ლიგის თასი. ფინალი: "სიტიმ" პენალტები უკეთ დაარტყა [VIDEO]

"სიტიმ" და "ლივერპულმა" დროებით სხვა ყველაფერი გვერდზე გადადეს და "უემბლიზე" 86 ათასზე მეტი მაყურებლის თვალწინ ინგლისის ლიგის თასი გაათამაშეს.

ცოტა სხვადასხვა კუთხით, მაგრამ ჯამში ორივე გუნდს პრობლემური სეზონი აქვს და ტიტული არ აწყენდათ. ბუნებრივია, ორივეს შემადგენლობა საბრძოლო იყო და არც თამაში გამოვიდა ცუდი.

იურგენ კლოპს დაცვაში ჰქონდა საკადრო პრობლემები, ცენტრალურ მცველად ლუკას ლეივას უწევდა თამაში და თან, მალევე მამადუ სახოც დაშავდა.

"ქალაქელები" ცოტა უკეთ გამოიყურებოდნენ და მეორე ტაიმის დებიუტში დაწინაურდნენ კიდეც. ფერნანდინიომ სერხიო აგუეროს პასის მერე მახვილი კუთხიდან დაარტყა, ხოლო სიმონ მინოლეს იღლიაში გაუძვრა ბურთი.

გათანაბრება მერსისაიდელებმა ბოლოსკენ შეძლეს, როდესაც შორეულ ძელთან ჩასაფრებულმა ადამ ლალანამ ძელს გაარტყა, დამატებაზე კი ფილიპე კოუტინიომ ივარგა.

დამატებითი დრო დაძაბული გამოდგა და საქმე პენალტებამდე მივიდა, სადაც "ლივერპულმა" ფანებს მოლოდინი გაუცრუა... არადა, ყველაფერი კარგად დაიწყო, ემრე ჯანმა გაიტანა, ხოლო ფერნანდინიომ - ვერა. თუმცა მერე ლუკასმა, კოუტინიომ და ლალანამ თერთმეტმეტიანები გააცუდეს, ხოლო ხესუს ნავასმა, სერხიო აგუერომ და იაია ტურემ გაიტანეს.

ასე რომ, პელეგირინი "სიტის" ერთი ტიტულით მაინც დაემშვიდობება. ჩილელის გუნდმა ლიგის თასი მეოთხედ მოიგო, ბოლოს მანჩესტერელებს ეს 2013/2014 წლების სეზონში გაეკეთებინათ. "ლივერპულმა" კი ახლა მთელი ყურადღება ევროპალიგაზე უნდა გადაიტანოს.

ლივერპული-სიტი 1:1 (1:3-პენ.)
გოლები: 0:1 ფერნანდინიო (49), 1:1 კოუტინიო (83)
ლივერპული (4-4-1-1): მინოლე - კლაინი, ლუკასი, სახო (25. კ. ტურე), მორენო (72. ლალანა) - მილნერი, ჰენდერსონი, ჯანი, კოუტინიო - ფირმინო (80. ორიჯი) - სტარიჯი
სიტი (4-2-3-1): კაბალიერო - სანია (91. საბალეტა), კომპანი, ოტამენდი, კლიში - იაია ტურე, ფერნანდო (91. ნავასი) - ფერნანდინიო, სილვა (110. ბონი), სტერლინგი - აგუერო
გაფრთხილება: კლაინი, მორენო, კოუტინიო, ჯანი – ფერნანდო, კომპანი, ოტამენდი
კუთხური: 5-9 ჯარიმა: 18-15 თამაშგარე: 8-0 კარში დარტყმა: 16(4)-20(7) ბურთის ფლობა: 61%-39%
მაყურებელი: 86 206

ყოველდღიური სპორტული გაზეთი "ლელო"