7 სექტემბერს, საქართველოს საკალათბურთო ნაკრებმა სლოვენიაში მიმდინარე ევროპის ჩემპიონატზე თავის მესამე შეხვედრას მასპინძლებთან გამართა და ტურნირზე ზედიზედ მეორე მარცხი იწვნია.სლოვენიის ნაკრებმა გამარჯვება დაძაბულ ბრძოლაში მოიპოვა - 72:68 (13-19, 31-13, 10-14, 18-22).
იგორ კოკოშკოვის შეგირდებმა შეხვედრა აქტიურად დაიწყეს და განსაკუთრებით დაცვაში კარგი თამაშის წყალობთ, პირველი პერიოდი ექვსქულიანი უპირატესობით მოიგეს.
ქართველმა კალათბურთელებმა მეორე მეოთხედიც კარგად დაიწყეს და ანგარიშის სხვაობა 11 ქულამდეც გაზარდეს, მაგრამ ეს იყო და ეს. ამის შემდეგ სლოვენიელებს ყველაფერი გამოსდიოდათ, ჩვენებს კი - არაფერი. მასპინძლებმა განსაკუთრებით კარგად სამქულიანები ისროლეს.
ვერ ვიტყვით, რომ მესამე მეოთხედში ქართველმა კალათბურთელებმა თამაში გამოასწორეს. უფრო მასპინძლებმა მოუხშირეს შეცდომებს და ჩვეული შედეგიანობით ვეღარ ისროდნენ, რის შედეგადაც პერიოდი ოთხი ქულით მოვიგეთ.
ამრიგად, ბოლო მეოთხედის წინ სხვაობა 8 ქულა იყო, რისი გაქვითვაც შეუძლებელი ნამდვილად არ იყო, მაგრამ...
როგორც მოსალოდნელი იყო, ბოლო მეოთხედი დაძაბული გამოდგა. ქართველმა კალათბურთელებმა ანგარიშში ჩამორჩენის შემცირება 1 ქულამდეც შეძლეს, მაგრამ უპატიებელი შეცდომების გამო, მატჩის ბედის თავის სასიკეთოდ გადაწყვეტა ვერ მოახერხეს.
იხილეთ ვიდეო
იხილეთ ფოტოგალერეა
C ჯგუფის სხვა მატჩებში ესპანეთის ნაკრებმა ჩეხეთს 60:39 სძლია, ხორვატიამ კი პოლონეთი 74:70 დაამარცხა.
ამრიგად, მესამე ტურის შემდეგ, ჯგუფს 6 ქულით დაუმარცხებელი სლოვენია ლიდერობს, 5-5 ქულა აქვთ ესპანეთსა და ხორვატიას. საქართველოს და ჩეხეთს - 4-4, ჯგუფში ბოლო ადგილს 3 ქულით კი პოლონეთი იკავებს.
ევრობასკეტზე მომდევნო შეხვედრას საქართველოს ნაკრები 8 სექტემბერს, ჩეხეთის ნაკრების წინააღმდეგ გამართავს, ჯგუფის ბოლო მატჩში კი, 9 სექტემბერს, ესპანეთის ნაკრებს დაუპირისპირდება.
რამდენადაც ჯგუფიდან შემდეგ ეტაპზე 3 გუნდი გადის, იგორ კოკოშკოვის გუნდს თეორიული შანსი ჯერ კიდევ რჩება...
