"მანჩესტერ სიტის" რჩეულები: სერხიო აგუეროს კიდევ მეტი შეუძლია

"მანჩესტერ სიტიმ" "ქუინზ პარკ რეინჯერსის" განადგურების შემდეგ 73 ქულა დააგროვა და "არსენალის" წაგების გათვალისწინებით, "ქალაქელებს" კარგი შანსი აქვთ, სეზონი მეორე ადგილზე დაასრულონ. "სიტის" 2 მატჩი დარჩა (სტუმრად "სუონსისთან" და შინ "საუთჰემპტონთან"), ხოლო "მეთოფეებს" 3 შეხვედრა დარჩათ (სტუმრად "მანჩესტერ იუნაიტედთან", შინ "სანდერლენდთან" და ასევე შინ "ვესტ ბრომვიჩთან").

თანაბარქულიანობის შემთხვევაში უპირატესობა, სავარაუდოდ, მანჩესტერელებს ექნებათ, რადგან ამ წუთას მათ ლონდონელებთან მიმართებაში +8 აქვთ. ასე რომ, "სიტიმ", უბრალოდ, უნდა მოიგოს დარჩენილი ორი მატჩი და მეორე ადგილი მისი იქნება. "ქალაქელებს" მიმდინარე პრემიერლიგაში ყველაზე მეტი, 77 გოლი უგროვდებათ. ამ მხრივ, მეორეზე ჩემპიონი "ჩელსია" 70 ბურთით.

მანუელ პელეგრინის გუნდი კარგ ფორმაში შევიდა და ზედიზედ 4 მოგება აქვს. თუმცა განსაკუთრებულად კარგ ფორმაში სერხიო აგუეროა, რომელმაც ქპრ-სთან ჰეთ-თრიკი შეასრულა. არგენტინელს ამ სეზონში სულ 31 გოლი უგროვდება, რომელთაგანაც 25 მას პრემიერლიგაში აქვს გატანილი და უკვე გადაწყვეტილი ჩანს, რომ იგი ჩემპიონატის საუკეთესო ბომბარდირი გახდება, არგენტინელმა ჰარი კეინს 5 ბურთით გაასწრო. თუმცა ჩილელ მწვრთნელს მიაჩნია, რომ ფორვარდს კიდევ უფრო მეტი შეუძლია.

"როდესაც სერხიოს თამაშს ვუყურებ, ძალიან მსიამოვნებს და ბედნიერი ვარ იმით, რომ იგი პროგრესირებს. ეს იგივე აგუერო არ არის, რომელსაც წინა სეზონში ვხედავდით, უკეთესია. მას ესმის, რომ კიდევ უფრო თავდაუზოგავად უნდა იმუშაოს, ბურთთან ერთად უფრო ხშირადაა და უფრო პროდუქტიულიც გახლავთ. იგი დიდი შემართებით ვარჯიშობს და ვფიქრობ, კიდევ მოუმატებს, სერხიო ჯერ მხოლოდ 26 წლისაა.

მომავალში აგუერო "სიტისთვის" ძალიან მნიშვნელოვანი ფიგურა უნდა იყოს; უკვე არის, მაგრამ კიდევ უფრო მნიშვნელოვანი გახდება, თუ ზრდას გააგრძელებს. პოტენციალი დიდი აქვს" - ამბობს პელეგრინი.

გამოვარჩიოთ ალექსანდრ კოლაროვიც, რომელმაც კვლავაც გაიტანა და ისევ ჯარიმიდან. სერბი ამ მხრივ იაია ტურეს დაეწია. მათ პრემიერლიგაში "სიტის" მაისურით ყველაზე მეტი (4) გოლი აქვთ საჯარიმო დარტყმიდან გატანილი.

ამ მხრივ, პრემიერლიგის ისტორიაში პირველ ადგილზე დევიდ ბექჰემია, რომელსაც საჯარიმოებიდან 15 გოლი აქვს გატანილი, მოქმედ ფეხბურთელებს შორის კი მისი უახლოესი მდევარი "სანდერლენდის" სებასტიან ლარსონია - შვედის აქტივში 11 ასეთი ბურთია. 12 აქვს ტიერი ანრის, რომელიც გასაგები მიზეზების გამო საკუთარ მონაგარს ვეღარ გაზრდის.

ტურე ვახსენეთ და პარალელურად, კოტდივუარელი იმაზე წუხს, რომ ფეხბურთში რასისტულ გამოვლინებებს ისევ აქვს ადგილი და მისი აზრით, ამ კუთხით სათანადო მუშაობა ჯერ კიდევ არ მიდის, არც სასჯელია საჭიროებისამებრ მკაცრი და არც რასიზმთან ბრძოლის სისტემაა ბოლომდე გამართულ-ეფექტური.

"ვყოფილვარ სიტუაციებში, როდესაც ფანებს შეურაცხმყოფელი ბანერები ჰქონიათ, მაიმუნთან შედარებები და ასე შემდეგ. როდესაც მსგავს რამეს ხედავ ან გესმის, ძალიან რთულია ამის გადატანა. ეს მტკივნეულია და შეიძლება გაგტეხოს. უფრო რადიკალური ნაბიჯები და სასჯელია საჭირო. 20-ათასფუნტიანი ჯარიმა საკმარისი არ გახლავთ. ამ მიმართულებით მეტი უნდა გაკეთდეს" - განაცხადა ტურემ, რომელიც გუშინ (ოთხშაბათს) 32 წლის გახდა.

აი, "ქუინზ პარკზე" კი რა ვთქვათ, რით გავახაროთ ამ კლუბის გულშემატკივრები?! "ლოფტუს როუდის" მკვიდრთა ადგილი პრემიერლიგაში ისევ არ მოიძებნა და გუნდი ჩემპიონშიპს უბრუნდება. კრის რემზი კი ამბობს, ქპრ-ს დიდი მომავალი აქვსო, მაგრამ ქომაგები მორიგი ფიასკოთი ძალიან გულგატეხილები არიან. ქპრ-ის პრობლემების მიზეზებზე კი ექსპერტად ქცეულმა ექსფეხბურთელმა ჯერმინ ჯენასმაც ისაუბრა.

"როდესაც "ქუინზ პარკ რეინჯერსში" ვიყავი, სიტუაცია პრემიერლიგის კლუბისთვის შესაბამისი არ იყო. ძალიან დიდი ხნის განმავლობაში ყველაფერი გუნდში, უბრალოდ, ფულის ჩადებასა და ხარჯვაზე გახლდათ. სხვა ხედვა და აზრები არავის ჰქონდა. არ იყო ნორმალური გეგმა, დისციპლინა... ეს ყველაფერი კი უმაღლეს დონეზე უნდა იყოს, თუ პრემიერლიგაში თავის დამკვიდრება გსურს" - აღნიშნა ჯენასმა.

ყოველდღიური სპორტული გაზეთი "ლელო"