თბილისში გასამართი ევროპის სუპერთასი განსაკუთრებულია "ბარსელონას" ხორვატი ნახევარმცველისთვის, ივან რაკიტიჩისათვის. რაკიტიჩი თავის ყოფილ კლუბს, "სევილიას" დაუპირისპირდება. იყო დრო, ბალკანელი "სევილიის" ლიდერი გახლდათ და უკანასკნელი კაცი არც "ბარსელონაშია" - ამაზე თუნდაც მის მიერ ჩემპიონთა ლიგის ფინალში გატანილი გოლი მეტყველებს.
- თქვენ შარშანდელი სუპერთასი გააცდინეთ. სწორედ მაშინ გადახვედით "სევილიიდან" "ბარსელონაში". ალბათ, განსაკუთრებული მოლოდინი გაქვთ კარსმომდგარი სუპერთასისა...
- რა თქმა უნდა, მოლოდინი არის. მიმაჩნია, რომ ახლა მექნება შანსი, რომელიც არ მქონია გასულ წელს. დიდი იმედი მაქვს, რომ მივიღებ მონაწილეობას თბილისში გასამართ შეხვედრაში. კარგია,
- საინტერესოა, რას ნიშნავს თქვენთვის "სევილია"?
- გადაუჭარბებლად ვიტყვი, რომ ყველაფერს. როცა მე ჩემს სახლში მივდივარ, სევილიაში, ვამბობ, რომ მივდივარ შინ. იქ არის ჩემი მეუღლე, იქ დაიბადა ჩემი გოგონა. "სევილიასთან" ძალიან ბევრი რამ მაკავშირებს. ეს ძალზე სპეციფიკური მომენტია.
ჩემთვის ძვირფასია არა მხოლოდ საფეხბურთო კლუბი "სევილია", არამედ ეს ქალაქი და ხალხი, რომელიც იქ ცხოვრობს. ყოველივე ეს ახლობელია ჩემთვის. მე სევილიას მშობლიურ ქალაქად მივიჩნევ.
- თქვენ ცოტა ხნის წინ ჩემპიონთა ლიგა მოიგეთ. როგორი შეგრძნებაა?
- ძალიან ამაყი და ბედნიერი ვარ. თანაც, ამ ტიტულს განსაკუთრებული მნიშვნელობა ჰქონდა ჩვენი გუნდისათვის, რადგან წინა სეზონში ჩვენ ვერ მოვახერხეთ ჯილდოს მოგება.
დღემდე არ მავიწყდება, როგორ აღნიშნა "ბარსელონას" გულშემატკივარმა ეს ტიტული. რა გახარებული იყო ხალხი... საერთოდ, შესანიშნავი გრძნობაა, როცა ადამიანებს სიხარულს ანიჭებ. ჩვენ ეს შევძელით და ყველანი ბედნიერები ვართ.
ეს იმას არ ნიშნავს, რომ ტიტულების მოგება მოგვწყინდა. პირიქით, თითოეული ბარსელონელი იწვის ამის სურვილით. როცა სეზონს კარგი განწყობით იწყებ, მერე ეს განწყობა მთელი წლის განმავლობაში გაგყვება ხოლმე. ეს კიდევ უფრო ზრდის სუპერთასის მნიშვნელობას.
- თქვენი მეტოქე "სევილიაა"...
- ძალიან თავისებური თამაში გამოვა. "სევილია" ერთობ კარგი გუნდია. ჩვენ ეს ვნახეთ შარშან როგორც პრიმერადივიზიონში, ისევე ევროპალიგაზე. ჩვენ დიდ პატივს ვცემთ მოწინააღმდეგეს და ეს არ არის მოვალეობის მოხდის მიზნით ნათქვამი სიტყვები. ჩვენ ვართ "ბარსელონა", ჩვენგან ყველა გამარჯვებას ითხოვს და ჩვენ მზად ვართ, გავიმარჯვოთ. საამისოდ დიდი ბრძოლა მოგველის, მაგრამ ამ ბრძოლაში არაფრის დათმობას ვაპირებთ და გვაქვს კიდეც ამის რესურსი.
- როგორ ფიქრობთ, ჩემპიონთა ლიგის ფინალში გატანილი გოლი თქვენს კარიერაში ყველაზე მნიშვნელოვანია?
- გეთანხმებით - ეს ძალიან ამაღელვებელი და მნიშვნელოვანი მომენტი იყო. თანაც, გავითვალისწინოთ, როგორ კომბინაციას მოჰყვა ეს გოლი. სუფთა ბარსელონური ბურთი იყო. ეს იყო გუნდურობის ნიმუში. მინდა, მადლობა გადავუხადო ჩემს პარტნიორებს, ასე მოკლე დროში სასურველ პოზიციაზე რომ გამიყვანეს. რომ არა მათი ძალისხმევა, მე ამ წარმატებას ვერ მივაღწევდი. საერთოდ, მე ძალიან მიყვარს გუნდური ფეხბურთი.
- თქვენი აზრით, რამ განაპირობა "ბარსელონას" გამარჯვება ბერლინში, ჩემპიონთა ლიგის ფინალში?
- ერთ-ერთი მთავარი მომენტი, რამაც განაპირობა ჩვენი წარმატება, იყო ის, რომ "ბარსელონას" არასოდეს გადაუხვევია თავისი არჩეული გზისათვის. ჩემი აზრით, სწორედ ამან განაპირობა "ბარსელონას" ტრიუმფი. ჩვენ არასოდეს ვნებდებით. იშვიათად ვკარგავთ ბურთს. გვაქვს ყველასაგან გამორჩეული ხელწერა. სწორედ ეს განაპირობებს იმას, რომ "ბარსა" საუკეთესოა მთელ მსოფლიოში. შემთხვევითობა არ არის ჩვენს წარმატებაში.
- წლეულს ისევ იფიქრებთ ჩემპიონთა ლიგის მოგებაზე...
- რა თქმა უნდა, სხვანაირად წარმოუდგენელია. ჩვენ ვებმებით ბრძოლაში, რომელშიც ევროპის ყველა საუკეთესო გუნდი მონაწილეობს და ეს, ნებისმიერ შემთხვევაში, განსაკუთრებული მოტივაციაა.
ვეთანხმები გავრცელებულ აზრს იმის თაობაზე, რომ ზოგადად, ტიტულის მოპოვებაზე რთული მისი შენარჩუნებაა. ჩემპიონთა ლიგის მოქმედი გამარჯვებულის წინააღმდეგ ყველა განსაკუთრებული მოტივაციით თამაშობს.
"ბარსელონას" ეს არ აშინებს. გუნდი მომართულია დიდი გამარჯვებების მოსაპოვებლად. ჩვენ შეგვიძლია ზედიზედ მეორედ მოვიგოთ ჩემპიონთა ლიგა და ამით შევიდეთ მსოფლიოს ფეხბურთის ისტორიაში.
- სტატისტიკას ყოველთვის აკვირდებით?
- ყოველთვის არა, მაგრამ ვცდილობ, მნიშვნელოვანი ნიუანსები არ გამომრჩეს მხედველობიდან.
ყოველდღიური სპორტული გაზეთი "ლელო"
