30 მაისს ევროპაში ორი საერთაშორისო ამხანაგური შეხვედრა გაიმართა. ევრო 2016-ის მასპინძელმა საფრანგეთის ნაკრებმა ნანტში კამერუნის ეროვნულ გუნდს უმასპინძლა და მეტოქე ანგარიშით 3:2 დაამარცხა.
მასპინძლები მე-20 წუთზე ბლეზ მეტიუდის გოლით დაწინაურდნენ, თუმცა აფრიკელებმა 2 წუთში გაათანაბრეს - უგო ლორისს ვენსან აბუბაკარმა გაუტანა. ტაიმის მიწურულს ოლივიე ჟირუმ გაიტანა (41-ე წუთი) და საფრანგეთი ანგარიშში ისევ წინ გავიდა.
კამერუნელებმა შეხვედრის მიწურულს ერიკ შუპო-მოტინგის (88) გოლით კიდევ ერთხელ გაათანაბრეს, მაგრამ დარჩენილ დროში კარის "მშრალად" შენახვა მაინც ვერ მოახერხეს. 90-ე წუთზე საბოლოო ანგარიში დიმიტრი პაიეტმა დააფიქსირა.
დღის მეორე მატჩი შვედეთში ჩატარდა, სადაც ადგილობრივმა ნაკრებმა სლოვენიასთან უგოლოდ ითამაშა.
