მჩ 2018-ის შესარჩევი. სამხრეთი ამერიკა. VI ტური: არგენტინამ მოიგო, ბრაზილია გადარჩა [VIDEO]

მსოფლიოს 2018 ჩემპიონატის საკვალიფიკაციო ეტაპზე კონმებოლის ზონაში (სამხრეთი ამერიკა) მე-6 ტურის მატჩები გაიმართა.

არგენტინის ეროვნულმა გუნდმა შინ ბოლივიის ნაკრებს უმასპინძლა და მეტოქეს ორი უპასუხო გოლი გაუტანა. ანგარიში მასპინძლებმა მე-20 წუთზე გახსნეს - გონსალო იგუაინის პასით გაბრიელ მერკადომ გაიტანა. ათი წუთის შემდეგ კი 11-მეტრიანი ზუსტად ლიონელ მესიმ შეასრულა. ეს არგენტინელი ვარსკვლავის 50-ე გოლია ეროვნულ გუნდში.

პარაგვაიში წაგებას გადაურჩა ბრაზილიის ნაკრები. მატჩი ფრედ, 2:2 დასრულდა. მე-40 წუთზე პარაგვაი დარიო ლესკანოს გოლით დაწინაურდა, შესვენების შემდეგ კი მასპინძელთა უპირატესობა ორბურთიანი ედგარ ბენიტესმა (49) გახადა. ბრაზილიელებმა ქულის გადარჩენა მატჩის მიწურულს, რიკარდო ოლივეირასა (79) და დანი ალვეშის (90+2) გოლებით შეძლეს.

ურუგვაიმ ედინსონ კავანის (53) ერთადერთი გოლით შინ პერუს მოუგო.

ხოლო კოლუმბიამ საკუთარ კედლებში ეკვადორი ანგარიშით 3:1 დაამარცხა. მასპინძლებმა ანგარიშში სამბურთიანი უპირატესობა კარლოს ბაკას დუბლითა (15, 67) და სებასტიან პერესის გოლით (48) მოიპოვეს. ეკვადორმა მხოლოდ სხვაობის შემცირება შეძლო - ბოლო წუთზე საბოლოო ანგარიში მიქაელ აროიომ დააფიქსირა.

სტუმრად ვენესუელასთან ანგარიშით 4:1 გამარჯვება იზეიმა ჩილეს ნაკრებმა. მასპინძლები უკვე მე-9 წუთზე რომულო ოტერომ კი დააწინაურა, თუმცა ამის შემდეგ წყვილ-წყვილად მაურისიო პინილიამ (33, 52) და არტურო ვიდალმა (72, 90) გაიტანეს.

VI ტურის შემდეგ კონმებოლის ჯგუფს 13-13 ქულით ურუგვაი და ეკვადორი ლიდერობენ. 11 ქულით მესამე არგენტინაა. ბრაზილიის ნაკრები, რომლის აქტივში 9 ქულაა, მე-6-მე-7 ადგილებს პარაგვაისთან იყოფს.