მუნდიალი 2018. სამხრეთი ამერიკა. X ტური: მესის მერე აგუეროც გაიბუტა [VIDEO]

სამხრეთ ამერიკაში მე-10 ტურის მატჩები გაიმართა, რომელმაც კიდევ უფრო დაამძიმა არგენტინის ნაკრების მდგომარეობა. დღეისათვის "ალბისელესტე" მხოლოდ მე-5 ადგილზეა, რომელსაც პლეი ოფის საგზური მოაქვს. მომდევნო ტურში მესი და კომპანია ბრაზილიაში ჩადის, რომელიც დღეიდან ტურნირის ლიდერია...

ედგარდო ბაუსას არგენტინას პარაგვაისთან აუცილებლად მოსაგები მატჩი ჰქონდა, მაგრამ "ალბისელესტე" ადგა და... წააგო. კვლავაც ლეო მესის გარეშე დარჩენილმა ბაუსამ შემადგენლობა შედარებით გადაასხვაფერა - მან პაულო დიბალა ამჯერად თადარიგში დატოვა და მოგვიანებით გამოიყვანა ლუკას პრატოს დარად. მესამე ცვლილება კი მწვრთნელს სულაც არ გამოუყენებია.

ფრანსისკო არსეს გუნდი მე-18 წუთზე დაწინაურდა, როდესაც არგენტინელები მოედნის ცენტრში ვერ გაერკვნენ სიტუაციაში და საბოლოოდ, ანხელ რომეროს პასით დერლის გონსალესმა სერხიო რომეროს ახლო კუთხეში გაუტანა. "მარიო კემპესზე" ფანებს ნერვების წყვეტა ელოდათ, რადგან მასპინძლებს მომენტები ჰქონდათ… აქტიურობდა ანხელ დი მარია, მაგრამ მთავარი მოქმედი პირი სერხიო აგუერო იყო, რომელმაც მეორე ტაიმის დებიუტში პენალტი გააფუჭა.

კუნის ძლიერი მხარე თერთმეტმეტრიანების შესრულება აშკარად არ არის, მაგრამ ის მაინც არ ეშვება. აგუეროს ხუსტო ვილიარმა პენალტიც აუღო და მოგვიანებით, რთული დარტყმულიც, როდესაც სერხიო მეტოქის გოლკიპერის პირისპირ გავიდა. ძალზე რეალური შანსი ჰქონდა გონსალო იგუაინსაც - "პიპიტამ" ძელს გაარტყა.

ახლა, როგორც ჩანს, აგუეროს გაბუტვის ჯერია - "სიტის" ფორვარდმა მატჩის შემდეგ ცხელ გულზე დააბრეხვა - შეიძლება ნაკრებიდან წავიდეო. პარაგვაი ამ უმნიშვნელოვანესი 3 ქულით მსოფლიო ჩემპიონატის საგზურისთვის ბრძოლაში რეალურად დაბრუნდა, მე-5 ადგილზე გაყინულ არგენტინას მიუახლოვდა და ყველაფერი წინაა. "ალბისელესტემ" რამე უნდა იღონოს, თორემ მომავალი მატჩი გასვლაზე ბრაზილიასთან აქვს და მერე კოლუმბიას უმასპინძლებს. თუ ბაუსას გუნდს ამ შეხვედრებშიც ვერ ექნება კარგი შედეგი, სიტუაცია საგანგაშოს მიუახლოვდება.

"საკუთარ თავს უნდა გამოვუტყდეთ და სიმართლე ვთქვათ. თამაში სასწრაფოდ უნდა გავაუმჯობესოთ და შეცდომები გამოვასწოროთ" - განაცხადა მარტინ დემიკელისმა.


არგენტინელები ზურგსუკან, პარაგვაის გარდა, ჩილეს სუნთქვასაც გრძნობენ. ხუან ანტონიო პიცის ბიჭებს ყველა გზა მოჭრილი ჰქონდათ, სანტიაგოში უცილობლად უნდა წაექციათ პერუ. ყველაფერი კარგად დაიწყო მათთვის - მაურისიო ისლამ მარჯვენა ფლანგზე იაქტიურა და შორეულ ძელთან მარტო დატოვებული არტურო ვიდალი მოძებნა, რომელმაც ბურთს საგოლედ "ურქინა". 76-ეზე, როდესაც ედისონ ფლორესმა გაათანაბრა, ჩილეში გლოვამ დაისადგურა, მაგრამ იმავე წყვილმა ყველაფერი მოაგვარა - ისლამ ვიდალს მიუგორა, "მეფე არტურომ" კი კოხტა შორეული დარტყმით "ოქროს გოლი" გაიტანა.

"ძალიან ბედნიერი ვარ და მიხარია, რომ ფანები გავახარეთ, ისინი ამას იმსახურებენ. წინა შეხვედრებში რაღაც არ გამოგვდიოდა. ხარვეზები ახლაც არის, მაგრამ შეინიშნება პროგრესიც. პოტენციალის გამოვლენა უნდა განვაახლოთ და ისე ვითამაშოთ, როგორც შეგვიძლია. წინ მნიშვნელოვანი თამაშები გვაქვს, ბრძოლისთვის მზად ვართ" - განაცხადა მატჩის გმირმა ვიდალმა.


ბოლივიამ ეკვადორთან უკეთ დაიწყო და მე-3 წუთზე დაწინაურდა კიდეც. სტუმრებს პაბლო ესკობარი ატერორებდა. მან შორეული დარტყმით ულამაზესი გოლი შეაგდო, მაგრამ აქ როდრიგო რამალიოს ყოჩაღობაც აღსანიშნავია, რომელმაც წაქცეულმაც მოახერხა პასის გაკეთება. ტაიმის მიწურულს ესკობარმა მეორე ეფექტური გოლი შეაგდო.

ბოლივიელთათვის ყველაფერი გეგმის მიხედვით მიდიოდა, თუმცა მეორე ნახევარში "ესკობარობა" ენერ ვალენსიამ გადაიბარა და მანაც ტაიმის დასაწყისში და ბოლოს (როდესაც ეკვადორი უკვე 10 კაცით იყო) გაიტანა. ალიმენტებთან დაკავშირებულ სკანდალში გახვეულმა ფორვარდმა ორივე შემთხვევაში გოლის ალღო გამოაჩინა და მოწინააღმდეგის უკანახაზელების წამიერი მოდუნებით ისარგებლა. ანტონიო ვალენსია საგოლე პასით შემოიფარგლა.

***

ასეთივე უხვგოლიანი მატჩი და დრამა ვიხილეთ ბარანკილიაში. კოლუმბია ჯერ იგებდა, მერე აგებდა… - აბელ აგილარმა ლუის მურიელის გადაცემით სწრაფი გოლი შეაგდო. 27-ე წუთზე კრისტიან როდრიგესმა ითამაშა თავგანწირვით, თავით "გაფრინდა" ბურთისკენ და მცირე ტრავმაც მიიღო, მაგრამ გაიტანა.

ცბიერი ოსკარ ტაბარესის მიერ 70-ე წუთზე მინდორზე "შეპარებულმა" კრისტიან სტუანიმ 73-ე წუთზე საჰაერო ბურთი მოიგო და ლუის სუარესისკენ გაუშვა, რომელიც მცველს დაუსხლტა და გაიტანა.

თუმცა ხამეს როდრიგესის არყოფნით შესუსტებულმა კოლუმბიამ მაინც არ წააგო - "პალმეირასის" 22 წლის მცველმა იერი მინამ კუადრადოს ჩაწოდებისას თავურით ლამაზი გოლი გაიტანა. იგი ისე "გამოფრინდა" და ისე დაარტყა, ფერნანდო მუსლერა ვერც კი გაინძრა.

"ჩვენ მძლავრად გამოვიყურებით, კარგად ვთამაშობთ და მსოფლიოს ჩემპიონატი უკვე ძალიან ახლოსაა. მთავარია, ასევე გავაგრძელოთ. კარგი მატჩი იყო, მაგრამ დასანანია, რომ ვერ მოვიგეთ, რადგან უპირატესობას ვფლობდით" - აღნიშნა დიეგო გოდინმა.


და აი, ასე ნელ-ნელა გადავიდა პირველ ადგილზე ტიტეს ბრაზილია. "სელესაოს" მწვრთნელის ხელი აშკარად დაეტყო, მაგრამ აუტსაიდერმა ვენესუელამ მრისხანე მეტოქეს საქმე თავისითაც გაუადვილა. მასპინძელთა მეკარე დანიელ გონსალესმა ბურთი პირდაპირ ვუნდერკინდ გაბრიელ ჟესუსს მიაბარა და 19 წლის თავდამსხმელმაც საჩუქარი შეირგო და მორიგი გოლი გაიტანა, მეკარე ბოლომდე შეარცხვინა და მას ბურთი თავზე გადაავლო.

ნეიმარის არყოფნაში ტიტემ ისევ ძირითადში გაამწესა ვილიანი და წერტილი სწორედ "ჩელსის" შემტევმა ნახევარმცველმა დასვა, რომელმაც რენატო აუგუსტოს პასით იხეირა.

"შესაძლოა, ეს ჩვენი საუკეთესო თამაში არ გახლდათ, მაგრამ მისია შევასრულეთ, 3 ქულა მშვიდად ავიღეთ და მატჩის მსვლელობას ვაკონტროლებდით" - თქვა ტიტემ.


ბოლივია-ეკვადორი 2:2
გოლები: 1:0 პ. ესკობარი (3), 2:0 პ. ესკობარი (43), 2:1 ე. ვალენსია (47), 2:2 ე. ვალენსია (89)
გაძევება: ლ. კაისედო (79. ეკვადორი)

კოლუმბია-ურუგვაი 2:2
გოლები: 1:0 აგილარი (15), 1:1 კ. როდრიგესი (27), 1:2 სუარესი (73), 2:2 მინა (84)

ჩილე-პერუ 2:1
გოლები: 1:0 ვიდალი (10), 1:1 ე. ფლორესი (76), 2:1 ვიდალი (85)

არგენტინა-პარაგვაი 0:1
გოლი: 0:1 დ. გონსალესი (18)
გამოუყენებელი პენალტი: აგუერო (47)

ვენესუელა-ბრაზილია 0:2
გოლები: 0:1 გაბრიელ ჟესუსი (8), 0:2 ვილიანი (53)

თ მ ფ წ ბ ქ
1. ბრაზილია 10 6 3 1 23-9 21
2. ურუგვაი 10 6 2 2 21-7 20
3. ეკვადორი 10 5 2 3 18-14 17
4. კოლუმბია 10 5 2 3 15-12 17
5. არგენტინა 10 4 4 2 11-9 16
6. პარაგვაი 10 4 3 3 10-12 15
7. ჩილე 10 4 2 4 15-16 14
8. პერუ 10 2 2 6 11-19 8
9. ბოლივია 10 2 2 6 11-20 8
10. ვენესუელა 10 0 2 8 9-26 2

მომდევნო ტური
11 ნოემბერი:
კოლუმბია-ჩილე, ურუგვაი-ეკვადორი, პარაგვაი-პერუ, ვენესუელა-ბოლივია, ბრაზილია-არგენტინა.

ყოველდღიური სპორტული გაზეთი "ლელო"