახლა
