სერია A: უჩვეულო სტარტი და დიდი ინტრიგა

სერია A-ს მე-6 ტურში ძალიან საინტერესოდ განვითარდა მოვლენები. მხოლოდ ის რად ღირს, რომ ლიდერმა და სკუდეტოსთვის ბრძოლაში ფავორიტად შერაცხილმა "ინტერმა" საკუთარ კედლებში "ფიორენტინასთან" 4:1 წააგო.

თავად ის ფაქტი, რომ ცხრილს სათავეში "ფიორენტინა" უდგას, უკვე ძალიან საინტერესოა. სადამდე შეიძლება გაგრძელდეს ფლორენციული გუნდის ლიდერობა და საერთოდ, ვის დარჩება სკუდეტო, როდესაც "იუვენტუსს" ღრმა კრიზისი აქვს, ასე დაბლაა და სხვა გუნდებიც არასტაბილურად ასპარეზობენ.

მე-6 ტური იმითაც გახლდათ გამორჩეული, რომ იტალიური ფეხბურთის სამმა გრანდმა ერთდროულად წააგო: "ინტერი" "ფიორენტინასთან" დამარცხდა, "მილანი" - "ჯენოასთან", ხოლო "იუვენტუსი" - "ნაპოლისთან". საგულისხმოა, რომ ასეთი რამ ბოლოს 21 წლის წინ მოხდა. ერთი ტურიც და შემდეგ უკვე სანაკრებო პაუზაა, ქვემოთ კი რამდენიმე საინტერესო კომენტარს გაგაცნობთ სერია A-ს მიმდინარე გათამაშებასთან დაკავშირებით.

კარლო ტავეკიო (იტალიის ფეხბურთის ფედერაციის პრეზიდენტი): "ძალიან საინტერესო ჩემპიონატს ვადევნებთ თვალს და იმედია, ბოლომდე ასე იქნება. პრაქტიკულად, შეუძლებელია იმის წინასწარმეტყველება, თუ რომელი გუნდი მოიგებს სკუდეტოს და რომელ გუნდებზე გადანაწილდება ევროსაგზურები. რაც მთავარია, ძალთა დაბალანსება სხვა გუნდების გაძლიერების ხარჯზე მოხდა და არა "იუვენტუსის" დასუსტების. ამაში ღრმად ვარ დარწმუნებული".

ჩეზარე პრანდელი: "ვფიქრობ, რომ სკუდეტოსა და ევროსაგზურებისთვის ბრძოლა ბოლო ტურამდე გაგრძელდება. უნდა ვაღიაროთ, რომ "იუვე" ძველებურად ძლიერი ვერ არის, მაგრამ ისიც ფაქტია, რომ სხვა გუნდები გაძლიერდნენ, მაგალითად, "ინტერი" და "ფიორენტინა". ფავორიტი სკუდეტოსთვის ბრძოლაში? - ამაზე საუბარი დღეს, პრაქტიკულად, შეუძლებელია. ჩვენ ვუყურებთ ერთ-ერთ ყველაზე საინტერესო სერია A-ს ამ საუკუნეში".

ფაბიო კაპელო: "სერია A-ში ვეღარ ვხედავთ იმდენ ვარსკვლავს, რამდენიც ადრე თამაშობდა, მაგრამ მიუხედავად ამისა, ჩვენი ჩემპიონატი ძალიან საინტერესოა. ვფიქრობ, რომ სკუდეტოს ის გუნდი მოიგებს, რომელიც ძალებს გადაანაწილებს სწორად.

შესაძლოა, ეს გუნდი "იუვენტუსიც" იყოს, რომელსაც არ შეიძლება, რომ მთელი სეზონი ჩავარდნა ჰქონდეს. განიხილება თუ არა ჩემი კანდიდატურა "იუვენტუსის" მთავარი მწვრთნელის პოსტზე? - ამის შესახებ მეც ჟურნალისტებისგან შევიტყვე და წესით, პასუხიც თქვენ უნდა იცოდეთ".

ყოველდღიური სპორტული გაზეთი "ლელო"