ფაჩულიამ ერთ მომენტში უესტბრუკი დაჩაგრა, "გოლდენ სტეიტმა" "ოკლაჰომას" მოუგო [VIDEO]

19 იანვარს, დილით, ზაზა ფაჩულიას "გოლდენ სტეიტმა" "ოკლაჰომა" მიიღო და ანგარიშით 121:100 დაამარცხა.

ქართველი ცენტრი, ტრადიციისამებრ, სასტარტო ხუთეულში იყო და მოედანზე საბოლოო ჯამში 18:56 წუთი გაატარა. ამ ხნის განმავლობაში ფაჩულიამ 5 ქულა, 6 მოხსნა, 2 პასი და ერთი ჩაჭრა მოაგროვა, ბურთი კი ერთხელ დაკარგა. ზაზამ 5-დან 1 ორქულიანი და 5-დან 3 საჯარიმო ჩააგდო.

ერთ მომენტში ზაზა ფაჩულიამ უხეშად ითამაშა რასელ უესტბრუკზე. როცა მიმდინარე სეზონის სამმაგების მეფე ბლოკს უვლიდა, მას ფაჩულია უხეშად დახვდა და ამასთან ერთად, მარცხენა ხელი მოუხვდა რასელის სახეზე.

ამის გამო ფაჩულიამ არასპორტული ფოლი მიიღო. აღსანიშნავია, რომ ამ მომენტამდე, უესტბრუკმა ფარქვეშ შესვლისას ზაზას იდაყვი ჩაარტყა.

ყველაზე მეტი ქულა კევინ დურანტმა მოაგროვა, რომელმაც ყოფილ გუნდს 40 ქულა ჩაუგდო. ამასთან ერთად, დურანტმა 12 მოხსნაც მიითვალა და ორმაგი დუბლი გაიფორმა. სტეფ კარიმ 24 ქულა ჩააგდო, ხოლო კლეი ტომპსონმა - 14.

ასევე ორმაგი დუბლი გააკეთა დრეიმონდ გრინმა, რომელმაც 12 ქულა და 11 მოხსნა მიითვალა.

მოედნიდან არ გასულა სამმაგი დუბლის გარეშე რასელ უესტბრუკი, რომელმაც 27 ქულა, 13 პასი და 15 მოხსნა მოაგროვა. აღსანიშნავია, რომ ეს უესტბრუკისთვის 21-ე სამმაგი დუბლია მიმდინარე სეზონში. თუმცა ოკლაჰომელთა ლიდერმა ოკლენდელებთან მატჩში ბურთი 10-ჯერ დაკარგა.

ამ გამარჯვების შემდეგ "გოლდენ სტეიტს" 36 მოგება და 6 მარცხი დაუგროვდა. ამ მაჩვენებლით ოკლენდელები NBA-ს ლიდერობენ.

მომდევნო მატჩს ზაზა ფაჩულიას გუნდი 21 იანვარს, სტუმრად "ჰიუსტონთან" გამართავს. შეხვედრა ჩვენი დროით 05:00 საათზე გაიმართება.