სერია A. IV ტურის წინ: ნეაპოლში "ლაციოს" ელიან

სერია A-ს მეოთხე ტურის ცენტრალური მატჩი "სტადიო სან პაოლოზე" გაიმართება, სადაც "ნაპოლი" "ლაციოს" უმასპინძლებს. ყურადღების ცენტრში რჩება "იუვენტუსი", რომელიც "ჯენოას" ესტუმრება და პირველი სამი ქულის მოპოვებას შეეცდება. საინტერესო მატჩია ვერონაში, სადაც ლიდერები დაუპირისპირდებიან ერთმანეთს.

"ნაპოლის" და "ლაციოს" დაპირისპირება ტრადიციულად გახსნილი, სანახაობრივი და უხვგოლიანი გამოდის. წესით, მოახლოებული მატჩიც ასეთი უნდა იყოს, რადგან ორივე გუნდს დაცვაში უჭირს, შეტევაში კი გაცილებით უკეთ ირჯებიან.

"ნაპოლიმ" სეზონი ცუდად დაიწყო, სამ ტურში მხოლოდ ორი ქულა მოიპოვა და ბუნებრივია, რომ მხოლოდ გამარჯვებისთვის იბრძოლებს. თანაც, ნეაპოლელთა მწვრთნელ მაურიციო სარის კრიტიკოსები მოუმრავლდნენ და სამი ქულის აღება პირადად მისთვის უაღრესად მნიშვნელოვანია. შეტევაში მანოლო გაბიადინის და გონსალო იგუაინის ტანდემს ვიხილავთ, გამთამაშებლის პოზიციაზე კი ლორენცო ინსინიე გაირჯება.

წინა ტურში, "ლაციოს" ალესანდრო მატრიმ მოაგებინა და ის ერთადერთი ცენტრფორვარდი იქნება "ნაპოლის" წინააღმდეგ - სიღრმიდან მას ანტონიო კანდრევა, სტეფანო მაური და ფელიპე ანდერსონი დაეხმარებიან. წესით, დიდი ბრძოლა უნდა გაჩაღდეს და ისღა დაგვრჩენია, რომ დაველოდოთ მოვლენათა განვითარებას...

სავარაუდო შემადგენლობები
ნაპოლი (4-3-1-2): რეინა - მაჯო, ალბიოლი, კულიბალი, გულამი - ალანი, ჟორჟინიო, ჰამშიკი - ინსინიე - გაბიადინი, იგუაინი
ლაციო (4-2-3-1): მარკეტი - ბასტა, მაურისიო, ჯენტილეტი, რადუ - პაროლო, კატალდი - კანდრევა, მაური, ანდერსონი - მატრი

"ჯენოა" "იუვენტუსისთვის" უხერხული მეტოქეა, რადგან ტურინელებმა "სტადიო მარასიზე" სულ ახლო წარსულში ორი მწარე მარცხი იწვნიეს. მანჩესტერში გამარჯვების შემდეგ, მასიმილიანო ალეგრის შეგირდები კარგ ხასიათზე არიან და სერია A-შიც პირველი სამი ქულის მოპოვებას გეგმავენ.

თუ "გაძეტა დელო სპორტს" დავუჯერებთ, ამჯერად შეტევაში პაულო დიბალას, ხუან კუადრადოს და ალვარო მორატას ტრიოს ვიხილავთ, მარიო მანჯუკიჩი კი თადარიგში დარჩება. მარიოს მიკროტრავმა აქვს და შესაძლოა, ვერც მიიღოს თამაშში მონაწილეობა. ალეგრი შეგირდებს მოგებაზე გეშავს, დანარჩენს კი დრო გვიჩვენებს...

სატურნირო ცხრილით თუ ვიმსჯელებთ, ტურის ცენტრალური მატჩი ვერონაში გაიმართება, სადაც "კიევო" "ინტერს" უმასპინძლებს. მოკლედ, ერთმანეთის პირისპირ პირველი და მეორე გუნდები წარდგებიან, ეს კი ყოველთვის საინტერესოა.

"ინტერმა" სეზონი ბრწყინვალედ დაიწყო, ჯერ ქულა არ დაუკარგავს და შეეცდება, რომ ვერონაში მიჯრით მეოთხე გამარჯვება მოიპოვოს. რობერტო მანჩინი როტაციისგან თავს იკავებს და შეტევაში ნაცადი ტრიო ეყოლება: ივან პერიშიჩი, სტევან იოვეტიჩი, მაურო იკარდი. შეტევაში "კიევოც" კარგად ირჯება და მილანელ მცველებს ყურადღებით მართებთ თამაში ალბერტო პალოსკის და რიკარდო მეჯორინის წინააღმდეგ...

IV ტური
შაბათი. 19 სექტემბერი
უდინეზე-ემპოლი 20:00
დისკვალიფიკაცია: არავინ
ტრავმა: გილიერმე, ვიდმერი - მჭედლიძე, კოშიჩი, ბუჩერი
ურთიერთშეხვედრები
სულ 16 თამაში: +7=6-3, (20-14)

მილანი-პალერმო 22:45
დისკვალიფიკაცია: არავინ
ტრავმა: ანტონელი, მენეზი, ნიანგი, მექსე, ბერტოლაჩი - რიგონი, ბოლცონი, მორგანელა
ურთიერთშეხვედრები
სულ 26 თამაში: +12=5-9, (39-32)

კვირა. 20 სექტემბერი
კიევო-ინტერი 14:30
დისკვალიფიკაცია: არავინ
ტრავმა: რადოვანოვიჩი - დოდო, ბიაბიანი
ურთიერთშეხვედრები
სულ 26 თამაში: +4=7-15, (26-45)

ატალანტა-ვერონა 17:00
დისკვალიფიკაცია: პინილია (ატალანტა)
ტრავმა: ესტიგარიბია - ფარესი, ალფრედსონი
ურთიერთშეხვედრები
სულ 16 თამაში: +7=2-7, (19-19)

ბოლონია-ფროზინონე 17:00
დისკვალიფიკაცია: რიცო (ბოლონია)
ტრავმა: ძუკულინი, კრაფტი, ბრიგი, ჯაკერინი - კარლინი, გუჩერი, გორი
ურთიერთშეხვედრები
სულ 7 თამაში: +2=2-3, (7-7)

ჯენოა-იუვენტუსი 17:00
დისკვალიფიკაცია: რუბინიო (იუვენტუსი)
ტრავმა: პერინი, ანსალდი, გაპკე, მუნიოსი, კოსტა, პავოლეტი - ხედირა, მარკიზიო
ურთიერთშეხვედრები
სულ 22 თამაში: +2=7-13, (19-43)

რომა-სასუოლო 17:00
დისკვალიფიკაცია: ვრსალკო (სასუოლო)
ტრავმა: პიანიჩი, კაპრადოსი - ანტეი
ურთიერთშეხვედრები
სულ 4 თამაში: +2=2-0, (8-3)

ტორინო-სამპდორია 17:00
დისკვალიფიკაცია: არავინ
ტრავმა: ფარნერუდი, მაკსიმოვიჩი, გაცი, მორეტი, გასტონი, აველარი - კოდა, დე სილვესტრი, ზუკანოვიჩი
ურთიერთშეხვედრები
სულ 24 თამაში: +7=7-10, (24-29)

კარპი-ფიორენტინა 20:00
დისკვალიფიკაცია: ბადელი (ფიორენტინა)
ტრავმა: პაშუტი, მარონე, ინიგუესი, სპოლი - ბაკიჩი
ურთიერთშეხვედრები
სულ 0 თამაში: +0=0-0, (0-0)

ნაპოლი-ლაციო 22:45
დისკვალიფიკაცია: არავინ
ტრავმა: ვალდიფიორი - ჯორჯევიჩი, კლოზე, ბილია, დე ვრი
ურთიერთშეხვედრები
სულ 33 თამაში: +11=8-14, (42-52)

ბომბარდირები: 4 - მარტინს ედერი (სამპდორია); 3 - რიკარდო საპონარა (ემპოლი), ანტონიო ფლორო ფლორესი (სასუოლო), დანიელე ბაზელი (ტორინო), სტევან იოვეტიჩი (ინტერი), ალბერტო პალოსკი (კიევო)

ყოველდღიური სპორტული გაზეთი "ლელო"