NBA-ს ფინალურ სერიაში მედიის ყურადღების ცენტრში, სხვებთან ერთად, ფინალის მონაწილე ზაზა ფაჩულიაა მოქცეული. ამჯერად, მისი ინტერვიუ SFGate-მა გამოაქვეყნა:
"ზაზა ფაჩულია 90-იანი წლების საქართველოში ეუფლებოდა კალათბურთს, უფანჯრო დარბაზებში, სადაც არ იყო გათბობა და მას ხშირად ხელთათმანის ჩაცმა და ქუდის დახურება უხდებოდა. იმ ადგილზე ახლა ზაზა ფაჩულიას საკალათბურთო აკადემიაა, სადაც 500 ბავშვი ეუფლება კალათბურთს, არის ოთხი დარბაზი და კარგი პირობები, პარკეტი კი თვით "ბრედლის სენტერიდანაა" წამოღებული, სადაც ფაჩულია "მილუოკიში" თამაშისას ასპარეზობდა. საფარი 267 ნაწილად დაშალეს და გემით წაიღეს საქართველოში", - წერს საიტი.
როცა ფაჩულია 7 წლის იყო, მისმა ქვეყანამ დამოუკიდებლობა მოიპოვა და ინფრასტრუქტურის აღდგენა დასჭირდა. მაშინ წყალი და ელექტროობა დიდ სიმდიდრედ ითვლებოდა, ამერიკული TV არხი კი - ფუფუნება. ერთხელაც, როცა ზაზა NBA-ს ფინალს უყურებდა "ჩიკაგო ბულსის" მონაწილეობით, მან გაიფიქრა: "შევძლებ მეც აქ თამაშს?" - სწორედ ასეთი ოცნება აქვს ათასობით ბავშვს საქართველოში.
"კალათბურთის აკადემიაში მოთამაშე ბავშვები ჩემი მეგობრები არიან. ისინი მართლაც ბევრს შრომობენ. ისინი ამ ფინალურ სერიას დიდხანს ელოდნენ, ამაში დარწმუნებული ვარ", - აცხადებს ზაზა.
!["2+1" - რა ფოტოს აქვეყნებს ფაჩულია "გოლდენ სტეიტის" მორიგი ჩემპიონობის შემდეგ [PHOTO]](/pictures/image7/18d55b767c968851e93dbc58de20707b.jpg "\"2+1\" - რა ფოტოს აქვეყნებს ფაჩულია \"გოლდენ სტეიტის\" მორიგი ჩემპიონობის შემდეგ [PHOTO]")
