"ტოტენჰემ ჰოთსპურის" თავკაცმა ჰარი რედნაპმა ინგლისის ფეხბურთის ასოციაციის შეფებს თავს დიდი კრიტიკა დაატეხა. მიზეზი: "სფურზის" მწვრთნელი ფიქრობს, რომ პრემიერლიგის ჩემპიონატის დაწყებამდე სამი (!) დღით ადრე უნგრეთის ნაკრებთან ამხანაგური თამაშის დანიშვნა სრული სისულელე იყო. რედნაპის რწმენით ახლა ეს თამაში არავის არაფერში სჭირდება.
ცნობილი სპეციალისტის მღელვარება გასაგებია. დიდი შანსია მისი გუნდიდან ნაკრებში ხუთი ფეხბურთელი გამოიძახონ და ეს მაშინ, როცა 14 აგვისტოს, არც მეტი, არც ნაკლები, "მანჩესტერ სიტისთან" აქვს ჩემპიონატის პირველი თამაში. ჩამოვთვალოთ ის ტოტენჰემელები, რომლებიც ფაბიო კაპელოს "უემბლიზე" უნგრელების წინააღმდეგ სჭირდება: პიტერ
რედნაპი ასე მძვინვარებდა: "ვინმეს შეუძლია ამიხსნას, სეზონის დაწყების წინ სანაკრებო თამაში რატომ ჩასვეს? ეს სრულიად უაზრო ამხანაგური შეხვედრაა, რომელიც მაინცდამაინც იმ დღეებს დაამთხვიეს, როდესაც ჩვენ, წესით, ძალების სრული მოკრებით უნდა ვვარჯიშობდეთ. ფეხბურთელები რატომღაც სადღაც უნდა წავიდნენ და პარასკევს დილით დაგვიბრუნდნენ.
დახეთ, რა გამოდის? "სიტისთან" თამაშის წინ, მთელი კვირის განმავლობაში მე, საწვრთნელ მოედანზე მხოლოდ და მხოლოდ ორ-სამ ფეხბურთელს მიტოვებენ? ამას დაამატეთ, რომ მთელი კვირა გადაჯვარედინებული თითებით უნდა ვიარო, არავინ რომ დამიშავდეს".
ნუ დაგვავიწყდება, რომ ისტლენდერებთან დაპირისპირების შემდეგ, ხელადვე, "ტოტენჰემ ჰოთსპურს" ჩემპიონთა ლიგის მნიშვნელოვანი შეხვედრა ელის - ლიგაში პლეი ოფის ეტაპია. ჰარი რედნაპი შეწუხებულია იმითაც, რომ მის გუნდს გადატვირთული კალენდრის პრობლემა ზაფხულიდანვე შეეხო:
"არ ვიცი ვისი ბრალია, მაგრამ უკვე ძალიან ბევრი თამაში გვქონდა. აი, ახლაც, სამშაბათს "ბენფიკას" ვხვდებით, შაბათს "ფიორენტინას", შემდეგ, ფეხბურთელებს ნაკრებში არბენინებენ, რასაც "მანჩესტერ სიტისთან" მატჩი და ჩემპიონთა ლიგის პლეი-ოფი მოჰყვება. მერე სტიმრად მივდივართ "სტოკთან", ვთამაშობთ ლიგის პლეი ოფის საპასუხო შეხვედრას და "უიგანს" ვმასპინძლობთ. საგიჟეთია, არა?"
კაპელოს კი, თითქოს კრიტიკა აკლდაო, კიდევ ერთი რისხვა დაატყდა თავს. იტალიელ მწვრთნელს, რომელსაც მსოფლიოს ჩემპიონატზე წარუმატებლობის გამო ინგლისური ჯოჯოხეთის გავლა მოუხდა (თუმცა თანამდებობა შეინარჩუნა) ახლა 19 წლამდელთა ნაკრების თამაშებზე არ-დასწრების გამო დააყენეს შავი დღე.
მოგეხსენებათ, ახლახან საფრანგეთში 19 წლამდელთა შორის ევროპის ჩემპიონატი გაიმართა, სადაც ინგლისელი ყმაწვილები ნახევარფინალში გავიდნენ. ფეხბურთის ასოციაცია კაპელოს ჩემპიონატზე ჩასვლისა და მომავალი თაობის ცოცხლად ნახვისკენ მოუწოდებდა, მაგრამ იტალიელმა შორს დაიჭირა - კონტრაქტით ვალდებული არ ვარ საფრანგეთში ჩავიდე, ეს ჩემი მხრიდან საზოგადოებრივი დატვირთვა იქნებაო.
თითქოს, კაპელო მართალია, მაგრამ, მეორე მხრივ ის ინგლისის ნაკრების მთავარი მწვრთნელია, რომელსაც წელიწადში 6 მილიონ ფუნტს (7,2 მილიონ ევროს) უხდიან და როდესაც ასეთი გასამრჯელო გაქვს, შენი გუნდის ხვალინდელ თუ ზეგინდელ ფეხბურთელებს უშუალოდ კი უნდა გაეცნო - მითუფრო ჩაფლავებული მსოფლიოს ჩემპიონატის შემდეგ. იტალიელ მწვრთნელთან დაახლოებულმა მავანმა ადამიანმა ინგლისურ მას-მედიას უთხრა:
"ფეხბურთის ასოციაციამ ფაბიოს ჰკითხა, საფრანგეთში 19 წლამდელთა ევროპის ჩემპიონატზე ჩასვლა ხომ არ გინდაო, მან კი უარი შეუთვალა, რადგან არ უნდოდა გაეკეთებინა რამე მხოლოდ იმიტომ, რომ ეს ფეხბურთის ასოციაციაში ვიღაცას მეოპრიანა. 21 წლამდელთა ნაკრები რომ ყოფილიყო, კაპელოს შესაძლოა თავი ვალდებულად ეგრძნო და შეჯიბრებაზე გამგზავრებულიყო, 19 და 18 წლის ბიჭების ნახვა კი მისი მხრიდან მხოლოდ "პიარი" იქნებოდა და ეს არ ინდომა.
ფაბიომ კარგად იცის, რომ როდესაც კაცი ინგლისის ნაკრების მწვრთნელობას იწყებს, მზად უნდა იყოს, რომ ყველა ვარიანტში გააკრიტიკებენ. ინგლისის ნაკრების მწვრთნელი ვერასდროს ვერაფერს გააკეთებს ისე, რომ არ გალანძღონ. ეს პროფესიის შემადგენელი ნაწილია.
რაც შეეხება 19 წელზე უმცროს ფეხბურთელებს თუ ისინი იმდენად ძლიერები არიან, რომ უკვე ღირს მათი დიდ ნაკრებში მიწვევა, ესე იგი პრემიერლიგაში, თავიანთი კლუბების შემადგენლობებში გამოჩნდებიან. ასე რომ, მათ სანახავად შვებულების შეწყვეტა და საფრანგეთში გამგზავრება აუცილებელი სულაც არ იყო. წინააღმდეგ შემთხვევაში კი ნაკრების ხელმძღვანელებს მათი გვარების მხოლოდ და მხოლოდ ჩანიშვნა და შემდგომი ორი წლის განმავლობაში მათზე დაკვირვება მართებს - საჩქარო არაფერია".
ინგლისური პრესა წერს, რომ ფაბიო კაპელო ფეხბურთის ასოციაციის განვითარების განყოფილების შეფთან სერ ტრევორ ბრუკინგთან ერთად სამომავლო გეგმებს დეტალურად დასახავს. რასაკვირველია, კრიტიკოსები წერენ, რომ 19 წლამდელთა ევროპის ჩემპიონატის გაცდენის გამო მას ამის გაკეთება გაუჭირდება, მაგრამ იტალიელი თავკაცი ამბობს, რომ 19 წლის ბავშვები ჯერ ძალიან ახალგაზრდები არიან და მხოლოდ ზოგმა მათგანმა შეიძლება გაარღვიოს ჯებირი - საკლუბო დონეზე გამოჩნდეს.
