პრემიერლიგის ასიანთა კლუბი: დეფო გოლებს აგროვებს და უოტმორს აქებს

ჯერმინ დეფო "სანდერლენდის" 21 წლის ფეხბურთელს, დანკან უოტმორს გარეთ ბეილს ადარებს და მიაჩნია, რომ უოტმორს დიდი მომავალი აქვს.

დანკანს, როგორც ფლანგის მოიერიშედ, ასევე ცენტრალურ თავდამსხმელად შეუძლია თამაში და მართლაც ნიჭიერია. მანჩესტერში დაბადებული მოთამაშე 4 წლის განმავლობაში "იუნაიტედის" აკადემიაში ირიცხებოდა, მაგრამ იქ დაიწუნეს და "ოლტრინგემში" გადაბარგდა. სწორედ ამ გუნდში ჰქონდა პროფესიონალური დებიუტი. 2013 წელს იგი "შავმა კატებმა" შეიძინეს, 2014 წელს "ჰიბერნიანში" იყო განათხოვრებული, ახლა კი "სანდერლენდის" შემადგენლობაში იმკვიდრებს თავს. მას ინგლისის 20-წლამდელთა და 21-წლამდელთა ნაკრებშიც აქვს ნათამაშები.

"ნახევრად ხუმრობით თუ ვიტყვით, ის ბეილს მაგონებს. როდესაც გარეთი "ტოტენჰემში" გამოჩნდა, ოღონდ კი ბურთი ჩაეგდო და გაქცეულიყო. დანკანიც ასეა, ის ძალიან კარგი ბიჭია. არა მგონია, ახალი კონტრაქტის შესახებ ნერვიულობდეს და ამან შეცვალოს. მას, უბრალოდ, ფეხბურთის თამაში და გუნდისთვის სარგებლის მოტანა უნდა. თუ უოტმორი ბეილის დონეზე ავა, ეს ფანტასტიკური იქნება. ის კლუბის მომავალია" - აღნიშნა დეფომ.

იქამდე კი "სანდერლენდს" სარგებელი თავად ვეტერანმა მოუტანა, მოაგებინა რა "შავ კატებს" "კრისტალ პალასთან" მძიმე მატჩში. გარდა იმისა, რომ დეფომ "სანდერლენდს" უმნიშვნელოვანესი 3 ქულა "ჩაუჯიბა", პირადად მისთვის ეს გოლი 132-ე იყო პრემიერლიგაში და ყველა დროის ბომბარდირთა დავაში იგი მე-11 ადგილზეა. რობინ ვან პერსიმდე, ანუ ათეულში შესვლამდე 12 ბურთიღა რჩება.

"33 წლის ვარ, მაგრამ ასაკი ჯერჯერობით ხელს არ მიშლის. ასე რომ იყოს, ისე ვერ ვითამაშებდი, როგორც ეს "კრისტალ პალასთან" შევძელი. თუ არ მათამაშებენ, არც ამაზე ვბრაზდები, პირიქით, საკუთარ თავზე უფრო მეტს ვმუშაობ, რადგან თუ ფორმაში არ იქნები, როდესაც შანსს მიიღებ, ამ შანსს ვერც გამოიყენებ" - განაცხადა დეფომ.

სხვათა შორის, ეს სემ ელარდაისის საიუბილეო, 150-ე მოგება იყო პრემიერლიგაში, მასზე მეტი გამარჯვება მხოლოდ 4 მწვრთნელს აქვს მოპოვებული - სერ ალექს ფერგიუსონს (528), არსენ ვენგერს (422), ჰარი რედნაპს (236) და დევიდ მოიესს (190).

ფეხბურთელები, რომლებსაც პრემიერლიგაში 100 და მეტი გოლი აქვთ გატანილი:

ფეხბურთელი გოლი
ალან შირერი 260
ენდი კოული 187
უეინ რუნი 187
ფრენკ ლამპარდი 177
ტიერი ანრი 175
რობი ფაულერი 163
მაიკლ ოუენი 150
ლეს ფერდინანდი 149
ტედი შერინგემი 146
რობინ ვან პერსი 144
ჯერმინ დეფო 132
ჯიმი ფლ. ჰასელბაინკი 127
რობი კინი 126
ნიკოლა ანელკა 125
დუაით იორკი 123
სტივენ ჯერარდი 120
იან რაიტი 113
დიონ დაბლინი 111
ემილ ჰესკი 110
რაიან გიგსი 109
პოლ სქოულზი 107
დარენ ბენტი 106
დიდიე დროგბა 104
მეტიუ ლე ტისიე 100

(იბეჭდება მცირე ცვლილებით)
ყოველდღიური სპორტული გაზეთი "ლელო"