ბოლო დროს ბევრს წერენ იმის თაობაზე, რომ ჯადოსნური "ბარსელონა", რომელმაც არაეთი ულამაზესი წუთი თუ ეპიზოდი აჩუქა ფეხბურთის გულშემატკივარს, დაიშლება. ხალხს სჭირდება სენსაცია ფეხბურთის გმირებზე და ჟურნალისტებიც ამ სენსაციას ეძებენ. ზოგჯერ ისინი პოულობენ იმას იქ, სადაც საერთოდ არ არსებობს.
არაერთხელ და არაერთგან დაიწერა, ამ ფორმაციის "ბარსა" მალე დაიშლებაო. ის კი არა, ნეიმარის წასვლა გადაწყვეტილ ამბადაც კი შერაცხეს და სწორედ ამ დროს ნეიმარების ოჯახი და კატალონიური გრანდი ახალ კონტრაქტზე ლამის შეთანხმდნენ.
ლიონელ მესისთან დაკავშირებით საქმე სხვაგვარადაა. მესის მოქმედი კონტრაქტი აქვს "ბარსასთან", მაგრამ
მესი კი ჯიუტად ამბობს, რომ ის კატალონიურ კლუბში ბედნიერია და არსად წასვლას არ აპირებს. კაცმა რომ თქვას, მას საამისო მიზეზი არც აქვს. ძველი, მრავალნაცადი ჭეშმარიტებაა, რომ სამოთხიდან არასოდეს არავინ გარბის. მესიც სამოთხეშია, ამქვეყნიურ სამოთხეში.
ლიდერი
მესი, ნეიმარი, სუარესი - "ბარსელონას" ამ სამეულს ტოლი არ ჰყავს. სამივე დაბადებულია ლიდერად. სამივე უდიდესი ვარსკვლავია. სამიდან ორი აღიარებს, რომ ამ სამეულში არგენტინელი უპირველესია."მე ვიცი, რომ მესი პირველია. ჩვენ ვეხმარებით მას და როგორ გამოგვდის ეს, სხვებმა უნდა განსაჯონ. დღევანდელ ფეხბურთში არ არის მესის დონის მოთამაშე." - ეს "ბარსელონას" და ბრაზილიის ნაკრების ლიდერის, ნეიმარის სიტყვებია.
"ამ თემაზე მე ვიტყვი მხოლოდ ერთს - ლიონელი უპირველესია. მგონი, ეს საკამათო და გასარჩევი არც არის. მე ბედნიერი ვარ იმით, რომ მასთან ერთად მიწევს თამაში. რაც შეეხება გუნდში არსებულ სიტუაციას, პირდაპირ უნდა ვთქვა, რომ ის იდეალურია." - დიდი გამოცნობა არ სჭირდება იმას, რომ ამჯერად ურუგვაელი სუპერმეგოლე, ლუის სუარესი გველაპარაკება.
სიყვარული
მესი "ბარსელონას" გულშემატკივრებისათვის ნამდვილი კერპია. "კამპ ნოუ" ლამის ყოველთვის ივსება და ამის მთავარი შემომქმედი არგენტინელი გენიოსია. მის გარეშე იქ გასამართ საფეხბურთო სპექტაკლებს ბრწყინვალება მოაკლდება."მესი ჩვენთვის ყველაფერია. ჩვენ მას ისე ველოდებით, როგორც უდაბნოში მიმავალი მოგზაური - ოაზისს. ჩვენ მივდივართ ამ განუმეორებელი ფეხბურთელის სანახავად და გვჯერა, რომ ეს შოუ არასოდეს დამთავრდება." - ეს სიტყვები ეკუთვნის მარკს, "ბარსას" სტაჟიან გულშემატკივარს.
"მე აქ გავიზარდე. ეს ჩემი სახლია. ვერ ვხედავ ვერანაირ მიზეზს, რომ სხვაგან წავიდე. მინდა, კარიერა ამ კლუბში დავასრულო და აქაურობის სამუდამო ნაწილი ვიყო. სხვაგან მე ვერ ვიპოვი იმას, რაც აქ მაქვს. სხვაგან მე ასე არ ვეყვარები." - ეს უკვე ჩვენი წერილის მთავარი გმირის ნააზრევია, რომელსაც არ შეიძლება არ დაეთანხმო.
საერთოდ, ბევრი ლიონელ მესის უფრო კატალონიელ ფეხბურთელად მიიჩნევს, ვიდრე არგენტინელად, მაგრამ ეს უკვე სულ სხვა წერილის თემაა. ჩვენ კი ჩვენი წერილი გავაგრძელოთ.
მწვრთნელის ნდობა
ლუის ენრიკეს მესი ძალიან უყვარს. ის მიიჩნევს, რომ როცა ასეთ ფეხბურთელთან გაქვს საქმე, მას სრული თავისუფლება უნდა მისცე. "ბარსელონას" დამრიგებელი ამბობს, რომ ლიონელი დღეს ნომერ პირველი ფეხბურთელია მსოფლიოში."რა თქმა უნდა, მესი პირველია დღევანდელ ფეხბურთში. მას ჩემი მხრიდან აქვს დიდი ნდობა, განუსაზღვრელი კარტ - ბლანში. ის ჩარჩოებში რომ მოაქციო, ზოგადად ფეხბურთის მტერი უნდა იყო, მე კი ასეთთა კატეგორიას თავს ნამდვილად ვერ მივაკუთვნებ.
რა თქმა უნდა, დღევანდელ ფეხბურთში ინდივიდუალისტები ძალიან ბევრს წყვეტენ. მე მიყვარს ინდივიდუალისტები. ცხადია, კოლექტიური თამაში დგას პირველ პლანზე, მაგრამ ინდივიდების უგულვებელყოფა არასოდეს არ შეიძლება. ისი ფეხბურთს ალამაზებენ." - მიიჩნევს ლუის ენრიკე.
ის მესის სრულ თავისუფლებას აძლევს. მესი ამ თავისუფლებას იყენებს. მწვრთნელსა და ფეხბურთელს ძალიან კარგად ესმით ერთმანეთის.
პერსპექტივა
სადაც უნდა წავიდეს მესი, მას ახალი გუნდის "ბარსელონას" დონემდე მისაყვანად გარკვეული დრო დასჭირდება. "ბარსელონა" კი დღეს შეუჩერებელი ჩანს. კატალონიური კლუბი არგენტინელ გენიოსთან ერთად კიდევ არაერთ ტიტულს მოიგებს.მესი დარჩება "ნოუ კამპზე", მესი მოხსნის ბევრ რეკორდს. მესი კიდევ უფრო მაგარი იქნება და არც ეს "ბარსელონა" დაიშლება. ამით მთლიანად ფეხბურთი წააგებს. სამოთხიდან არ გარბიან - ეს ყველასათვის ცნობილია.
რატომ უნდა გაიქცეს მესი?
ყოველდღიური სპორტული გაზეთი "ლელო"
