ფრანგულ ფეხბურთში მართლაც საგანგაშო მდგომარეობაა. გაიმართა საფრანგეთის პროფესიონალურ საფეხბურთო კლუბთა კავშირის გენერალური ასამბლეა, რომელზეც კატეგორიულად გადაწყვიტეს - გაფიცვა! თუ რაიმე ცვლილება არ იქნება, 29 ნოემბრიდან 2 დეკემბრის ჩათვლით, ლიგა 1-სა და ლიგა 2-ში ჩასატარებელი შეხვედრები არ გაიმართება, რადგან ფეხბურთელები მინდორზე არ გავლენ. საფრანგეთი რევოლუციებით ცნობილია და მათ შორის, ფეხბურთშიც. უკან დახევას, როგორც ჩანს, არავინ აპირებს. ამ მოძრაობის სახელი და სლოგანი შემდეგნაირია: "ფეხბურთი საფრთხეშია, დავდგეთ ერთად!" საფრანგეთის პროფესიონალურ კლუბთა კავშირი ფანებს აქტიურობისკენ მოუწოდებს.
თუ რაშია საქმე, ალბათ, იცით, ამაზე ადრეც დაგვიწერია.
ახალი კანონით, ფეხბურთელის, რომელიც წლიურად მილიონზე მეტს გამოიმუშავებს, შემოსავლის 75% გადასახადებში წავა... ამ მხრივ იქ არც ახლაა იდეალური მდგომარეობა და მით უმეტეს, როდესაც მოთამაშეების ხელფასი კიდევ უფრო დაიბეგრება, ხოლო კლუბი მათ დასაკმაყოფილებლად ასტრონომიულ ჯამაგირს ვერ დანიშნავს, რასაკვირველია, ისინი სხვა ქვეყნებში გადაბარგდებიან.
ლიგა 1-დან გამორჩეული ფეხბურთელების მასობრივი გადინება დაიწყება, რაც ამ მოძლიერებულ ჩემპიონატზე სავალალოდ იმოქმედებს და საფრანგეთის ჩემპიონატის დონე ისევ ძალიან დაიწევს. ფრანგულ კლუბს ფეხბურთელის შენახვა 33%-ით უფრო მეტი უჯდება, ვიდრე ინგლისურს, გერმანულს, იტალიურს ან ესპანურს.
ცხადია, ეს პრობლემა ძალიან ბევრს ეხება, საუბარი ამ სფეროში დასაქმებულ დაახლოებით 25 ათას ადამიანზეა. ახლა ამას დაუმატეთ ბევრად მეტი გულშემატკივარი, რომელიც სანახაობის დაკარგვას ასე ადვილად ვერ გადაიტანს და აქციებმა შესაძლოა მასობრივი სახეც მიიღოს.
რას აპირებს და რას მოიფიქრებს ქვეყნის პრეზიდენტი ფრანსუა ოლანდი, ეს ჯერჯერობით უცნობია. სპორტის მინისტრი ვალერი ფურნიერონი ადრე უფრო მკაცრი იყო, ბოლო დღეებში კი ცოტა მოლბა, მაგრამ ის გაფიცვას მხარს არ უჭერს და ყველას მოუწოდებს, ამის გაკეთება გადაიფიქრონ. მოკლედ, სიტუაცია ჩიხშია შესული.
"დიდი იმედი მაქვს, რომ ჩვენს მოძრაობას ბევრი ადამიანი აჰყვება - ის ხალხი, რომლებიც ფეხბურთით ცხოვრობენ და მათი ყოველდღიურობა ფეხბურთის გარეშე წარმოუდგენელია. მართლაც სერიოზული საფრთხის წინაშე ვდგავართ. ფინანსური კუთხით არც ახლაა სახარბიელო მდგომარეობა და მთავრობა გადასახადების მომატებას აპირებს. ეს სამართლიანი არ არის" - განაცხადა კავშირის პრეზიდენტმა ჟან-პიერ ლუველმა.
აღვნიშნოთ, რომ მაგალითად, მარტო პსჟ-ს 21 ისეთი ფეხბურთელი ჰყავს, რომლის შემოსავალიც მილიონს აჭარბებს, თანაც, გვარიანად. წინა სეზონში ლიგა ერთმა უკვე ნახა 108 მილიონი ევროს ზარალი. ერთი სიტყვით, გამოსავალი სასწრაფოდ მოსაძებნია, თორემ თვის ბოლოს, შესაძლოა, ფრანგული საკლუბო ფეხბურთის გარეშე დავრჩეთ.
ყოველდღიური სპორტული გაზეთი "ლელო"
