"ვფიქრობ, რომ დი მარიას თავდაჯერების პრობლემა არ აქვს. ანხელი ხარისხიანი, მაღალი კლასის ფეხბურთელია და მისგან შედეგიან თამაშს ველოდებით.
განსაკუთრებით ახლა, როდესაც ურთულესი მატჩები ერთმანეთის მიყოლებით გვაქვს. ანხელმა სეზონი ძალიან კარგად დაიწყო. თუმცა ისეთ მოთამაშეებს, რომლებიც რისკიანად თამაშობენ და მატჩების ბედის გადაწყვეტა შეუძლიათ, ყოველთვის უჭირთ სტაბილურობის შენარჩუნება. ისინი ხომ ისეთი რაღაცის შეთხზვას ცდილობენ, რასაც სხვები ვერ გაბედავდნენ" - თქვა გიგსმა.
გიგსმა კი ისიც პირდაპირ თქვა, რაც ისედაც ვიცოდით - ჩემპიონობის შანსი ამ ეტაპზე აღარ გვაქვს, მაგრამ პირველობისთვის მომავალ სეზონში აუცილებლად ვიბრძოლებთო.
"ჩემპიონობისთვის 9 თვის განმავლობაში უნდა იბრძოლო, რაც ძალიან ძნელია, იმის გათვალისწინებით, რა რთული ტურნირია პრემიერლიგა. თუმცა მომავალ სეზონში ეს მიზანი აუცილებლად გვექნება. მოდი, სიტუაციას რეალურად შევხედოთ. ბოლო რამდენიმე სეზონის განმავლობაში, კლუბში სიტუაცია არასტაბილური იყო. ორი წლის წინათ "იუნაიტედი" ჩემპიონი გახლდათ, მაგრამ ახლა პირველ ადგილზე დაბრუნებას გარკვეული დრო დასჭირდება.
ეჭვიც არ შეგეპაროთ, რომ მომავალ სეზონში მხოლოდ ჩემპიონტთა ლიგის ზონაში მოხვედრა კი არა, ჩემპიონობაც გეგმაში გვექნება. ამ სეზონში კი უკვე მხოლოდ ოთხეულში მოხვედრაზე ვფიქრობთ, რადგან "ჩელსი" ძალიან წინ გაიქცა. თუ ჩემპიონთა ლიგის საგზურს მოვიპოვებთ და ინგლისის თასსაც მოვიგებთ, ვფიქრობ, სეზონი წარმატებულად უნდა ჩავთვალოთ" - ამბობდა გიგსი.
ყოველდღიური სპორტული გაზეთი "ლელო"
