დრიბლინგი: რატომ გაულახეს ლევან მჭედლიძეს თანაგუნდელი გასახდელში

მართალია, "ტორინოს" "იუვენტუსისთვის" 20 წლის განმავლობაში არ მოეგო, მაგრამ ტურინულ დერბის ფსევდო-დერბის მაინც ვერავინ უწოდებს. თუ "ტორო" ვერ ახერხებდა "იუვეს" გამწარებას, სამაგიეროდ, "ტოროს" ფანები ამას ყოველთვის ახერხებდნენ ხოლმე, ახლა კი ისე მოხდა, რომ ტიფოზებთან ერთად, დიდი "იუვენტუსი" თვით "ტორინოს" ფეხბურთელებმაც კი გაამწარეს.

მატჩს წინ უძღვოდა ძალიან სერიოზული შეტაკებები. "ტორინოს" ულტრასებმა "იუვეს" ავტობუსს ქვები, კვერცხები და სხვადასხვა საგანი დაუშინეს და იმდენი მოახერხეს, რომ ორმაგად დაცული მინები ჩაუმსხვრიეს. "იუვენტუსის" ავტობუსს ორმაგი მინები იმიტომ აქვს, რომ გასვლით შეხვედრებში სხვადასხვა იტალიური კლუბის ქომაგები ხშირად ესვრიან ხოლმე არა მარტო კვერცხებს, არამედ საკმაოდ მძიმეწონიან ქვებსაც.

ეს განსაკუთრებით ხშირად ნეაპოლში ხდება, სადაც "იუვენტუსს" და ზოგადად, ჩრდილოეთ იტალიის კლუბებს დასანახად ვერ იტანენ. უშუალოდ დერბის დროს კი "იუვეს" ფანებმა იძიეს შური და "ტორინოს" ულტრასები პიროტექნიკის კვამლში გაახვიეს. ათი ტიფოზი დაშავდა - საბედნიეროდ, მსუბუქად.

მატჩის შემდეგ იტალიის შინაგან საქმეთა მინისტრმა ანჯელინო ალფანომ განაცხადა, ამიერიდან ძალადობისკენ მიდრეკილ გულშემატკივრებს ოდნავადაც აღარ დავინდობთო და მათ ნულოვანი ტოლერანტობით დაემუქრა.

მაგრამ, ალბათ, უპრიანი იქნებოდა, რომ მას ასეთი რამ შედარებით ადრე ეთქვა და სიტყვისთვის საქმეც მიეყოლებინა. ასე კი, მიუხედავად იმისა, რომ "ტოროს" საკმაოდ გაუმართლა, "იუვეს" რომ მოუგო, ამ გუნდის გამარჯვებაზე მეტად ის ძალადობანი გახდა აღსანიშნავი, რაზეც ზემოთ ვისაუბრეთ.

არადა, "ტორომ" "იუვე" 20-წლიანი პაუზის შემდეგ პირველად დაამარცხა - რამხელა ამბავია?!

ტურინელ ხულიგნებს არც ბერგამოს "ატალანტას" თავდამსხმელი ხერმან დენისი ჩამორჩა, რაც, პრინციპში, არცაა გასაკვირი, რადგან მას მეტსახელად "ტანკს" ეძახიან.

როგორც ამბობს და როგორც ირკვევა, "ემპოლისთან" მატჩის დროს ლევან მჭედლიძის თანაგუნდელი მცველი ლორენცო ტონელი მას იმდენად ხშირად და ისე ძლიერად უშლიდა ნერვებს, რომ საფინალო სასტვენის შემდეგ დენისმა "ემპოლის" გოლით დასჯა არ იკმარა და მეტოქე გუნდის გასახდელს მიაშურა.

სანამ გეტყოდეთ, რა მოხდა "ემპოლის" გასახდელში, ის უნდა ვთქვათ, რომ როგორც ჩვენმა იტალიელმა კოლეგებმა გამოარკვიეს, ლორენცო ტონელი ხერმან დენისს მთელი მატჩის განმავლობაში სიტყვიერ შეურაცხყოფას აყენებდა და მისი მოკვლით და მისი ოჯახის ამოწყვეტით ემუქრებოდა.

ახლა კი მთავარი: ერთი სიტყვით, მატჩის შემდეგ დენისმა "ემპოლის" გასახდელის კარზე მიაკაკუნა და როცა გაუღეს, ღრიალით შევარდა და თავისი მძლავრი მუშტით ტონელის სიფათში მაგარი მოსდო! შედეგი: ხერმან დენისი-ტონელის ცხვირი 1:0.

ჩვენდა სამწუხაროდ, მომხდარის ფოტო ან ვიდეო არავის გადაუღია და ჩვენმა იტალიელმა კოლეგებმა ამიტომაც შექმნეს კომიქსი, რომელსაც ფოტოზე ხედავთ. ასეთი საქციელისთვის "ატალანტამ" დენისი მსუყე ფულადი ჯარიმით დასაჯა, ლეგაკალჩოსგან კი არგენტინელს 5-მატჩიანი დისკვალიფიკაცია ემუქრება.

"მე თუ მკითხავთ, დენისს საერთოდ სტადიონზე შესვლა უნდა აუკრძალონ, - ეს "ემპოლის" სპორტული დირექტორის, მარჩელო კარლის სიტყვებია, რომელიც დასძენს. - მართალია, ტონელიმ პირი ნაღდად აიმყრალა, მაგრამ ნუთუ დენისი სერიოზულად ფიქრობდა, რომ ის მის ოჯახს მართლაც ამოწყვეტდა?"

როგორც ჩანს, კი!

"მილანი" ისევ დასჯილია - ფილიპო ინძაგიმ "უდინეზესთან" წაგებული და სამარცხვინოდ ჩატარებული მატჩის შემდეგ შეგირდები "მილანელოზე" გამოკეტა და ლექციებს უკითხავს.

საინტერესოა, რას ეუბნება ფილიპო ფეხბურთელებს, ფაქტი კი ის არის, რომ "უდინეზესთან" "მილანს" კარში პირველი ზუსტი დარტყმის განსახორციელებლად 88 წუთი (!) დასჭირდა.

მატჩის შემდეგ ინძაგიმ "სქაის" მიკროფონში კბილებში გამოსცრა:

"დღეს ისე ცუდად ვთამაშობდით, რომ ალბათ, მსოფლიოს ნებისმიერ კლუბთან წავაგებდით. დღეს ჩემმა ფეხბურთელებმა არ დაიმსახურეს ის, რომ "მილანის" ფორმა ეცვათ. ჩემი ნება რომ ყოფილიყო, შესვენებაზე ყველა მოთამაშეს შევცვლიდი! არადა, რა კარგად ჩავატარეთ წინა ცხრა შეხვედრა..."

ამის თქმა იყო და ინძაგის სტუდიიდან მაშინვე რეპლიკა ესროლეს - 9 თამაში გადაჭარბებული ხომ არ არისო, რაზეც პიპო მაგრად აიჭრა და ასეთი პასუხი გასცა:

"მოიცათ ერთი წუთით, 9 თამაში ვინ ახსენა? მე ვთქვი? თქვენ ყოველთვის სიტყვებს დასდევთ და სიტყვებს ეკიდებით!"

ოჰ, ეს ბოროტი ჟურნალისტები.

ჟოზე მოურინიომ თავისი "ავტობუსი" ისევ ამოქოქა, პირდაპირ "არსენალის" სტადიონზე შეაყენა და პირველ ტაიმში ერთ კართან ეყენა, მეორეში - მეორესთან. მართალია, სუფთა საფეხბურთო თვალსაზრისით, ისეთივე მოსაწყენი სანახაობაა, როგორც ნაცარქექიაზე გადაღებული რეალითი–შოუ იქნებოდა, მაგრამ ეფექტიანი კი ნამდვილად არის და თანაც, როგორ!

"ჩელსიმ" "არსენალთან" თავისი 0:0 კბილებითა და ფრჩხილებით დაიცვა. შესაბამისად, ლოგიკურია, "არსენალის" ფანები "ჩელსის" ასეთ სიმღერას რომ უმღეროდნენ: "მოსაწყენი, მოსაწყენი, მოსაწყენი "ჩელსი".

მატჩის შემდეგ გამართულ პრესკონფერენციაზე ჟურნალისტებმა ჟოზეს სწორედ ამ თემით აგდება სცადეს. ეუბნებოდნენ, თქვენ ფეხბურთს ფეხბურთთან კავშირი არ ჰქონდა, 11 კაცით თავის დაცვა ხომ მართლაც ძალიან მოსაწყენი სანახაობააო.

ამის გამგონე მოურინიომ, როგორც სჩვევია, ღრმად ჩაისუნთქა და დაიწყო:

"იცით, რა არის სინამდვილეში მართლაც მოსაწყენი?” - კბილებში გამოსცრა პორტუგალიელმა, - თუნდაც ის, რომ 10 წელი ტიტულს ვერ მოიგებ. აი, ეს არის მართლა მოსაწყენი".

მოურინიოს თავისი სიმართლე აქვს. ფინიშამდე 5 ტურით ადრე მისი "ჩელსი" 10-ქულიანი უპირატესობით ლიდერობს. თანაც, თავად ვენგერსაც არ უვარგა სტატისტიკა მოურინიოსთან.

თავად განსაჯეთ: 14 შეხვედრაში, რომელიც ვენგერმა ჟოზეს წინააღმდეგ ჩაატარა, ფრანგს პორტუგალიელი ერთხელაც არ დაუმარცხებია...

წინა კვირაში "მანჩესტერ იუნაიტედის" მთავარი მწვრთნელი ლუი ვან გაალი გულშემატკივრებს შეხვდა. შეხვედრაზე ჰოლანდიელს ერთ-ერთი ფანი წამოუდგა და ის ფეხბურთელები ჩამოუთვალა, რომლებიც "იუნაიტედმა" ზაფხულში უნდა შეიძინოს - თუკი ჩემპიონობა სურს.

ფანი ირწმუნებოდა, რომ მისი ღრმა რწმენით, ამ მოთამაშეების შეძენის შემთხვევაში ვან გაალის გუნდი გაისად ინგლისის ჩემპიონი გახდება.

ახლა მთავარი: სიას არ იკითხავთ? "ჰუმელსი – 36 მილიონად, ბეილი – 120 მილიონად და ჯექსონ მარტინესი – 30 მილიონად".

"გმადლობთ! ახლა უკვე ვიცი, ვინ უნდა ვიყიდო ზაფხულში", - ასეთი იყო ვან გაალის კომენტარი.

მადრიდის "ატლეტიკოს" გულშემატკივრები ანტუან გრიზმანს თავიდან ეჭვის თვალით უყურებდნენ. თამამად შეიძლება ითქვას, რომ "ატლეტიკოს" ფანობიდან მხოლოდ ძალიან ცოტას თუ სჯეროდა, რომ ეს ტრანსფერი გაამართლებდა.

მადრიდელებმა ფრანგში საკმაოდ დიდი ფული (სავარაუდოდ, 30 მილიონი ევრო) გადაიხადეს და თანაც, მანამდე ის ხომ "რეალ სოსიედადში" თამაშობდა. კრიტიკულ მიდგომას ისიც დაემატა, რომ გრიზმანმა "ატლეტიკოში" ასპარეზობა ცუდად დაიწყო და პირველი გოლი ოდენ მე-10 ტურშიღა შეაგდო.

ახლა კი ყველაფერი სხვაგვარადაა! გრიზმანს "ატლეტიკოს" გულშემატკივრები ხელისგულზე ატარებენ და ეს უკანასკნელიც გუნდის ერთ-ერთი უმთავრესი მარგალიტია.

გარდა იმისა, რომ 24 წლის ფრანგმა ბოლო ხუთ მატჩში გოლები შეყარა, ბოლო სამი შეხვედრაა, დუბლებს ასრულებს. ასეთი რამ კი "ატლეტიკოში" აქამდე მხოლოდ ერთადერთ ფეხბურთელს ჰქონდა მოხერხებული - "ვინმე" ფერნანდო ტორესს 2003/04 წლების სეზონში...

ამბობენ, მადრიდში გრიზმანის ვარცხნილობა ყველაზე მოთხოვნადი გახდაო - ოღონდ კრიშტიანო რონალდოს ვარცხნილობის მერე.

ყოველდღიური სპორტული გაზეთი "ლელო"