9-დან 19 აგვისტომდე საქართველოს 18-წლამდელთა ნაკრები ბოსნიის დედაქალაქ სარაევოში ევროპის ჩემპიონატის B დივიზიონში ითამაშებს. მიხეილ ბერუაშვილის გუნდის მეტოქეები მასპინძელი ბოსნია, ბელგია, პორტუგალია და ჰოლანდია იქნებიან. საქართველოს ნაკრებმა აღნიშნული შეჯიბრებისთვის ვარჯიში გასული წლის ოქტომბრიდან დაიწყო. მწვრთნელებმა - მიხეილ ბერუაშვილმა და ზაზა გაბისონიამ უკვე 30-ამდე კანდიდატი გამოსცადეს და სასელექციო სამუშაო კვლავაც გრძელდება.
18-წლამდელთა ნაკრებს საკალათბურთო აკადემიის დარბაზში, ერთ-ერთი ვარჯიშისას ვეწვიეთ და მთავარ მწვრთნელს, მიხეილ ბერუაშვილს გავესაუბრეთ.
- მზადების რა ეტაპზე იმყოფებით?
- ევროპის ჩემპიონატის მატჩებამდე ჯერ საკმარისი დროა. ამჯერად სასელექციო მუშაობას ვეწევით.
- ნაკრებს როგორი გრაფიკით ავარჯიშებთ?
- ვარჯიშები კვირაობით გვაქვს, რათა ბიჭებს ხელი სწავლასა და საკუთარ კლუბებში თამაშში არ შეეშალოთ. ამ ეტაპზე ეს გრაფიკი საკმარისია. რაც უფრო მოახლოვდება აგვისტო, ვარჯიშების რაოდენობასა და დატვირთვებს თანდათან გავზრდით.
- რამდენად ხელსაყრელი სავარჯიშო პირობებით გაქვთ?
- პირობები შესანიშნავია, მოგეხსენებათ, გარემონტდა კალათბურთის აკადემია, გაკეთდა მეორე, სავარჯიშო დარბაზი. აქ სითბო და ხარისხიანი ვარჯიშისთვის ყველანაირი პირობაა შექმნილი.
- მხოლოდ აქ მოემზადებით, თუ შეკრებასაც გეგმავთ?
- კონკრეტულ თარიღებზე საუბარი ჯერ ნაადრევია, მაგრამ მოსამზადებელ პერიოდში, როცა გუნდი უკვე ჩამოყალიბებულ სახეს მიიღებს, შეკრებებიც გვექნება და საერთაშორისო ამხანაგურ მატჩებსაც გავმართავთ. B დივიზიონის მატჩებისთვის საფუძვლიანად მოვემზადებით.
- ევროპის ჩემპიონატის წინა გათამაშებაში ჯგუფიდან ვერ გახვედით. ახლა რას უნდა ველოდოთ?
- ამ ეტაპზე ძნელია საუბარი, მეტოქეებზე ინფორმაციას არ ვფლობთ. ასაკობრივ ნაკრებებში თაობა ყოველწლიურად იცვლება და მანამდე ვერ გაიგებ გუნდების რეალურ ძალას, სანამ არ ითამაშებენ. ბოსნიაში გასამართი ტურნირის დაწყებამდე ჩვენი მეტოქეები ამხანაგურ მატჩებს გამართავენ და ვეცდებით თამაშის ფირი მოვიპოვოთ და მომავალი მოწინააღმდეგეების თამაშები გავარჩიოთ. ერთი შეხედვით საკმაოდ ძლიერ ჯგუფში მოვხვდით, თუმცა რა მოხდება, წინასწარ ვერავინ იტყვის. ჩენ შესაძლებლობების მაქსიმუმს გავაკეთებთ.
gbf.ge
