ჭირვეული ვარსკვლავი: გიჟი მარიოს გზაგასაყარი

მარიო ბალოტელი - თანამედროვე ფეხბურთის ყველაზე კოლორიტული პერსონაჟი. მარიო ბალოტელი - ბევრი დღესაც მიიჩნევს, რომ მსოფლიოში ის ერთ-ერთი საუკეთესოა. ბალოტელის კარიერაში ახლა უმნიშვნელოვანესი პერიოდი დგას - ის ან დარჩება "ლივერპულში", ან სხვა გზას აირჩევს. ეს "სხვა გზა" , სავარაუდოდ, იტალიაში დაბრუნებაა.

ამ კითხვაზე პასუხის გაცემა ძალიან ძნელია, მაგრამ ფაქტია - მარიო ბალოტელისათვის დასრულებული სეზონი "ლივერპულში" ტანჯვა იყო და მეტი არაფერი. ეს ტანჯვა დაიწყო იმ დღიდან, როცა ექსცენტრიკულმა ფეხბურთელმა "ენფილდის" კარი შეაღო და გაგრძელდა სეზონის ბოლომდე.

შესაძლო მიზეზების პოვნა იოლი არ არის. საერთოდ, იოლი არაფერია, როცა საქმე ბალოტელის ეხება. ჩვენ მაინც ვცადოთ, რადგან, როგორც წესი, ამ ცხოვრებაში უმიზეზოდ არაფერი ხდება.

მიზეზი პირველი: ბალოტელიმ ვერ გაუძლო წნეხს. მას "ლივერპულში" უნდა შეეცვალა "ბარსელონაში" წასული ლუის სუარესი. როცა ლუისი კატალონიურ გრანდში გაიყიდა, გულშემატკივრებმა იმედგაცრუება ვერ დაფარეს. ჩვენც გვახსოვს - ურუგვაელი ძალიან ხშირად მარტო იგებდა თამაშებს.

ბალოტელი არ არის სუარესი და მისი თამაშის სტილი სამხრეთამერიკელისაგან განსხვავებულია. რა თქმა უნდა, მარიოს ვერ გავამართლებთ. მას ნებისმიერ შემთხვევაში უკეთ უნდა ეთამაშა, მაგრამ მივიღეთ შედეგი, რომელსაც ვერაფერი შეცვლის.

მეორე მიზეზი თვალნათლივ ჩანდა მთელი სეზონის განმავლობაში. იტალიელი ფეხს და გნებავთ, ტვინს ვერ უწყობდა პრემიერლიგის უსწრაფეს ტემპს. ეს მით უფრო გასაკვირია, რომ მარიომ ჯერ კიდევ სულ პატარამ ითამაშა პრემიერლიგაში და შეეჩვია იქაურ მოთხოვნებს.

მესამე მიზეზი შეიძლება იყოს ფეხბურთელის შინაგანი სამყარო. ზოგადად, ბალოტელის თბილად შეხვდნენ პარტნიორები და ქომაგები, მაგრამ იტალიელი იმდენად თვითმყოფადი ნატურაა, რომ ძალიან ჭირს პროგნოზირება, რამ შეიძლება გაანაწყენოს ის, აუცრუოს გული...

ამ ეტაპზე ერთადერთ გამოსავლად ბალოტელის ინგლისიდან წასვლა ჩანს. "ლივერპულის" მთავარი მწვრთნელი ბრენდან როჯერსი წინა სეზონში თითქმის ბოლომდე ენდობოდა მარიოს.

უნდა ითქვას სიმართლე - მაშინ მას სხვა გამოსავალი, უბრალოდ, არ ჰქონდა. ახლა "ენფილდზე" სხვა სიტუაციაა. "ლივერპულმა" იყიდა კრისტიან ბენტეკე. ბელგიელი პრემიერლიგის ერთ-ერთ საუკეთესო ფორვარდად ჩამოყალიბდა. თქმა არ უნდა, ამბიციები მას არც "ლივერპულში" მოაკლდება და ისიც ცხადია, რომ სათამაშო დროსაც გვარიანად მიიღებს.

როცა ბალოტელი "ლივერპულში" მივიდა, მაშინ მის თამაშზე ძალიან ბევრი იყო დამოკიდებული. ახლა როჯერსი ისე ააწყობს ტაქტიკურ სქემას, რომ მარიო გუნდისათვის ძველებურად მნიშვნელოვანი აღარ იყოს.

სამართლიანობა მოითხოვს აღინიშნოს, რომ ბალოტელის კრიზისში მწვრთნელს ნამდვილად ვერ დავადანაშაულებთ. მეტიც, როჯერსი ბალოტელის ენდობოდა მაშინაც კი, როცა ბევრის მოთმინების ფიალა უკვე ავსებული ჩანდა.

ბოლოს და ბოლოს, ყველაფერს აქვს დასასრული, მათ შორის - "ლივერპულის" დამრიგებლის მოთმინებასაც. კიდევ ერთი ასეთი სეზონი და როჯერსს, სავარაუდოდ, კარისაკენ მიუთითებენ, რაც მისთვის უდიდესი დარტყმა იქნება.

მართალია, ბალოტელიმ ვერ გაამართლა "ლივერპულში", მაგრამ უნდა შევთანხმდეთ, რომ იგი ნებისმიერი იტალიური გუნდისათვის სერიოზულზე სერიოზული ძალა იქნება.

მისი გადაბირების სურვილი უკვე გამოთქვეს "ლაციომ" და "ბოლონიამ". განსაკუთრებით მნიშვნელოვანია "ლაციოს" ინტერესი. რომაელები სულ მალე ჩემპიონთა ლიგაზე ითამაშებენ და ბალოტელის საშუალება ექნება, ევროპის უმთავრეს საკლუბო ტურნირზე დაამტკიცოს თავისი შესაძლებლობები.

სრულიად არ არის გასაკვირი, რომ "ლივერპულს" იტალიელი ვარსკვლავის გაყიდვა უნდა. ჯერ ერთი, ამ გადასახედიდან ენფილდელთათვის მარიო აბსოლუტურად ზედმეტია. არის მეორე მომენტიც, რომელზეც ღიად არავინ საუბრობს, თუმცა "ლივერპულს" ვერც ამ შემთხვევაში გავამტყუნებთ.

არცერთი კლუბისათვის არ არის სასურველი, როცა ძალიან მაღალანაზღაურებადი ფეხბურთელი სკამზე გიზის. ბალოტელის გაყიდვა ინგლისურ გრანდს დიდ ფულს მოუტანს და ეს ფული მათ საშუალებას მისცემს, გააძლიერონ პრობლემატური პოზიციები.

მით უმეტეს, ბალოტელის ამჟამინდელ გუნდში მათი ნაკლებობა სულაც არ არის. მეტიც, თუ ენფილდელებს უნდათ, რომ მომავალ სეზონში ინგლისის ჩემპიონობისათვის იბრძოლონ, მათ ეს აუცილებლად უნდა გააკეთონ.

რას-რას და, მარიო ბალოტელი ამბიციების ნაკლებობას ნამდვილად არ უჩივის. ყველას გვახსოვს მისი ფრთიანი ფრაზა, ფეხბურთს ჩემზე უკეთესად მხოლოდ ლიონელ მესი თამაშობსო.

ამ სიტყვებზე იქნებ ზოგს გაეცინოს კიდეც, მაგრამ ფაქტი ისაა, რომ მარიომ ეს თქვა. ფაქტია ისიც, რომ მის ამ ნააზრევს წინ დიდი გამოცდა ელის. თუ სასწრაფოდ არ გამოცოცხლდა სუპერმარიო, მას "მზის ქვეშ" ადგილის დაკარგვის საშიშროება ემუქრება.

ცნობილია: დღევანდელ ფეხბურთში მხოლოდ ნიჭით ფონს ვერ გახვალ, თუ ჭკუა არ გიჭრის და ამ ნიჭს შრომისმოყვარეობა არ მოსდევს. ბალოტელის ეს თვისებები აკლია, ყოველ შემთხვევაში, ჯერ.

მოტივაციად კი მარიოს თუნდაც იტალიის ნაკრებში დაკარგული ადგილისათვის ბრძოლა გამოადგება. "სკუადრა აძურაში" ის ცოტა ხნის წინ უპირველესი ვარსკვლავი იყო, ახლა კი ეროვნულ გუნდში აღარც ეძახიან.

ყოველდღიური სპორტული გაზეთი "ლელო"