ლონდონის "არსენალი": არსენ ვენგერის მისია

არსენ ვენგერი სულ მალე "არსენალთან" ერთად მორიგ აღმართს შეუყვება. ბოლო წლებში ეს აღმართები ძალიან ბევრია, ტიტულები კი ძალიან ცოტა. ძირითადად, თასები.

ვენგერს აკრიტიკებს ყველა, ვისაც არ ეზარება. ხშირად ეს კრიტიკა გადამეტებულია, არცთუ იშვიათად კი - სამართლიანი. სამწვრთნელო კარიერის რაღაც ეტაპზე ვენგერს დაავიწყდა, რომ ის მხოლოდ მწვრთნელია. უფრო ზუსტად, გაახსენდა, რომ მენეჯერიცაა. მან გაყიდა ბევრი დიდი ფეხბურთელი, იყიდა ახლები და სანამ ისინი დაფრთიანდებოდნენ, ისევ გაყიდა.

ასე ტიტულებს ვერ მოიგებ.

სამაგიეროდ, არსენ ვენგერმა მილიონობით გირვანქა მოუტანა "არსენალს" და ამასთან ერთად, ეს ისე გააკეთა, რომ ჩემპიონთა ლიგაზე გამსვლელი ადგილი არასოდეს დაუკარგავს.

ბოლო წლებია, "არსენალი" იზრდება. მთლად ასფურცელასავით ვერა, მაგრამ მაინც. იზრდება, მაგრამ პრემიერლიგის ტიტულისათვის მაინც ვერ მომწიფდა. ახალი "არსენალი" საინტერესო პრეტენდენტი ჩანს. მთლად ტიერი ანრის გუნდივით მაგარი ვერა, მაგრამ ყოჩაღი...

შემადგენლობა

ვენგერს ჰყავს შემადგენლობა, რომელსაც თავისუფლად შეუძლია, მოიგოს პრემიერლიგა. "არსენალის" მთავარი ნაკლი არასტაბილურობაა. თუ ვენგერი მოახერხებს და გუნდს ამ თვისებას შესძენს, "მეთოფეებს" ტიტულის მოგების ისეთივე შანსი ექნებათ, როგორიც "ჩელსის" და "სიტის". ეს გუნდები თავიანთ მოსაგებს სწორედ სტაბილურობით იგებენ.

რომელ პოზიციაზე სჭირდება გაძლიერება ვენგერის გუნდს? ჩვენ შეგვიძლია, წარსულის აჩრდილები გამოვიხმოთ და ვთქვათ, რომ განსაკუთრებით სამი ფეხბურთელი დაამშვენებდათ "ემირეითსის" ბინადრებს.

დენის ბერგკამპი, პატრიკ ვიეირა და ტიერი ანრი - ეს ტრიო რომ ჰყავდეს, ვენგერი პრემიერლიგას მოიგებდა. იქნებ, ჩემპიონთა ლიგასაც... ახლა კი ოცნებას ცოტა ხნით დავეხსნათ და რეალობას დავუბრუნდეთ.

ვენგერს აუცილებლად სჭირდება ერთი მცველი, ერთი ნახევარმცველი და ერთი ფორვარდი. ყველა კლასიანი ფეხბურთელი. ეს შემადგენლობის სიღრმეს გაზრდის და კონკურენციასთან ერთად, ლონდონელთა თამაშში მეტ სტაბილურობასაც შეიტანს.

საერთოდ, ჟოზე მოურინიო ძალიან იშვიათად ცდება. განსაკუთრებით, ეს იმ საფეხბურთო ამბებს ეხება, რომლებიც მინდვრის გარეთ ვითარდება. შეცდომა იყო ეს თუ არა, დრო გვიჩვენებს, მაგრამ ფაქტია - მოურინიომ ვენგერს მსოფლიოს ერთ-ერთი საუკეთესო მეკარე, პეტრ ჩეხი დაუთმო.

"ჩელსი" ჩეხის გაშვებით არ დაიქცევა. პორტუგალიელმა სპეციალისტმა არჩევანი ტიბო კურტუას სასარგებლოდ გააკეთა. ტიბო ახალგაზრდაა და პროგრესირებს. ჩეხი ახალგაზრდა აღარაა, მაგრამ მისგან რეგრესი შორსაა. დღევანდელ ფეხბურთში უფრო ახალგაზრდებს ენდობიან.

სამაგიეროდ, ჩეხი ძალიან გააძლიერებს "არსენალს". გასაგებია, რომ შჩესნი და ოსპინა კარგი მეკარეები არიან, მაგრამ ჩეხი საუკეთესოა. მას შეუძლია, არნახული "სეივი" შემოგვთავაზოს და ამით დამაჯერებლობა გადასდოს მთელ დაცვას. ჩვენ გვინახავს "ჩელსის" არაერთი მატჩი, რომელიც ჩეხ მეკარეს პირადად მოუგია.

დასკვნა: ვენგერმა მაგრად იმარჯვა. მან გუნდისათვის შეუდარებელი შენაძენი გააკეთა და "არსენალი" აუცილებლად მოიმკის ამ ტრანსფერის შედეგს...

მოვლენებს წინ უნდა გავუსწროთ და ვთქვათ, რომ "არსენალი" ვერც ვერაფერს მოიგებს, თუ ამ პრობლემას არ მიხედა. ალბათ, მიხვდით, საითაც ვუარაკებთ. ვგულისხმობთ ბოლო წლებში დამკვიდრებულ ტრადიციას. ამ ტრადიციის მიხედვით, ინგლისურ კლუბს ყველა მნიშვნელოვანი თამაშის წინ თუ ნაკლებმნიშვნელოვან მატჩამდე რამდენიმე წამყვანი ფეხბურთელი ჰყავს დაშავებული.

არ ვიცით, ეს ვის ან რას უნდა დაბრალდეს, თუმცა ვეჭვობთ, ეს შემთხვევითობა იყოს. ასეა თუ ისე, "არსენალი" თავისი დიდი პოტენციის ნახევარს მაინც კარგავს. რაღა შორს წავიდეთ, სწორედ ამ მიზეზით ვერ ხერხდება ორი უნიჭიერესი ფეხბურთელის, უოლკოტისა და ოქსლეიდ-ჩემბერლენის უდიდესი საფეხბურთო ნიჭის მინდორზე გადატანა.

ამის ზუსტი სტატისტიკა არ არსებობს, მაგრამ მაინც საინტერესო იქნებოდა დათვლა - "არსენალის" რამდენმა ფეხბურთელმა მიიღო ტრავმა გასულ სეზონში. არ არსებობს იმიტომ, რომ ბევრი მათგანი ტრავმირებულიც კი თამაშობდა და აქედან გამომდინარე, ბევრით ვერაფრით ეხმარებოდა გუნდს.

ვენგერს მოსწყინდა ამდენი კრიტიკა. ის კარსმომდგარ სეზონში ყველაფერს გააკეთებს საიმისოდ, რომ პრემიერლიგა მოიგოს. ჩემპიონთა ლიგის მოგება კიდევ უკეთესი იქნებოდა, მაგრამ ჩვენი აზრია - ეს ის ძეხვია, რომელსაც ლონდონელები ვერ შესწვდებიან...

შეიძლება, არსენ ვენგერი გიყვარდეს ან არ გიყვარდეს. შეიძლება, ნერვებს გიშლიდეს მისი სატრანსფერო პოლიტიკა, მაგრამ ფაქტია - ვენგერის ფეხბურთი არის ფეხბურთი, რომელიც არავის ჰგავს. მისი გაწვრთნილი გუნდი სხვა არც ერთი მწვრთნელის დამოძღვრილში არ აგერევა.

აქედან გამომდინარეა, რომ ფრანგს ძალიან ბევრს პატიობენ. ბევრი იმედგაცრუებისა და უშედეგობის მიუხედავად, ის მაინც მილიონების კერპი და მსოფლიოს ერთ-ერთი საუკეთესო დამრიგებელია.

ვიყოთ სამართლიანები - ის, რაც ვენგერმა "არსენალისათვის" გააკეთა, ბევრ მწვრთნელს არ გაუკეთებია თავისი გუნდისათვის. იმიტომ უყვართ ფრანგი სერ ალექს ფერგიუსონსა და ფაბიო კაპელოს, პეპ გვარდიოლასა და იუპ ჰაინკესს...

"არსენალში" ახლა ბევრი კარგი ფეხბურთელია. ამის მიუხედავად, გუნდს სჭირდება ლიდერი, რომელიც ბიჭებს დიდი მიზნებისაკენ გაუძღვება. ვინ შეიძლება იყოს ასეთი?!

გავრისკავთ და ვიტყვით - თუ ბოლომდე გამოავლენს თავის პოტენციალს, მაშინ გუნდის ლიდერობა ნაღდად შეუძლია ჩილელ ალექსის სანჩესს. სანჩესის კლასი ეჭვქვეშ არასოდეს დამდგარა, მათ შორის, არც "ბარსელონაში". გასული სეზონის მეტი წილი სამხრეთამერიკელმა შესანიშნავად ითამაშა, მაგრამ იყო ჩავარდნა და ეს ჩავარდნა ზუსტად იმ დროს დაემთხვა, როცა "არსენალი" ვერ ბრწყინავდა.

თუ "არსენალი" ტიტულის მოპოვებისთვის ბოლომდე იბრძოლებს, აუცილებლად მოუმატებს გერმანელი ვარსკვლავი მესუთ იოზილი. ეს ორი გარემოება ერთმანეთისგან დაუშორებელია.

"რეალიდან" წასვლის შემდეგ მესუთი თითქოს საკუთარ აჩრდილს ჰგავს. იქმნება შთაბეჭდილება, რომ ფეხბურთელს გული ამოაცალეს და ახლა იგი უგულოდ თამაშობს. ამ შემთხვევაში თავისი სიტყვა ვენგერმა უნდა თქვას. სწორედ მან უნდა მოძებნოს მოტივაცია უნიჭიერესი ალემანისათვის...

ჩვენი წერილი ფორმალურად აქ მთავრდება, მაგრამ უპრიანია, იგი სეზონის ბოლოს დასრულდეს, რადგან სწორედ მაშინ გამოჩნდება, რას მოიმკის "არსენალი".

ვისურვოთ, რომ ძველმა თოფმა კიდევ დაიქუხოს. ვენგერი ამას იმსახურებს...

ყოველდღიური სპორტული გაზეთი "ლელო"