ლიბერტადორესის თასზე პირველი ორი მეოთხედფინალისტი გაირკვა. ორივე წყვილში გამარჯვება იმ გუნდებმა მოიპოვეს, რომლებიც პირველი მატჩების წინ ფავორიტებად ითვლებოდნენ, თუმცა ამ ორიდან ერთს საკმაოდ გაუჭირდა, მეორემ კი გაისეირნა.
მოულოდნელი იყო ის, რომ ეს "მოსეირნე" კლუბი "ატლეტიკო მინეირო" აღმოჩნდა, რადგან მას გაცილებით ძლიერი მეტოქე ჰყავდა, ვიდრე "ფლუმინენსეს". წყვილშიც ფავორიტად "ატლეტიკო" ჯგუფურ ეტაპზე ნაჩვენები კარგი თამაშის გამო ითვლებოდა, სადაც სწორედ "სან პაულო" დაჯაბნა. პირველ შეხვედრაში მოპოვებული გამარჯვების მიუხედავად (სან პაულოში, 2:1), სპეციალისტები რონალდინიოს გუნდს მაინც სერიოზულ ბრძოლას უწინასწარმეტყველებდნენ, მაგრამ ეს ბრძოლა არ შედგა.
გამორჩეული იყო რონალდინიოც, ვინც აქტივში მხოლოდ ერთი საგოლე პასი კი ჩაიწერა, მაგრამ რამდენიმე დასამახსოვრებელი ფინტი და დრიბლინგი შემოგვთავაზა, რომელთაგანაც ერთმა ისევ ის, ძველი რონალდინიო გაგვახსენა, "ბარსელონას" და მსოფლიო ფეხბურთის გულშემატკივრები ჭკუიდან რომ გადაჰყავდა.
საბოლოოდ, როგორც აღვნიშნეთ, "ატლეტიკო მინეირომ" ძალიან იოლი გამარჯვება მოიპოვა და კოპა სუდამერიკანას მფლობელ "სან პაულოს" ორი მატჩის ჯამში 6:2 მოუგო. კუკას გუნდი 1/4-ფინალში გავიდა, სადაც "პალმეირასს" ან "ტიხუანას" უნდა დაუპირისპირდეს.
"ატლეტიკო" ტურნირის ერთ-ერთი მთავარი ფავორიტია - გუნდი შესანიშნავად თამაშობს (7 მოგება და 1 წაგება, ისიც ჯგუფის ბოლო ტურში "სან პაულოსთან") და მას ძალიან ძლიერი შემადგენლობა ჰყავს, სადაც უამრავი გამოცდილი ფეხბურთელია (რონალდინიო, ჟო, დიეგო ტარდელი, ჟოსუე, ჟილბერტო სილვა, რიჩარლისონი, ალეკსანდრო...) თავმოყრილი.
ბრაზილიის ვიცე-ჩემპიონისგან განსხვავებით, ძალიან გაუჭირდა ჩემპიონ "ფლუმინენსეს", რომელმაც "ემელეკს" გადამწყვეტი გოლი მხოლოდ მას შემდეგ გაუტანა, რაც ეს უკანასკნელი მოედანზე 9 კაცით დარჩა. მასპინძლებმა ანგარიში პირველივე ტაიმში გახსნეს. გოლი, რა თქმა უნდა, ფრედმა გაიტანა, ვინც საკუთარ გუნდს ეკვადორში ვერ დაეხმარა.
ამის შემდეგ მასპინძლები რისკზე აღარ მიდიოდნენ, თუმცა სტუმრებს პერიოდულად კი აწუხებდნენ.
საბოლოოდ, "ნერვების თამაშში" ბრაზილიელებმა იმარჯვეს. ეკვადორელებმა დაძაბულობას ვერ გაუძლეს და ხელი უხეშობას მიჰყვეს, რის შედეგადაც ჯერ ახილიერმა, შემდეგ კი კინონესმა მეორე ყვითელი ბარათები დაიმსახურეს. კინონესის გაძევებიდან 3 წუთში ცვლილებაზე შემოსულმა რაინერმა ბურთი შეტევაში ჩართულ კარლინიოსს გადააწოდა, რომელმაც გამარჯვების მომტანი გოლი გაიტანა. საბოლოოდ - 2:0, ორი მატჩის ჯამში კი 2:1 და ბრძოლას "ფლუ" აგრძელებს.
აბელ ბრაგას გუნდი მომდევნო ეტაპზე "ოლიმპია"-"ტიგრეს" წყვილში გამარჯვებულს შეხვდება. სატურნირო ბადის ამ ნაწილში "ფლუმინენსე" აშკარა ფავორიტად მოჩანს და თუ ყველა პროგნოზი გამართლდა, შესაძლოა, ფინალში სწორედ "ატლეტიკო მინეირო" და "ფლუმინენსე" ვიხილოთ.
ლიბერტადორესის თასი. 1/8-ფინალი. საპასუხო მატჩები
ატლ. მინეირო-სან პაულო 4:1
(პირველი მატჩი: 2:1)
გოლები: 1:0 ჟო (18), 2:0 ჟო (63), 3:0 დიეგო ტარდელი (64), 4:0 ჟო (69), 4:1 ლუიშ ფაბიანო (76).
ატლ. მინეირო (4-2-2-2): ვიქტორო - მარკოს როჩა, რევერი, ჟილბერტო სილვა, რიჩარლისონი - პიერი, ლეანდრო დონიზეტი (73. ჟოსუე) - ბერნარდი (78. ლუანი), რონალდინიო - დიეგო ტარდელი (83. როსინეი), ჟო.
სან პაულო (4-2-3-1): როჟერიო სენი - პაულო მირანდა (46. სილვინიო), ედსონ სილვა, რაფაელ ტოლოი, ტიაგო კარლეტო - დენილსონი (69. ადემილსონი), ველინგტონი - ჟადსონი (71. მაიკონი), დუგლასი, განსო - ლუიშ ფაბიანო.
გაძევება: როსინეი (91. ატლეტიკო მინეირო), ტიაგო კარლეტო (91. სან პაულო).
ფლუმინენსე-ემელეკი 2:0
(პირველი მატჩი: 0:1)
გოლები: 1:0 ფრედი (29), 2:0 კარლინიოსი (85).
ფლუმინენსე (4-3-2-1): დიეგო კავალიერი - ბრუნო ვიეირა (72. დიგინიო), დიგაო, ლეანდრო ეუსებიო, კარლინიოსი - ედინიო, ვაგნერი, ჟეანი - ველინგტონ ნემი, ტიაგო ნევეში (67. რაინერი) - ფრედი (82. სამუელ როსა).
ემელეკი (4-4-2): დრეერი - ნარვაესი, ახილიერი, ნასუტი, ბაგი - ე. ვალენსია (62. მ. კაისედო), კინონესი, ვილა (72. პ. სებალიოსი), ფ. ხიმენესი - მონდაინი, მ. დე ხესუსი (87. გაიბორი).
გაძევება: ახილიერი (77. ემელეკი), კინონესი (82. ემელეკი).
ბომბარდირები: 6 - ჟო (ატლეტიკო მინეირო); 5 - დიეგო ტარდელი (ატლეტიკო მინეირო), ლუიშ ფაბიანო (სან პაულო), ბ. როდრიგესი (უაჩიპატო).
ყოველდღიური სპორტული გაზეთი "ლელო"
ასევე იხილეთ:
ლიბერტადორესის თასი. 1/8-ფინალი. I მატჩები: "ბოკამ" რევანში აიღო
