საფრანგეთი-გერმანია 2:0 - ტერაქტები, მსხვერპლი და ქაოსი პარიზში [VIDEO]

13 ნოემბერს, პარიზში მიმდინარე ამხანაგური მატჩის დროს, რომელშიც ერთმანეთს საფრანგეთისა და გერმანიის ნაკრებები დაუპირისპირდნენ, ქვეყანაში ტერორისტული აქტების სერია განხორციელდა. რესტორნების, თეატრისა და სტადიონ "სტად დე ფრანსის" სიახლოვეს აფეთქებებსა და სროლას, ბოლო ინფორმაციით, ასზე მეტი ადამიანი ემსხვერპლა.

"სტად დე-ფრანსზე", სადაც საფრანგეთის პრეზიდენტი ოლანდი და გერმანიის საგარეო საქმეთა მინისტრი საფრანბგეთი-გერმანიის მატჩს ესწრებოდნენ, ტერორისტთა შეტევა რამდენჯერმე განხორციელდა. არენის შესასვლელთან ერთ-ერთ აფეთქებას სამი ადამიანი ემსხვერპლა, რამდენიმე კი დაშავდა.

შეხვედრა მასპინძლების გამარჯვებით 2:0 დასრულდა, გულშემატკივრებს კი უსაფრთხოების მიზნით, სტადიონიდან კარგა ხანს არ უშვებდნენ. სტუმართა გუნდმა მოედანი მხოლოდ სამი საათის შემდეგ დატოვა.

რაც შეეხება უშუალოდ თამაშს, გოლები ოლივიე ჟირუმ (45) და ანდრე პიერ-ჟინიაკმა (86) გაიტანეს.

გერმანიის ეროვნული ნაკრების თავკაცის იოაჰიმ ლიოვის განცხადებით, მისი ფეხბურთელები შოკში იყვნენ იმ აფეთქებების გამო, რომელიც "სტად დე ფრანსთან" ახლოს მოხდა.

"ჩვენ ყველანი შოკში ვართ. შეხვედრა მეორე პლანზე გადავიდა. მომხდარზე გასახდელში გვითხრეს. მოედანზე ყოფნაც საშიში იყო. თამაშამდე უკვე იყო ინფორმაცია ტერაქტის საშიშროების შესახებ იმ სასტუმროში, სადაც ჩვენი გუნდი ცხოვრობდა", - აცხადებს გერმანელი სპეციალისტი.