პრემიერლიგა. XXIX ტურის წინ: "ლივერპული" არასოდეს არის საჩუქარი

6 მარტს ინგლისის პრემიერლიგის XXIX ტურის ორი დარჩენილი მატჩი გაიმართება.

აგერ უკვე 11 ტურია, "კრისტალ პალასი" ვერ იგებს და გულმოდგინედ მიექანება გასავარდნი ზონისკენ, ცოტაც და არწივები გადარჩენისთვის ბრძოლაში ჩაებმებიან, რასაც სეზონის სტარტზე ვერ წარმოვიდგენდით. მეტოქედ ალან პარდიუს "ლივერპული" ეყოლება.

იურგენ კლოპს გრანდებთან და ლიდერებთან თამაში კარგად გამოსდის, მაგრამ მეორე კალათის გუნდებთან უჭირს, თან "ენფილდის" ბინადრებმა აქცენტი რეალურად ევროპალიგაზე უნდა გააკეთონ.

მეორე მხრივ, თუ გუნდს თავდაჯერების დაბრუნება და ბალანსის პოვნა სურს, კარგი სერია უნდა გადააბას. ერთი სიტყვით, მერსისაიდელებმა შეიძლება, თავი ბოლომდე არ მოიკლან, მაგრამ არც საჩუქარს გაუკეთებენ "პალასს".

ლუი ვან გაალმა გაიაზრა, რომ სწორედ მაშინ, როდესაც, თითქოს, იღბლიანი ტალღა დაიჭირა და ყველაფერი კარგად წავიდა, ის ტონი პულისის "ვესტ ბრომვიჩს" უნდა შეხვდეს, თანაც გასვლაზე… ეს კარგი ამბავი ნამდვილად ვერ არის.

ერთადერთი კარგი ამ ისტორიაში "წითელი ეშმაკებისთვის" ისაა, რომ "ალბიონი" უკვე გემრიელად გაექცა გასავარდნ ზონას და ქვეცნობიერად ამან შეიძლება, ფეხბურთელებზე მაინც იმოქმედოს, მიუხედავად იმისა, რომ პულისი ყველა მატჩისთვის კბილებს ალესინებს და გეშავს თავისიანებს.

"მეტოქემ ნამდვილად ბევრი პრობლემა შეგვიქმნა და ბევრი მომენტი ჰქონდა, მაგრამ მეტოქეების ფეხის დაცდენის გათვალისწინებით, ეს აუცილებლად მოსაგები მატჩი იყო, და მიხარია, რომ მოვიგეთ" - აღნიშნა ვან გაალმა.

XXIX ტური
კვირა. 6 მარტი
კრ. პალასი-ლივერპული 17:30
დისკვალიფიკაცია: არავინ
ტრავმა: პანჩონი, აპია, მაკარტური - ლუკასი, სახო, როსიტერი, გომესი, ინგსი
ბოლო 6 მატჩი
+0 =2 -4 +3 =1 -2
ურთიერთშეხვედრები
სულ 46 თამაში: +13 =11 -22 (46-88)

ვესტ ბრომვიჩი-მანჩესტერ იუნაიტედი 20:00
დისკვალიფიკაცია: არავინ
ტრავმა: ბრანტი, ევანსი, მორისონი - ლავი, კინი, სმოლინგი, ბორტვიკ-ჯექსონი, რუნი, ჯონსი, ფელაინი, იანგი, შვაინშტაიგერი, შოუ, ვალენსია
ბოლო 6 მატჩი
+2 =3 -1 +3 =1 -2
ურთიერთშეხვედრები
სულ 111 თამაში: +36 =26 -49 (171-211)

(იბეჭდება მცირე ცვლილებით)
ყოველდღიური სპორტული გაზეთი "ლელო"