გინესის რეკორდების წიგნში შევსებაა - მასში სამი ფეხბურთელი მოხვდა. კრიშტიანო რონალდოს ეს პატივი იმის გამო ერგო, რომ ის "ტვიტერში" მსოფლიოს ყველაზე პოპულარული სპორტსმენია - 47 მილიონი "მიმდევარი" ჰყავს. აღსანიშნავია, რომ პორტუგალიელი ზოგადად, სოციალურ მედიაშიც ყველაზე პოპულარული სპორტსმენია."არსენალის" გოლკიპერი პეტრ ჩეხი გინესის რეკორდების წიგნში იმიტომ მოხვდა, რომ მან პრემიერლიგის ისტორიაში ყველაზე მეტჯერ შეძლო კარის მშრალად შენახვა - 181 მატჩში.
წიგნის ახალი ვერსიის კიდევ ერთი ახალი წევრი გარეთ ბერია, რომელიც ყველაზე ხშირად ხდებოდა პრემიერლიგის ისტორიაში თავისი გუნდის სასტარტო შემადგენლობაში - 580-ჯერ.
წიგნში აღინიშნა "ლესტერ სიტის" მიღწევაც - ამ გუნდმა ყველაზე დიდი ნახტომი გააკეთა წინა სეზონთან შედარებით ჩემპიონობის მოსაპოვებლად. 2015 წელს "მელიებმა" სეზონი მე-14 ადგილზე დაასრულეს, შემდეგ კი, კლაუდიო რანიერის ხელმძღვანელობით, თანამედროვე საკლუბო ფეხბურთში ერთ-ერთი უდიდესი სასწაული ჩაიდინეს და ინგლისის ჩემპიონები გახდნენ.
წიგნის 2017 წლის ვერსიაში სხვა ბევრი სპორტსმენიც მოხვდა, მაგალითად, სერენა უილიამსი.
ყოველდღიური სპორტული გაზეთი "ლელო"
