ჯანლუიჯი დონარუმა: ბუფონის ყველა მოძრაობას ვიმეორებ

"მილანის" 17 წლის მეკარე ჯანლუიჯი დონარუმა ისევ გამოიძახეს იტალიის ეროვნულ ნაკრებში. ჯიჯი "კოვერჩიანოს" საწვრთნელ ბაზაზეა და მის მიმართ მედია განსაკუთრებულ ინტერესს იჩენს.

დონარუმა ჟურნალისტებს გაესაუბრა და საინტერესო თემებზე გაამახვილა ყურადღება.

იყო ეროვნული ნაკრების შემადგენლობაში, განუმეორებელი შეგრძნებაა. ხშირად ვფიქრობ, ნუთუ ეს სიმართლეა და ღმერთს მადლობას ვწირავ, რომ ასეთი ბედი მარგუნა. "კოვერჩიანოს" ბაზაზე შესანიშნავი ატმოსფეროა და აქ ყველა ცდილობს, რომ მაქსიმალურად დაგეხმაროს.

ნაკრებში ბევრი მილანელი არაა და აქ ახალი მეგობრები შევიძინე - ყველამ კარგად მიმიღო და მაგრძნობინეს, რომ ჩემი დიდი იმედი აქვთ. ყველაფერს გავაკეთებ, რომ ეროვნულ ნაკრებს გამოვადგე, თუმცა დღეს უალტერნატივოდ ნომერი პირველი მეკარე ჯანლუიჯი ბუფონია და ამაზე ორი აზრი არ არსებობს.

თუ რამე წარმატებას მივაღწიე, ჩემი ოჯახის დამსახურებაა. მშობლები ყოველთვის მეუბნებოდნენ, რომ უნდა ვიშრომო ბევრი და თუ წარმატებას მივაღწევ, დავრჩე მოკრძალებული და თავმდაბალი. სწორედ ამ პრინციპებით მოვდივარ და მათ არასდროს გადავუხვევ.

მამაჩემი დღემდე დურგალია და მიუხედავად იმისა, რომ ამის საჭიროება აღარ დგას ოჯახში, ის მაინც არ ანებებს თავს საქმეს. მუდმივად მიმეორებს, რომ ჯერ არაფრისთვის მიმიღწევია და თავდაუზოგავად უნდა ვიშრომო. ასევე, მიშლის ტატუების და პერსინგების გაკეთებას - მამას ყოველთვის ვუჯერებდი და ამიტომ, შემიძლია ვთქვა, რომ ტატუ არასდროს მექნება. ჩემი წარმატების ფორმულა ჩემი ოჯახია.

ჯანლუიჯი ბუფონი განსაკუთრებული ადამიანია და მის მხარდამხარ ვარჯიში ჩემთვის უდიდესი პატივია. ვცდილობ, კარგად დავაკვირდე და მისი ყველა მოძრაობა გავიმეორო. ბუფონთან გატარებული ყველა წუთი სასარგებლოა ჩემთვის, რადგან ჯერ კიდევ უამრავი რამ მაქვს სასწავლი.

ამასთან, ბუფონი ბრწყინვალე ადამიანია და ყოველთვის მზადაა, რომ გვერდში დაგიდგეს. კარგად მახსოვს ჩვენი პირველი შეხვედრა და მისი სიტყვები, რომ ჩემზე დიდ იმედებს ამყარებს. ეს უდიდესი სტიმული და მოტივაცია იყო.

ყოველდღიური სპორტული გაზეთი "ლელო"