ზაზა ფაჩულია NBA-ს ორმაგი დუბლების მანქანად იქცა

star-telegram.com აქვეყნებს სტატიას სათაურით "დალას მავერიკსის" ზაზა ფაჩულია NBA-ს ორმაგი დუბლების მანქანად იქცა, რომელსაც აქვე გთავაზობთ:

"პორტლენდთან" ოვერტაიმში 115:112 მოგებული მატჩის შემდეგ "დალასის" ვარსკვლავი დირკ ნოვიცკი სიცილს ვერ იკავებდა, როცა მას თანაგუნდელის, ზაზა ფაჩულიას სარეკორდო 21 მოხსნაზე ჰკითხეს.

"ასე, დაახლოებით 6 მოხსნა მე მომპარა - მე 13 მოხსნა გამომივიდოდა და მას მაინც დარჩებოდა 15", - იხუმრა გერმანელმა, რომელმაც ეს მატჩი 28 ქულითა და 7 მოხსნით დაასრულა.


ფაჩულიას ამ სეზონში 12 ორმაგი მოხსნა აქვს და მეორე ადგილზეა ასოციაციაში. ეს კი ბევრს მეტყველებს კალათბურთელის შესახებ, რომელმაც კარიერის დიდი ნაწილი მეორეხარისხოვან როლებში გაატარა.

"ვფიქრობ, ის უკეთესი მომხსნელი და დამცველია, ვიდრე მეგონა. ზოგადად, ის უფრო სათადარიგო ცენტრი იყო კარიერის განმავლობაში, ასეთი ბიჭები კი გადამწყვეტ მომენტებში ნაკლებად ჩანან.

არადა, ის არის ბრწყინვალე მომხსნელი, დიდებულად იცავს ფარს და შეტევაშიც კარგია. მაღალი ბიჭისთვის შესანიშნავი დრიბლინგი აქვს. ამას ის ხანდახან აკეთებს. მერწმუნეთ, NBA-ში შეტევაში ასე თამაში ბევრ ცენტრს არ შეუძლია.

მოკლედ, ზაზა ჯერჯერობით ამ სეზონის მთავარი სიურპრიზია", - განაცხადა დირკ ნოვიცკიმ.

ამ თამაშში ერთმა ფაჩულიამ აჯობა "ბლეიზერსის" მთელ სასტარტო შემადგენლობას მოხსნებით - 21:19!

"ეს ის არის, რაც მევალება - მოხსნები, ბრძოლა, კარგი თამაში. ყოველთვის კარგად გრძნობ თავს, როცა თამაშს იგებ", - აცხადებს ფაჩულია, რომელმაც საპასუხოდ იხუმრა დირკის მიმართ: "რა გითხარი, დირკ, ხომ გახსოვს? უნდა დაიკავო სწორი პოზიცია ფარქვეშ, მოისროლო იქიდან მეტოქეები და მოხსნა შენია" - მიმართა მან ნოვიცკის და შემდეგ დაასრულა: "ეს ყველაფერი მე ვასწავლე. საოცარია, 37 წლის ასაკშიც კი კარგად სწავლობს".

"მავერიკსში" ჯერ კიდევ სწავლობენ ფაჩულიას ახალ-ახალ შესაძლებლობებს. არადა, ის 9 ივლისს აიყვანეს დრაფტის მეორე წრის კალათბურთელის სანაცვლოდ.

"ის ჩვენი გუნდის ერთ-ერთი ყველაზე სტაბილური ბიჭია. "პორტლენდთან" კი დიდი მატჩი ჰქონდა. მეტოქე სწორედ მოხსნებით გამოირჩევა და როცა ასეთ გუნდს 20-ზე მეტ ბურთს მოუხსნი, საოცარია", - ამბობს "დალასის" მწვრთნელი რიკ კარლაილი.

"დალასი" ახლა "ჰიუსტონს" ხვდება, რომელსაც არ ეყოლება მთავარი მომხსნელი დუაიტ ჰოვარდი.

"ფაჩულია ძალიან მნიშვნელოვანი ფიგურაა, როგორც დაცვაში, ისე შეტევებშიც, რადგან შეტევებში თანაგუნდელებისთვის ხელსაყრელ სიტუაციებს ქმნის. დაცვაში კი ის ყველაფერს ხედავს, ყველას აკონტროლებს, ის კარგი კომუნიკატორია გუნდში", - საქებარ სიტყვებს არ იშურებს მწვრთნელი.

ჯეი ჯეი ბარეა მეოთხე თამაშს გამოტოვებს კოჭის ტრავმის გამო და გამთამაშებლის გამოკლების გამო ფაჩულიას როლი კიდევ უფრო იზრდება.

"ყოველთვის გავიმეორებ ამ სეზონში - ფაჩულია ჩვენ დრაფტის მეორე რაუნდის პიკად ავიყვანეთ. ეს იყო წლის საუკეთესო გარიგება.

ზაზა მაგრად თამაშობს, მებრძოლია და ძალიან გუნდური. მისთვის არ აქვს მნიშვნელობა, ბევრს ჩააგდებს თუ ცოტას, მთავარია, გუნდი გამარჯვებული დარჩეს. ის იმ კატეგორიის ვეტერანი ლიდერია, ნებისმიერი გუნდი რომ ინატრებდა", - ისევ დირკ ნოვიცკი.

ასევე იხილეთ:
როგორ შეცვალა ფაჩულიამ, რომელსაც წესიერად ახტომაც არ შეუძლია, NBA-ს ორი გუნდის ბედი