გერმანია. ბუნდესლიგა. XI ტური: კრამერი "გლადბახის" წინააღმდეგ [VIDEO]

* კევინ დე ბრუინის 9 საგოლე პასი 11 ტურის შემდეგ ბუნდესლიგის ახალი რეკორდია.

* თომას მიულერმა წლევანდელი ბუნდესლიგის პირველი ჰეთ-თრიკი შეასრულა.

* "ლევერკუზენმა" მე-5 ფრე ითამაშა, რამდენიც მთელ შარშანდელ სეზონში.

* "დორტმუნდმა" 7-მატჩიანი მოუგებელი სერია შეწყვიტა.

გერმანიის ჩემპიონატის მთავარი ინტრიგა, რა თქმა უნდა, "ბორუსიების" დერბი იყო, რომელიც კვირას გაიმართა. შაბათს "ვერდერის" გამარჯვების შემდეგ დორტმუნდის "ბორუსია" ბოლო ადგილზე (!) გადავიდა. ასე რომ, იურგენ კლოპის გუნდს უკან დასახევი გზა არ ჰქონდა...

გუშინ, სანამ ტურის ცენტრალური მატჩი გაიმართებოდა, "ვოლფსბურგმა" ზედიზედ მეექვსე შეხვედრა მოიგო და შეინარჩუნა მეორე ადგილი. შეუდარებელია ბოლო მატჩებში "მგლების" გამთამაშებელი კევინ დე ბრუინი. "ჰამბურგის" წინააღმდეგ მან ორი საგოლე პასი შეასრულა და 11 ტურის შემდეგ 9 შედეგიანი გადაცემა დაუგროვდა, რაც ბუნდესლიგის ახალი რეკორდია. ბელგიელის პასებით ოლიჩმა და ჰანტმა იხეირეს.

"ბორუსიების" დერბიში კი მხოლოდ ერთი გუნდი თამაშობდა და მეორე თავს იცავდა.

"დორტმუნდმა" 22 დარტყმა შეასრულა, აქედან 10 ზუსტი, ორჯერ ძელს გაარტყა ბურთი (ორივეჯერ როისმა), "გლადბახს" კი ერთხელაც არ შეუწუხებია ვაიდენფელერი.

და ასეთი უპირატესობის მიუხედავად, გასაკვირი არ იქნებოდა, შეხვედრა ნულოვანი ფრით რომ დასრულებულიყო. ზომერი ფანტასტიკურად თამაშობდა, იღბალიც არ იყო მასპინძლების მხარეს. ერთადერთი, ვინც "დორტმუნდის" მხარე დაიჭირა, "გლადბახის" საყრდენი ნახევარმცველი კრისტოფ კრამერი იყო. მან ბუნდესლიგის ისტორიაში ერთ-ერთი ყველაზე კურიოზული გოლი გაიტანა - საკუთარ ნახევარზე, კარიდან სადღაც 35-40 მეტრში მიიღო ბურთი; ხელს არავინ უშლიდა, მაგრამ თავის მეკარეს ძლიერი და მაღალი დაურტყა, ზომერი კი წინ იყო გამოსული და ბურთი თავზე გადააფრინდა...

"ბაიერნმა" გაინაღდა პირველი ადგილი ჩემპიონთა ლიგის ჯგუფურ ეტაპზე და ახლა შეუძლია მთლიანად გადაერთოს ბუნდესლიგაზე, სადაც ჯერჯერობით არც ისე დიდია უახლოეს კონკურენტებთან უპირატესობა. რეკორდმაისტერი მოსაგებად ჩავიდა ფრანკფურტში "აინტარხტთან", რომელსაც ზედიზედ ოთხი ოფიციალური მატჩი ჰქონდა წაგებული.

საინტერესოა, რომ ბავარიელები ბოლო ოთხ მატჩში სტუმრად "აინტრახტს" ერთზე მეტ გოლს ვერ უტანდნენ. გარდა ამისა, ამ სეზონში პეპ გვარდიოლას გუნდს სტუმრად ჩატარებულ ოთხ მატჩში მხოლოდ ერთი ჰქონდა მოგებული. თან, მასპინძლების მწვრთნელი თომას შააფი რთულ ბრძოლას ჰპირდებოდა მეტოქეს.

მართლაც, "აინტრახტმა" საკმაოდ აქტიური პრესინგით დაიწყო და მატჩის შემდეგ ბავარიელი ფეხბურთელები აღიარებდნენ - თამაშის ორგანიზების მხრივ სერიოზული პრობლემები გვქონდაო. შესაძლოა, ეს იმის ბრალიც იყო, რომ ჩემპიონს დიდი ხნით გამოაკლდა დავიდ ალაბა, რომელსაც წელს როტაცია თითქმის არ ეხებოდა.

თუმცა "ბაიერნს" საკმარისი რესურსი აქვს იმისთვის, რომ ავსტრიელის არყოფნა არ შემჩნიოს. პირველად ამ სეზონში, ძირითადში ვიხილეთ ფრანკ რიბერი და სწორედ მან მოამზადა საკუთარი გუნდის პირველი ორი გოლი. ორივე შემთხვევაში თომას მიულერმა იხეირა. მან ჯერ 23-ე წუთზე გაიტანა, 64-ე წუთზე კი ორამდე გაზარდა უპირატესობა.

საინტერესოა, რომ მე-60 წუთისთვის დარტყმების შეფარდება ხუთი ექვსთან იყო "ბაიერნის" სასარგებლოდ, მაგრამ როცა მიულერმა მეორე შეაგდო, "აინტრახტმა" თამაში დაამთავრა და ბოლო ნახევარ საათში სტუმრებმა 13 დარტყმა შეასრულეს. შესაბამისად, საქმე განადგურებამდე მივიდა. მიულერი კი ამ სეზონში მთლიანად ბუნდესლიგაში პირველი ჰეთ-თრიკის ავტორი გახდა, კარიერაში კი მეორედ გაიტანა ერთ მატჩში სამი გოლი - პირველად ეს 2010 წლის პირველ მაისს "ბოხუმთან" მატჩში გააკეთა.

არ შეიძლება არ აღვნიშნოთ ჯერომ ბოატენგის უნიკალური მიღწევა - "ბაიერნის" მცველი ზედიზედ 50 (!) მატჩია, არ მარცხდება ბუნდესლიგაში, რაც გერმანიის ლიგის ახალი რეკორდია.


ჩემპიონთა ლიგის ბინადარ კიდევ ორ გუნდს მორიგი იმედგაცრუება ელოდა. "ლევერკუზენი" "დორტმუნდის" შემდეგ მეორე გუნდია, რომელმაც ჩემპიონთა ლიგაზე წარმატებას ბუნდესლიგა შესწირა. "მონაკოსთან" მოგების შემდეგ როჯერ შმიდტის გუნდი დამარცხდა "ვოლფსბურგთან", "ბენფიკას" შემდეგ ფრედ ითამაშა "პადერბორთან", ახლა კი "ზენიტთან" დამაჯერებელი გამარჯვების შემდეგ "მაინცს" შინ ვერ მოუგო.

"ლევერკუზენმა" 24 დარტყმა შეასრულა "მაინცის" კარის მიმართულებით, მაგრამ ვერაფერი მოუხერხა სტუმრების დაცვასა და მეკარე კარიუსს. მასპინძლების უპირატესობაზე ნათლად მეტყველებს ერთი სტატისტიკური ფაქტი - კარიუსს უფრო მეტი შეხება ჰქონდა ბურთთან, ვიდრე "მაინცის" ბომბარდირ შინჯი ოკაზაკის (49 17-ის წინააღმდეგ). მოკლედ, "მაინცმა" გაძლო და შეწყვიტა ორმატჩიანი წაგებათა სერია, "ლევერკუზენმა" კი უკვე მეხუთე ფრე ითამაშა ამ სეზონში - იმდენი, რამდენიც მთელ შარშანდელ ჩემპიონატში ჰქონდა.

და კიდევ, გრძელდება შტეფან კისლინგის კრიზისი - "ბაიერის" ფორვარდი აგერ, უკვე 814 წუთია, ვერ ახერხებს გოლის გატანას. ასეთი სერია მას არასოდეს ჰქონია.

რობერტო დი მატეო "შალკეს" ვერ შველის. იტალიელი სპეციალისტის მოსვლის შემდეგ "მეშახტეებს" დაავიწყდათ სტუმრად ქულების აღება და შეტევაში თამაში. "შალკემ" ზედიზედ მესამე მატჩი წააგო გასვლაზე, ხოლო იტალიელის ხელმძღვანელობით, უკვე მეოთხე შეხვედრაში ჩამორჩა მეტოქეს დარტყმების რაოდენობით - "ფრაიბურგთან" შეფარდება 11 19-თან იყო მასპინძლების სასარგებლოდ. რომ არა რალფ ფერმანის (7 "სეივი") კარგი თამაში, "შალკე" აუტსაიდერ "ფრაიბურგთან" უფრო დიდი ანგარიშით დამარცხდებოდა.

სხვა მატჩებიდან უნდა გამოვყოთ "ჰანოვერის" გამარჯვება ბერლინში "ჰერტასთან". თაიფუნ ქორქუთის გუნდმა უკვე სტუმრადაც დაიწყო ქულების დაგროვება, ზედიზედ მესამე მატჩი მოიგო და 11 ტურის შემდეგ ჩემპიონთა ლიგის ზონაში ამოჰყო თავი. თან ამ სამ შეხვედრაში "ჰანოვერს" გოლი არ აქვს გაშვებული. რაც შეეხება "ჰერტას", ამ გუნდის მთავარი მწვრთნელი იოს ლუჰუკაი თანამდებობის დატოვების მორიგი კანდიდატი გახდა.

"კიოლნმა" დაამტკიცა, რომ გასვლის გუნდია. იმ დროს, როცა "თხებს" შინ ხუთი ქულა აქვთ დაგროვებული, სტუმრად უკვე 10 ქულა მიითვალეს. თანაც, გასვლაზე მოუგეს "ჰოფენჰაიმს", რომელმაც სეზონში პირველი მატჩი მხოლოდ წინა ტურში წააგო.

ქებათა ქება ვიქტორ სკრიპნიკს, რომელმაც, როგორც ჩანს, კრიზისიდან გამოიყვანა "ვერდერი". უკრაინელმა, რომელსაც სამწვრთნელო ლიცენზიაც კი არ გააჩნია, ზედიზედ მესამე მატჩი (ორი ბუნდესლიგაში და ერთი - გერმანიის თასზე) მოაგებინა "ბრემენელ მუსიკოსებს". "ვერდერმა" პრაქტიკულად ფეხი არ გაანძრევინა შეტევაში "შტუტგარტს", რომელსაც შეტევა ძალიან უყვარს, თავად კი ორი უპასუხო გოლი გაიტანა და პირველი საშინაო გამარჯვება გაიფორმა, თან პირველად შეინახა "მშრალად" საკუთარი კარი.

ბუნდესლიგა. XI ტური
პარასკევი
7 ნოემბერი
ჰერტა-ჰანოვერი 0:2
გოლები: 0:1 ბრიანი (44), 0:2 კიიოტაკე (76)
ჰერტა: კრაფტი, პეკარიკი, ჰეიტინგა, ლუშტენბერგერი (55. ბრუქსი), პლატენჰარდტი, ჰოსოგაი, სკიელბრედი, ბეერენსი, ჰარაგუჩი (74. ვაგნერი), შტოკერი (60. რონი), კალუ.
ჰანოვერი: ცილერი, ჰ. საკაი, მარსელო, კ. შულცი, ტესკერი, შმიდებახი, გიულსელამი, ბრიანი (90+2. ქარამანი), კიიოტეკე (87. ა. ზობიხი), ბიტენკურტი (77. შტინდლი), ხოსელუ.
გაფრთხილება: შტოკერი, ბრუქსი, რონი - ბიტენკურტი, კიიოტაკე
კუთხური: 4-7 ჯარიმა: 27-24 თამაშგარე: 7-2 კარში დარტყმა: 7(6)-11(9) ბურთის ფლობა: 48%-52%
მაყურებელი: 39 710

შაბათი
8 ნოემბერი
აინტრახტი-ბაიერნი 0:4
გოლები: 0:1 მიულერი (23), 0:2 მიულერი (64), 0:3 მიულერი (67), 0:4 შაქირი (86)
აინტრახტი: ვიდვალდი, ჩენდლერი, რუსი, ანდერსონი, ოშჩიპკა, მედოიევიჩი, ჰასებე (90. იგნიოვსკი), აიგნერი (82. პიაზონი), სეფეროვიჩი, შტენდერა (67. კიტელი), მაიერი.
ბაიერნი: ნოიერი, რაფინია, ბოატენგი, დანტე, ბერნატი, ლამი (71. როდე), ჩაბი ალონსო, გიოტცე, რიბერი (76. შაქირი), მიულერი, ლევანდოვსკი (68. რობენი).
გაფრთხილება: ჩენდლერი, აიგნერი - რიბერი
კუთხური: 4-8 ჯარიმა: 21-14 თამაშგარე: 4-6 კარში დარტყმა: 6(4)-19(15) ბურთის ფლობა: 38%-62%
მაყურებელი: 51 500

აუგსბურგი-პადერბორნი 3:0
გოლები: 1:0 ტობ. ვერნერი (7), 2:0 ტობ. ვერნერი (47), 3:0 კალსენ-ბრაკერი (68)
აუგსბურგი: ჰიტცი, ვერჰაეგი, კალსენ-ბრაკერი, კლავანი, ბაბა, ბაიერი, ფოილნერი, ბობადილია (61. ესვაინი), ჰალილ ალთინთოფი (85. ჯურჯიჩი), ტობ. ვერნერი, მატავჟი (76. მიოლდერსი).
პადერბორნი: ლ. კრუზე, ვემერი (44. ვუჩინოვიჩი), შტროდიკი, ციგლერი, ბრიუკნერი, ბაკალორცი, ვრანჩიჩი, ქოჩი (58. საგლიკი), შტოპელკამპი, მეჰა (72. რუპი), კაჩუნგა.
გაფრთხილება: ფოილნერი, ბაბა - ბაკალორცი, სტოპელკამპი, ციგლერი
კუთხური: 3-6 ჯარიმა: 18-15 თამაშგარე: 0-3 კარში დარტყმა: 11(8)-19(9) ბურთის ფლობა: 48%-52%
მაყურებელი: 27 755

ჰოფენჰაიმი-კიოლნი 3:4
გოლები: 1:0 შალაი (2), 1:1 ოლკოვსკი (5), 1:2 ლემანი (12), 1:3 უჯა (35), 2:3 რობერტო ფირმინო (39), 3:3 რობერტო ფირმინო (45), 3:4 ოლკოვსკი (83)
ჰოფენჰაიმი: ბაუმანი, შტრობლი, ზიულე, ბიჩაკჩიჩი (70. რუდი), ბეკი, შვეგლერი (81. შიპლოკი), პოლანსკი, ფოლანდი, რობერტო ფირმინო, ელიუნუსი (81. ცუბერი), შალაი.
კიოლნი: ჰორნი, ბრეჩკო, მავრაი, ვიმერი, ჰექტორი, ლემანი (82. მაროჰი), მატუშიკი (61. გერჰარდტი), ოლკოვსკი, ფოგტი, სვენტო (90+3. ოსაკო), უჯა.
გაფრთხილება: ბეკი - უჯა, ფოგტი
კუთხური: 7-4 ჯარიმა: 16-14 თამაშგარე: 1-2 კარში დარტყმა: 22(14)-12(4) ბურთის ფლობა: 61%-39%
მაყურებელი: 30 150

ფრაიბურგი-შალკე 2:0
გოლები: 1:0 გიუნტერი (22), 2:0 შმიდი (68)
ფრაიბურგი: ბიურკი, რიტერი, ტორეხონი, მიტროვიჩი, გიუნტერი, დარიდა, ჰიოფლერი, შმიდი, კერკი (73. ფრანცი), მეჰმედი (88. გუედე), ფრაისი (66. შაჰინი).
შალკე: ფერმანი, უჩიდა, ჰიოვედესი, ნოიშტედტერი, აოგო, ჰიოგერი, კირხოფი (73. ბარნეტა), სემი (56. ობასი), მ. მაიერი (46. ბოატენგი), ჩუპო-მოტინგი, ჰუნტელაარი.
გაფრთხილება: ფრაისი - აოგო, ჰიოვედესი, ბოატენგი
კუთხური: 3-1 ჯარიმა: 14-13 თამაშგარე: 4-0 კარში დარტყმა: 18(11)-8(6) ბურთის ფლობა: 46%-54%
მაყურებელი: 24 000

ლევერკუზენი-მაინცი 0:0
ლევერკუზენი: ლენო, დონატი, სპაჰიჩი, თოფრაქი, ვენდელი, ლ. ბენდერი, ჩალჰანოგლუ, ბელარაბი (81. იოზთუნალი), ბრანდტი (74. კრუსი), სონი (68. დრმიჩი), კისლინგი.
მაინცი: კარიუსი, ბროსინსკი (79. ვოლშაიდი), ბუნგერტი, ბელი, დიასი (46. ხარა), გაისი, ბაუმგარტლინგერი, ხაირო (62. ალაგუი), მალი, კოო, ოკაზაკი.
გაფრთხილება: ვენდელი - ბელი, ხარა, კოო
კუთხური: 13-0 ჯარიმა: 16-23 თამაშგარე: 2-3 კარში დარტყმა: 24(13)-6(2) ბურთის ფლობა: 50%-50%
მაყურებელი: 29 714

ვერდერი-შტუტგარტი 2:0
გოლები: 1:0 პრიოდლი (30), 2:0 ბარტელსი (57)
ვერდერი: ვოლფი, გერბესელასიე, პრიოდლი, გალვესი, გარსია, ბარტელსი (82. აიჩიჩექი), ფრიტცი, კროოსი (89. ობრანიაკი), იუნუზოვიჩი, დი სანტო, ელია (56. მაკიადი).
შტუტგარტი: კირშბაუმი, კლაინი, შვააბი (65. ბაუმგარტლი), რიუდიგერი, გ. საკაი, ორიოლ რომეუ, გენტნერი, სარარერი (63. ტიმ. ვერნერი), მაქსიმი, კოსტიჩი, ჰარნიკი.
გაფრთხილება: ობრანიაკი - ორიოლ რომეუ
კუთხური: 4-4 ჯარიმა: 13-14 თამაშგარე: 5-3 კარში დარტყმა: 12(4)-8(4) ბურთის ფლობა: 40%-60%
მაყურებელი: 40 284

კვირა
9 ნოემბერი
ვოლფსბურგი-ჰამბურგი 2:0
გოლები: 1:0 ოლიჩი (26), 2:0 ჰანტი (64)
ვოლფსბურგი: ბენალიო, ტრეში, ნალდო, კნოხე, ვიერინია, ლუიშ გუსტავო, გილავოგი (84. ჯუნიორ მალანდა), პერიშიჩი, ჰანტი (80. არნოლდი), დე ბრუინი, ოლიჩი (84. ბენდტნერი).
ჰამბურგი: დრობნი, დიკმაიერი, ჯურუ, ვესტერმანი, ოშტრჩოლეკი, ბეჰრამი, ნ. მიულერი (79. გრინი), ჰოლტბი, ვან დერ ვაარტი (79. ნაფიუ), იანსენი (70. შტიბერი), ლასოგა.
გაფრთხილება: ნალდო, ჰანტი - დიკმაიერი, ოშტრჩოლეკი, ლასოგა
კუთხური: 2-1 ჯარიმა: 13-17 თამაშგარე: 5-0 კარში დარტყმა: 13(6)-10(4) ბურთის ფლობა: 52%-48%
მაყურებელი: 28 000

დორტმუნდი-გლადბახი 1:0
გოლი: 1:0 კრამერი (58-ს. კ.)
დორტმუნდი: ვაიდენფელერი, პიშჩეკი, სუბოტიჩი, პაპასტატოპულოსი (84. გინტერი), დურმი, ს. ბენდერი, კელი, მხითარიანი, კაგავა (73. გროსკროიტცი), როისი (88. იმობილე), ობამეიანგი.
გლადბახი: ზომერი, კორბი, შტრანცლი, იანტჩკე, ალვარო დომინგესი, კრამერი, ნორდტვეიტი (46. ვენდტი), ჰანი, ჰერმანი (75. ტრაორე), რაფაელი (65. აზარი), მ. კრუზე.
გაფრთხილება: დურმი, პაპასტატოპულოსი, იმობილე - ნორდტვეიტი, კრამერი
კუთხური: 7-0 ჯარიმა: 10-11 თამაშგარე: 8-1 კარში დარტყმა: 22(10)-1(0) ბურთის ფლობა: 52%-48%
მაყურებელი: 80 667

ბომბარდირები: 6 - გიოტცე (ბაიერნი), დი სანტო (ვერდერი), ოკაზაკი (მაინცი), მიულერი (ბაიერნი), მაიერი (აინტრახტი); 5 - კრუზე (გლადბახი), ლევანდოვსკი (ბაიერნი).

ყოველდღიური სპორტული გაზეთი "ლელო"