ბოსნიის დედაქალაქ სარაევოში 8 აგვისტოს დაიწყო 16-წლამდელ კალათბურთელ ვაჟთა ევროპის პირველობა B დივიზიონში. საქართველოს ნაკრები D ჯგუფში მოხვდა, სადაც უმაღლესი ეშელონის საგზურებისთვის ბელარუსს, უნგრეთს, ლუქსემბურგსა და ავსტრიას დაუპირისპირდება.
შეგახსენებთ, რომ თითოეული ჯგუფიდან ორ-ორი საუკეთესო მომავალ ეტაპზე გავა და A ჯგუფის 3 საგზურისთვის იბრძოლებს, მეორე-მესამესადგილოსნები IX-VI ადგილებს, ხოლო ბოლო ორ ადგილზე გასულნი XVII-XXII ადგილებს გაინაწილებენ.
ზემოთ საქართველოს ნაკრების მეტოქეთა შორის არ დაგვისახელებია ჩეხეთის 16-წლამდელთა გუნდი, რომელსაც გია კაზანჯიანის შეგირდები 8 აგვისტოს დაუპირისპირდნენ. ანგარიში პირველსავე წამებზე ჩეხებმა გახსნეს (პურსლი), მაგრამ ლომიძემ მალევე
ქართველმა კალათბურთელებმა მეშვიდე წუთისთვის სხვაობა მინიმუმამდე დაიყვანეს, თუმცა პირველი პერიოდი მაინც დათმეს - 12:15. მატჩის მეორე ათწუთიანი მონაკვეთი უფრო დაძაბული აღმოჩნდა, რაზეც ისიც მეტყველებს, რომ ორივე გუნდმა მხოლოდ სამ-სამი შედეგიანი შეტევა განახორციელა. დიდ შესვენებაზე ჩეხები 4-ქულიანი უპირატესობით გავიდნენ.
მესამე პერიოდიც მათი უპირატესობით წარიმართა და სხვაობამ ათ ქულას მიაღწია. წაგების საფრთხე რომ იგრძნეს, ჩვენი ბიჭები გამოფხიზლდნენ, მატჩის სადავეები ხელთ იგდეს და შეხვედრის დამთავრებამდე 4 წუთით ადრე წონასწორობაც აღადგინეს - 43:43, მეტიც - ნახევარი წუთის შემდეგ ქულითაც გავიდნენ წინ - 47:46.
ცოტა ხანში შეჰნალმა და დლუგოშმა ისევ დააწინაურეს თავისიანები - 50:47. ბოლო 80 წამის განმავლობაში ორჯერ გაიბრწყინა გოგალაძემ - ჯერ ორქულიანი ჩააგდო, მერე ორი საჯარიმო გამოიყენა ზუსტად და საფინალო სასტვენამდე 11 წამით ადრე საქართველოს ნაკრები 51:50 დაწინაურდა. თითქოს, გამარჯვება შორს არ უნდა ყოფილიყო, მაგრამ...
თამაშის დასრულებამდე სამი წამი იყო დარჩენილი, შეჰნალმა არაზუსტად ტყორცნა სამქულიანი. ჩვენების ფარქვეშ ყველას პურსლმა დაასწრო და ორქულიანი ტყორცნით საკუთარ გუნდს ძნელი გამარჯვება მოუტანა - 52:51. ქართველმა კალათბურთელებმა დასანანი მარცხი განიცადეს.
ნამატჩევს ნაკრების მთავარმა მწვრთნელმა გია კაზანჯიანმა გულისტკივილით თქვა, რომ:
"მოგებული თამაში წავაგეთ. ყველაფერი ერთმა მოხსნამ გადაწყვიტა. ძალიან გულდასაწყვეტია, 14 ქულას რომ გააბათილებ, დაწინაურდები, მეტოქეს ბოლო შეტევა რჩება და ერთი მოხსნის გამო დამარცხდები.
წაგება წაგებად და მე უფრო იმის მეშინია, ეს მომენტი ჩვენს ბიჭებზე ფსიქოლოგიური წნეხის ტოლფასი არ აღმოჩნდეს და მომავალ მატჩებზეც არ იქონიოს გავლენა.
მთავარი ახლა ისაა, რომ ბიჭებმა ეს დასანანი მარცხი რაც შეიძლება, მალე დაივიწყონ და მომავალ მატჩებს მობილიზებულები შეხვდნენ.
ვუყურეთ ჩვენი ჯგუფის პირველ მატჩს და ვიტყვი, რომ ჩეხეთი ავსტრიაზეც ძლიერია და ბელარუსზეც. ჩემი აზრით, ჩეხეთი ჯგუფში პირველობისთვის იბრძოლებს.
ვნახოთ, რა იქნება, ვფიქრობ, ჯერ არაფერია დაკარგული. რაც შეეხება ბოლო ეპიზოდს, ჩეხებმა სამქულიანი იმ იმედით ისროლეს, რომ თუ ააცილებდნენ, მოხსნის და დამატების დრო დარჩენოდათ.
სამწუხაროდ, ყველაფერი სწორედ ასე მოხდა. გამოგვეპარა ჩეხების ყველაზე ძლიერი მოთამაშე, ესპანური "კახა ლაბორალის" წევრი სიმონ პურსლი, რომელმაც წარმატებით დაამატა და თავისიანებს მოაგებინა.
აღსანიშნავია, რომ მეტოქეს ბედმაც გაუღიმა, როცა აცილებული სამიანი სწორედ იქით წავიდა, საითკენაც ტანმაღალი ჩეხი იდგა".
საქართველო-ჩეხეთი 51:52
12:15, 7:8, 13:19, 19:10
საქართველო: ალიევი (2), კერესელიძე, ქვარაია, გოგალაძე (24), ცქიფურიშვილი (8), აფხაზავა, ლომიძე (2), თვალაბეიშვილი, ცირიკიძე (5), გოგობერიშვილი, ისიანი (10), გიორგაძე.
ჩეხთაგან პურსლი (15), შეჰნალი (9) და კუდრნა (6) გამოირჩნენ.
8 აგვისტოს ჩვენი ჯგუფის დანარჩენი ორი შეხვედრა ასე დასრულდა:
ავსტრია-ბელარუსი 66:51
(9:12, 16:14, 13:12, 28:13)
ლუქსემბურგი-უნგრეთი 54:91
(11:25, 20:29, 8:22, 15:15)
9 აგვისტოს ითამაშებენ: ჩეხეთი-ავსტრია, უნგრეთი-საქართველო, ბელარუსი-ლუქსემბურგი.
ყოველდღიური სპორტული გაზეთი "ლელო"
