Football Leaks: შარში გახვეული ვარსკვლავები და ბალოტელის საიდუმლო კონტრაქტი

როგორც შეგპირდით, "ლელო" პერიოდულად მოგაწვდით ინფორმაციებს Football Leaks-ის საგამოძიებო მასალებიდან.

ვინც არ გასცნობია წინა წერილს, რომელშიც ლაპარაკი იყო კრიშტიანო რონალდოს, მესუთ იოზილისა და ჟოზე მოურინიოს მიერ დიდი ოდენობით გადასახადების დამალვაზე, ასევე სახელგანთქმული დანიელი ფეხბურთელის, დღეს კი მწვრთნელის, მიკაელ ლაუდრუპისა და მისი თურქი აგენტის, ბაირამ თუთუმლუს შავ-ბნელ საქმიანობაზე, მათთვის ვიტყვით, რომ Football Leaks არის პოლიტიკური "ვიკილიქსის" მსგავსი ორგანიზაცია, რომელიც შვიდ ევროპულ გამოცემას (გერმანული Der Spiegel, ესპანური El Mundo, ავსტრიული Der Falter, ბელგიური Le Soir, დანიური Politiken, იტალიური L'Espresso, ფრანგული Mediapart, სერბული Newsweek Serbia და რუმინული RCIJ the Black See) აერთიანებს.

ეს გამოცემები საფეხბურთო სამყაროში არსებულ უკანონო სატრანსფერო გარიგებებს, გადასახადების დამალვის ფაქტებსა და სხვა მაქინაციებს ამზეურებენ...

თუ გასაჯაროებულ დოკუმენტებს დავუჯერებთ, და არ გვაქვს საფუძველი, არ დავუჯეროთ, დარჩება შთაბეჭდილება, რომ "რეალის" ფეხბურთელებს გადასახადების დამალვა ლამის წესად აქვთ ქცეული.

შესაძლოა, მალე სხვა კლუბების მოთამაშეებზეც გავიგოთ ანალოგიური ფაქტები, მაგრამ დღეს ამ მხრივაც (ისევე, როგორც ლა ლიგის მიმდინარე გათამაშებაში) ლიდერი "რეალია".

კრიშტიანო რონალდოსა და მესუთ იოზილის შემდეგ გადასახადებისგან თავის არიდების გამო სპეციალური ორგანოები, ალბათ, მალე მიაკითხავენ ფაბიო კოენტრაოს, პეპესა და ლუკა მოდრიჩს.

ირკვევა, რომ კოენტრაომ და პეპემ 7 მილიონ ევროზე მეტი დაუმალეს საგადასახადო სამსახურს, საიმიჯო უფლებების გაყიდვით მიღებული შემოსავლებიდან.

ისინი ამ ფულს ოფიციალური გზის გვერდის ავლით, ოფშორული კომპანიებიდან იღებდნენ. პეპე, ისევე, როგორც რონალდო, გავლენიანი პორტუგალიელი აგენტის, ჟორჟე მენდეშის კომპანია Weltex Capital Limited-ის (რეგისტრირებულია ბრიტანეთის ვირჯინიის კუნძულებზე) კლიენტია. სწორედ ამ კომპანიიდან მიიღო პეპემ 2009 წლიდან 2014-ის ჩათვლით 3.7 მილიონი ევრო.

რაც შეეხება კოენტრაოს, მას 3.5 მილიონი ევრო ერთ-ერთი პანამური ორგანიზაციისგან ჩაერიცხა.

სხვათა შორის, კოენტრაოს შემოსავალი 2011 წლის შემდეგ არ გაუსაჯაროებია. არადა, ესპანეთში ის 2011 წლის ზაფხულიდან ცხოვრობს, ანუ გამოდის, რომ ამ სახელმწიფოს ბიუჯეტში დღემდე ერთი ცენტიც არ გადაუხდია.

აი, მოდრიჩმა კი ჟორჟე მენდეშის სქემებში მონაწილეობა არ ისურვა და კავშირი გააბა ერთ-ერთ ლუქსემბურგულ კომპანიასთან, ხოლო საქმეების გამგებლობა მეუღლეს დააკისრა. დადგენილია და წყალი არ გაუვა იმ ფაქტს, რომ 2013 და 2014 წლებში მოდრიჩის შემოსავლები დეკლარირებული არ არის. "ელ მუნდო" წერს, რომ მოდრიჩები ფულს თავიანთი კომპანიის, Ivano SARL-ის (ივანო - მათ ვაჟს ჰქვია) ანგარიშზე 2012 წლიდან იღებენ, რის შემდეგაც ეს სახსრები სხვადასხვა საინვესტიციო ფონდსა თუ ფირმაში ნაწილდება.

"ელ მუნდოს" ინფორმაციით, თუ კრიშტიანო რონალდოს გადასახადებისგან თავის არიდება დაუმტკიცდა, 6-წლიანი პატიმრობა ემუქრება. ცნობილი გახდა, რომ 2009-დან 2014 წლის ჩათვლით, მან ესპანეთის სამეფოს ბიუჯეტს მთელი 64 მილიონი ფუნტი დაუმალა.

რაკი საქმე სახელმწიფოს ეხება და სერიოზული კრიმინალია, ჟურნალისტებმა გახმაურებულ ამბავზე კომენტარი მთლად ესპანეთის პრემიერ-მინისტრ მარიანო რახოისაც სთხოვეს:

"რონალდო? ვცდილობ, არასოდეს ვიფიქრო იმ საქმეზე, რაშიც ღრმად არ ვარ ჩახედული. ეს საგადასახდო ორგანოების საქმეა და ჯობია, მათ ჰკითხოთ", - აი, ასე ლაკონიურად შემოიფარგლა პრემიერი.

ჩვენ ვიცით, რომ ფეხბურთელები ბონუსებს იღებენ ამა თუ იმ მატჩის მოგებისთვის ან გატანილი გოლისთვის... ანუ ყველა იმ ქმედებისთვის, რაც მათ პროფესიულ საქმიანობას უკავშირდება და ეს ყველა კონტრაქტშია დაფიქსირებული. მაგრამ აღმოჩნდა, რომ არსებობს ეგრეთ წოდებული საიდუმლო კონტრაქტებიც, რომლებიც Football Leaks-მა გაშიფრა...

როცა 2014 წელს მარიო ბალოტელი "ლივერპულში" გადავიდა, ოფიციალური ხელშეკრულების პარალელურად, კონსპირაციულ დოკუმენტზეც შესთავაზეს ხელის მოწერა. აი, რა წერია ამ დოკუმენტში:

"თუ "ლივერპულში" გატარებული ყოველი სეზონის განმავლობაში ფეხბურთელს (ჩვენს შემთხვევაში - ბალოტელის) არ გააძევებენ 3-ჯერ და მეტად - უხეშობისთვის, მეტოქე გუნდის ფეხბურთელის ან სხვა პირების შეფურთხებისთვის, სიტყვიერი და ფიზიკური შეურაცხყოფისთვის, ასევე, სხვა აგრესიული ქმედებებისთვის, მაშინ ყოველი სეზონის ბოლოს, 30 ივნისისთვის, ფეხბურთელი მიიღებს ბონუსს 1 მილიონი ფუნტის ოდენობით".

სასაცილოა, არა? ანუ სეზონში ორჯერ უზრდელობა დასაშვები ყოფილა და კლუბი მზად არის, ამაში ბონუსები იხადოს. მაგრამ ამაში არის მეორე მხარეც - კლუბი შანსს აძლევდა თავქარიან ფორვარდს, ემოციები ეკონტროლებინა და ამით შემოსავალი მიეღო.

"ლივერპულში" ყოფნის პირველ 30 დღეზე კლუბმა იტალიელს უქირავა ფეშენებელური სასტუმროს ოთახი და ყოველდღიური ხარჯებისთვის 10 ათასი ფუნტიც გამოუყო, ოღონდ გააფრთხილა, რომ თითოეულ გადაჭარბებულ დანახარჯზე თავად იქნებოდა პასუხისმგებელი.

"ლივერპული" მას კვირაში ოფიციალურად 85 ათას ფუნტს (წელიწადში 4.25 მილიონი) უხდიდა. ასევე, კონტრაქტით გათვალისწინებული იყო, რომ თუ ბალოტელი პრემიერლიგასა და ევროტურნირებზე 5 და მეტ გოლს გაიტანდა, 50 ათას ფუნტს მიიღებდა, კიდევ ხუთში უფრო მეტს და ასე შემდეგ. მაგრამ რა გამოვიდა? 2 წლის განმავლობაში, "სუპერმარიომ" მხოლოდ 16 მატჩი ჩაატარა და 1 გოლი გაიტანა. შესაბამისად, ოფიციალური კონტრაქტით მას ბონუსი არ რგებია.

სამაგიეროდ, როცა 2014 წელს ბალოტელიმ ანტისემიტური მესიჯები გაავრცელა და დისკვალიფიკაცია გამოუწერეს, მაინც მიიღო ბონუსი სეზონის ბოლოს, თან იმ 16 შეხვედრაში, რომელიც "ლივერპულის" მაისურით ჩაატარა. გაგიკვირდებათ და, ერთხელაც არ გაუძევებიათ. ასე რომ, იყავი უზრდელი "დასაშვებ" ფარგლებში და ბონუსები არ აგცდება.

კიდევ ერთი უცნაურობა - ცნობილია, რომ ინგლისის პრემიერლიგის ფეხბურთელები იღებენ 5-დან 20 ათას ფუნტამდე პრემიას თითოეული მოგებული მატჩისთვის, თუმცა "ტოტენჰემის" მეკარე უგო ლორისი 3.500 ფუნტით მდიდრდება იმ შემთხვევაშიც კი, თუ მისი გუნდი ფრედ ითამაშებს, ან სულაც წააგებს.

ანუ ლორისი პრემიებს იღებს... გაშვებულ გოლებშიც კი. საქმე ისაა, რომ "ტოტენჰემის" მოთამაშეთა კონტრაქტები ბონუსებს (3.500 ფუნტი) იმ შემთხვევაშიც კი ითვალისწინებს, თუ ფეხბურთელი სასტარტო შემადგენლობაში მოხვდება...

ყოველდღიური სპორტული გაზეთი "ლელო"