31 მარტს, იტალიის ფეხბურთის ფედერაციის პრეზიდენტმა ჯანკარლო ტავეკიომ ბრიფინგი გამართა და მეტად საინტერესო კომენტარი გააკეთა, რომელმაც აპენინური სპორტული პრესა მოიცვა. სანამ ტავეკიოს გადავცემთ სიტყვას, აღვნიშნოთ, რომ ბოლო დღეებში "იუვენტუსს" და ფედერკალჩოს შორის დაპირისპირება გამწვავდა, რაც კლაუდიო მარკიზიოს ტრავმამ განაპირობა და შემდეგ სხვა თემებშიც გადაიზარდა.
იტალია-ინგლისის მატჩამდე, სპეციალურად ამ პაექრობის წინ, "იუვენტუს არენაზე" შესასვლელთან ახალი აბრა გაჩნდა: "იუვე - 32 სკუდეტო".
მოგეხსენებათ, კალჩოპოლის შემდეგ ტურინულ გრანდს ორი სკუდეტო ჩამოართვეს და დღეს "ვეკია სენიორა" ქვეყნის 30-გზის ჩემპიონად ითვლება; თუმცა, თვითონ ტურინელები მიიჩნევენ,
მოკლედ, ეს აბრა ფედერკალჩოს ბოსტანში ნასროლი კენჭია.
გარდა ამისა, "იუვენტუსის" მესვეურებს სასამართლოში სარჩელი აქვთ შეტანილი და იტალიის ფეხბურთის ფედერაციისგან, კომპენსაციის სახით, 443 მილიონ ევროს ითხოვენ. ტურინელები მიიჩნევენ, რომ 2006 წელს მათი სერია B-ში დაქვეითება არასწორი იყო, რადგან საქმე გამოძიებული არ გახლდათ და უდანაშაულობის პრეზუმპცია დაირღვა.
კალჩოპოლის საქმე სულ რამდენიმე დღის წინ დაიხურა, "იუვე" კი პროცესის დაწყებიდან მალევე დასაჯეს და შემდეგ უამრავი ახალი გარემოება გამოიკვეთა. არის ალბათობა, რომ ტურინელებმა ეს საქმე მოიგონ და ფედერკალჩოს პრეზიდენტის, ჯანკარლო ტავეკიოს კომენტარი ამაზე მეტყველებს:
"ჩემი სურვილია, რომ იტალიის ფეხბურთის ფედერაციასა და "იუვენტუსს" შორის კონფლიქტი დასრულდეს და ჩვენ შორის აღარ იყოს არც ერთი სადავო საკითხი. "სკუადრა აძურა" ინგლისს სწორედ ტურინში მასპინძლობს და ეს "ვეკია სენიორას" მესვეურებთან თანამშრომლობით შევძელით.
მზად ვარ, ფედერკალჩოს საგანგებო სხდომა მოვიწვიო, რათა კალჩოპოლის პროცესზე ვიმსჯელოთ და "იუვენტისისთვის" ჩამორთმეული სკუდეტოების დაბრუნების საკითხი დავაყენოთ.
დიახ, ეს სულაც არ არის დახურული თემა და არც ისაა გამორიცხული, რომ ტურინელებმა ორი ტროფეი დაიბრუნონ. ამასთან, ანიელებმა სარჩელი უნდა გამოიტანონ და საქმე შეწყვიტონ, თორემ ფედერკალჩოს 430 მილიონი ევროს გადახდა გააკოტრებს. ჩვენ შორის დაპირისპირება უნდა შეწყდეს და საქმე დაიხუროს".
ტავეკიოს განცხადებას ანიელების ოჯახის წარმომადგენელი, ამჟამად "ფიატის" კონცერნის ერთ-ერთი ხელმძღვანელი ჯონ ელკანი გამოეხმაურა - ეს ის ელკანია, რომელმაც კლაუდიო მარკიზიოს ტრავმის შემდეგ "აძურას" მწვრთნელ ანტონიო კონტეს ყველაზე მეტად შეუტია - ამჯერად, ელკანმა სხვა პათოსის კომენტარი გააკეთა:
"გავეცანი ტავეკიოს განცხადებას და სიმართლე გითხრათ, გაკვირვებული ვარ. ძალიან კარგია, რომ ფეხბურთის ფედერაციაში სკუდეტოების ჩამორთმევის თემის გადახედვას აპირებენ.
ყველამ კარგად ვიცით, რომ "იუვენტუსმა" ორივე საჩემპიონო ტიტული მოედანზე მოიპოვა და მაშინ, ისევე, როგორც დღეს, ჩვენ უძლიერესი გუნდი გვყავდა.
ვნახოთ, რა იქნება და როგორ, დღეს კი აღარ მსურს ამ თემაზე ლაპარაკი. ამ საღამოს "იუვენტუს არენაზე" ოჯახთან ერთად მივდივარ, რომ ჩვენს ნაკრებს ვუქომაგო - ამაყი ვარ, რომ "სკუადრა აძურა" ჩვენს სტადიონზე ითამაშებს და იმედია, მოვიგებთ კიდეც. დანარჩენზე მომავალში ვილაპარაკოთ".
იტალიურ საფეხბურთო სამყაროში ტავეკიოს კომენტარს არაერთგვაროვანი რეაქცია მოჰყვა - ფედერკალჩოს პრეზიდენტს ბევრი დაუპირისპირდა; კრიტიკოსთა აზრით, სენიორ კარლო სკუდეტოებით ვაჭრობს და მათ 443 მილიონ ევროზე ცვლის; უფრო სწორად, იმ ზარალის აცილებაზე, რომელიც იტალიის ფეხბურთის ფედერაციას შეიძლება მიადგეს.
ვნახოთ, როგორ განვითარდება მოვლენები...
ყოველდღიური სპორტული გაზეთი "ლელო"
ხელს სიამოვნებით რომ მოიფშვნეტს კაცი, ის მომენტია...
ეს ჟურნალია, კინო აწი იწყება! :)