ევროპის ჩემპიონატის შესარჩევი ეტაპის ეგიდით, 10 და 13 ოქტომბერს იტალიის ნაკრებს ორი უაღრესად მნიშვნელოვანი მატჩი ელოდება. "სკუადრა აძურა" ჯერ ბაქოში ჩავა, სადაც აზერბაიჯანის ნაკრებს დაუპირისპირდება, სამი დღის შემდეგ კი ნორვეგიას უმასპინძლებს. შესარჩევი ეტაპის ჯგუფური ტურნირის დასრულებამდე სწორედ ეს ორი ტურია დარჩენილი, იტალიის ნაკრები პირველ ადგილზეა და თუ ამ ორი მატჩიდან ერთი მაინც მოიგო, ევროპის ჩემპიონატის საგზურს მოიპოვებს.
არადა, იტალიელებს საქმე უფრო რთულად ჰქონდათ და ამ ორ პაექრობაში 4 ქულა სჭირდებოდათ მიზნის მისაღწევად, მაგრამ მას შემდეგ, რაც უეფას სადისციპლინო კომიტეტმა ხორვატიას
გუშინდელ ნომერში გამცნეთ, რომ ანტონიო კონტემ იმ 27 ფეხბურთელის გვარი დაასახელა, რომლებსაც მოახლოებულ პაექრობებში დაეყრდნობა. სიაში განსაკუთრებულ სიახლეებს ვერ ვხედავთ, თუმცა რამდენიმე ფაქტორზე მაინც ღირს ყურადღების გამახვილება...
პირლო და ჯოვინკო ოკეანის გაღმიდან
ანტონიო კონტე კვლავაც სწყალობს ამერიკის ლიგაში მოასპარეზე ფეხბურთელებს. განაცხადშია ანდრეა პირლო "ნიუ იორკ სიტიდან" და სებასტიან ჯოვინკო "ტორონტოდან". პირლო ახალ გუნდს კარგად მოერგო, ფორმაშია და, როგორც კონტე აცხადებს, მისი იმედი ევროპის ჩემპიონატზეც ექნება. რაც შეეხება ჯოვინკოს, ერთ-ერთი საუკეთესოა ლიგაში, გოლებიც ბლომად გააქვს და როგორც "აძურას" თავკაცი ამბობს, იმსახურებს ეროვნულ გუნდში ასპარეზობს.
ბერარდის დებიუტი, მონტის დაბრუნება
კონტეს განაცხადში ერთი დებიუტანტია და ის დომენიკო ბერარდი გახლავთ. "სასუოლოს" 21 წლის ფორვარდი ერთ-ერთი ყველაზე პერსპექტიული ფეხბურთელია იტალიაში, შესანიშნავად ასპარეზობს და ბევრი მის გამოძახებას აქამდეც ელოდა. ასევე, რიკარდო მონტოლივოს გამოძახება უნდა გამოვარჩიოთ, რომელიც ეროვნულ გუნდში დიდი ხნის პაუზის შემდეგ დაბრუნდა. მონტოლივომ მძიმე ტრავმა მოიშუშა, "მილანის" ძირითად შემადგენლობაში დაიბრუნა ადგილი და კონტეს ყურადღებაც მიიპყრო. მონტიმ მოკლე კომენტარი გააკეთა და განაცხადა, რომ ეროვნულ გუნდში დაბრუნება მისთვის უდიდესი სტიმულია.
9 თავდამსხმელი და სავარაუდო თერთმეტეული
ანტონიო კონტემ სიაში 9 თავდამსხმელი ჩასვა, რამაც იტალიაში ბევრი გააკვირვა. მართალია, სია გაფართოებულია და ბუნებრივია, რომ სამატჩო განაცხადში ყველა ვერ მოხვდება, მაგრამ ამდენი შემტევი იტალიურ სპორტულ პრესაში მაინც განხილვის საგანი გახდა. აქვე, მათი ჩამონათვალი: დომენიკო ბერარდი, ანტონიო კანდრევა, მარტინს ედერი, სტეფან ელ შაარავი, სებასტიან ჯოვინკო, ლორენცო ინსინიე, გრაციანო პელე, ფაბიო კვალიარელა, სიმონე ძაძა. "გაძეტა დელო სპორტის" ვარაუდით, კონტე 4-3-3 ტაქტიკას აირჩევს და აზერბაიჯანს ფლანგებიდან შეუტევს. სავარაუდოდ, ფრთებზე ანტონიო კანდრევა და ლორენცო ინსინიე გაირჯებიან, ცენტრფორვარდის პოზიციაზე კი გრაციანო პელეს ვიხილავთ. შუა ხაზში ანდრეა პირლოს, მარკო ვერატის და მარკო პაროლოს ტრიომ უნდა ითამაშოს, დაცვაში კი შემდეგ ოთხეულს ელიან: მატეო დარმიანი, ლეონარდო ბონუჩი, ჯორჯო კიელინი, მატია დე შილიო. ბუნებრივია, კარში ჯანლუიჯი ბუფონი იდგება.
ანტონიო კონტე (იტალიის ნაკრები): "მიზნამდე ერთი ნაბიჯია და დიდი იმედი მაქვს, რომ ევროპის ჩემპიონატის საგზურს ბაქოში მოვიპოვებთ. მთავარია, რომ მეტოქე შევაფასოთ სწორად და ბოლომდე დავიხარჯოთ. აზერბაიჯანი ტექნიკურ ფეხბურთს თამაშობს და იოლად არაფერს დათმობს, თუმცა ჩვენ ჩვენი მისია გვაქვს - იტალიამ ევროპირველობაზე უნდა ითამაშოს".
ყოველდღიური სპორტული გაზეთი "ლელო"
