რამდენად რეალურია, ამის გარკვევა უამრავ სირთულესთანაა დაკავშირებული, ევროშესარჩევის დასრულებამდე 3 ტურით ადრე გამსვლელ-დამრჩენთა ვინაობის გამოვლენა წინასწარმეტყველთა საქმე უფროა, მაგრამ ზოგადი
1. ჯგუფში პირველი ადგილის დაკავება მხოლოდ იმ შემთხვევაშია შესაძლებელი, თუ ქართველები ორივე დარჩენილ მატჩს მოიგებენ, ხოლო ბელგიელები სამივეს წააგებენ. ჩვენების ამბავი შესაძლებელია, მაგრამ ბელგიის ნაკრების სამი მარცხი - წარმოუდგენელი (დღეს ისინი პორტუგალიას მასპინძლობენ).
2. რადგან პირველი ადგილის დაკავების პრაქტიკული შანსი არ გვაქვს, განვიხილოთ მეორე პოზიციაზე მოსახვედრი გზა. ამისთვისაც აუცილებელია დარჩენილი ორი მატჩის მოგება. თან ბელგია პირველ ადგილზე მინიმუმ 6 მოგებით უნდა გავიდეს, რათა მას ქულებით პოლონეთი ვერ შეწვდეს. თუ პოლონელებმა, ბელგიელებმა და ქართველებმა (ნაკლებად სავარაუდოა, ბულგარელებმა) ტურნირი 5-5 მოგებით დაასრულეს, მაშინ დაითვლება ურთიერთშეხვედრებში მოგებათა რაოდენობა, რაც პოლონეთს (5 გამარჯვება რომ მოაგროვოს, ბელგიაში უნდა მოიგოს) პირველ ადგილზე აისვრის (3 გამარჯვება), ბელგიას (2 მოგება) - მეორეზე, ხოლო ერთმოგებიანი საქართველო მესამეზე დარჩება. აი, ამიტომ გვაწყობს ბელგიელთა მიუწვდომლობა.
თუ ბელგია შესარჩევს 6 მოგებით დაასრულებს, ხოლო ქართველებმა ორივე მატჩში იყოჩაღეს, მაშინ მეორე ადგილს ვერავინ შეგვეცილება: თუ ბულგარეთმა და პოლონეთმა საქართველოს მსგავსად შეჯიბრება ხუთი გამარჯვებით დაასრულეს, ურთიერთშეხვედრებში ვერ გვაჯობებენ: სამ გუნდს შორის ყველაზე მეტი მოგება ჩვენ მოგვიგროვდება - 3 (ზემოთ შევთანხმდით, რომ ბულგარეთს თბილისში უნდა ვაჯობოთ)...
როგორც ხედავთ, პორტუგალიაში წაგებამ პოლონეთის ჯგუფიდან გასვლის შანსი მკვეთრად შეამცირა, ისევე, როგორც ბულგარეთისა საქართველოსთან წაგებამ.
3. ...მაგრამ ჩ ჯგუფში მეორე ადგილის დაკავება მომდევნო ეტაპზე გასვლის გარანტიად არ გამოდგება, რადგან მხოლოდ სამი ჯგუფის ორი საუკეთესო მეორეადგილოსანი მიიღებს ლიტვის საგზურს (გაისად ევრობასკეტი იქ იმართება). საკითხავია, დარჩენილი ორივე მატჩის მოგება და მეორე ადგილი გაიყვანს საქართველოს ჯგუფიდან? ეს დღეს რთული სათქმელია. უნდა ვისურვოთ, რომ
სხვაჯგუფელ მეორეებს ჩვენზე მეტი წაგება მოუგროვდეთ.
A ჯგუფში მეორე ადგილზე პრეტენზიას ისრაელი და იტალია აცხადებენ. პირველს 2 წაგება აქვს, მეორეს - 3. გადახედეთ დარჩენილი მატჩების განრიგს და თავად განსაზღვრეთ, რამდენი შეხვედრის მომგებები არიან იტალია და ისრაელი...
B ჯგუფში მეორეზე, ალბათ, მაკედონიის ნაკრები გავა. იგი დღეს დიდ ბრიტანეთს უმასპინძლებს და თუ მოიგო, არათუ საუკეთესო მეორე ადგილსაც ვერავინ შეეცილება, არამედ პირველი პოზიციის დაკავების შანსიც გაუჩნდება. თუ წააგო, ბოლო ტურში ბოსნიაში მაკედონიელთა მარცხი უნდა ვისურვოთ, რათა 4 წაგება მოუგროვდეს. 3 მარცხის შემთხვევაში მაკედონიელებს უარესი მაჩვენებლის მქონე მეორეადგილოსნობა არ ემუქრებათ, რადგან მიღებულ-გაშვებული ბურთების კარგი ბალანსი აქვთ.
4. მივადექით მიღებულ-ჩაგდებულ ქულებს. კი ვისურვეთ მაკედონიის, იტალიისა და ისრაელის ოთხ-ოთხი წაგება, მაგრამ შესაძლოა, საბოლოოდ რომელიმე მათგანმა შესარჩევი საქართველოსავით 3 მარცხით დაასრულოს. ასეთ შემთხვევაში დაითვლება თანაბარქულიანი გუნდების მიღებულ-ჩაგდებული ქულების ბალანსი (კიდევ ერთხელ გადახედეთ ცხრილებს და ისრაელ-იტალია-მაკედონიის ბალანსი საქართველოს ნაკრებისას შეადარეთ).
სწორედ ამიტომაა ბელგიასთან დიდი სხვაობით წაგება დასანანი. თუმცა გვახსოვს პოლონეთთან 19-ქულიანი მოგება და იმედი დავიტოვოთ, რომ დარჩენილ შეხვედრებში ქართველები ბურთების ბალანსსაც გაიუმჯობესებენ.
აქვე შეგახსენებთ, რომ, თუ წლეულს ვერ მოვხვდით ევრობასკეტზე გამსვლელ ხუთეულში (სამი პირველადგილოსანი, ორი მეორე), მომავალ აგვისტოს სექტემბერში გასამართ ევროპის ჩემპიონატზე მოხვედრისთვის ექვს გუნდთან ერთად გავითამაშებთ ერთ საგზურს.
26 აგვისტომდე ქართველები ისვენებენ, დღეს პოლონეთთან ბულგარეთს ვუქომაგოთ, ფინეთს - იტალიასთან, ლატვიას - ისრაელთან, ბრიტანეთს - მაკედონიასთან.
A ჯგუფი
20 აგვისტო
იტალია-ლატვია 109:93
ჩერნოგორია-ფინეთი 91:71
1. ჩერნოგორია 6 5 1 495/420 11
2. იტალია 6 3 3 473/461 9
3. ისრაელი 5 3 2 425/397 8
4. ლატვია 6 2 4 487/540 8
5. ფინეთი 5 1 4 355/417 6
23 ავისტო
ფინეთი-იტალია
ლატვია-ისრაელი
26 აგვისტო
ისრაელი-ფინეთი
იტალია-ჩერნოგორია
29 აგვისტო
ფინეთი-ლატვია
ჩერნოგორია-ისრაელი
B ჯგუფი
20 აგვისტო
უკრაინა-ბოსნია 87:69
უნგრეთი-მაკედონია 85:82
1. მაკედონია 6 4 2 468/402 10
2. დ. ბრიტანეთი 5 5 0 435/398 10
3. უკრაინა 6 2 4 432/458 8
4. უნგრეთი 6 2 4 420/467 8
5. ბოსნია 5 1 4 361/391 6
23 აგვისტო
ბოსნია-უნგრეთი
მაკედონია-ბრიტანეთი
26 აგვისტო
უნგრეთი-უკრაინა
ბრიტანეთი-ბოსნია
29 აგვისტო
უკრაინა-ბრიტანეთი
ბოსნია-მაკედონია
C ჯგუფი
20 აგვისტო
საქართველო-ბელგია 63:86
პორტუგალია-პოლონეთი 85:84 დ.დ.
1. ბელგია 5 4 1 385/358 9
2. საქართველო 6 3 3 425/428 9
3. პოლონეთი 6 3 3 465/438 9
4. ბულგარეთი 5 3 2 392/350 8
5. პორტუგალია 6 1 5 398/491 7
23 აგვისტო
პოლონეთი-ბულგარეთი
ბელგია-პორტუგალია
26 აგვისტო
ბულგარეთი-ბელგია
პორტუგალია-საქართველო
29 აგვისტო
საქართველო-ბულგარეთი
ბელგია-პოლონეთი
