ფიბა-ევროპის ოფიციალურ ვებ-გვერდზე დასრულებულ გამოკითხვაში თორნიკე შენგელიამ ყველაზე მეტი ხმა მიიღო, თუმცა გასული წლის საუკეთესო ახალგაზრდა კალათბურთელად ლიტველი იონას ვალანჩუნასი დაასახელეს. ეს ექსპერტთა ხმებმა გადაწყვიტა, რომლებმაც ქართველ ფორვარდზე წინ სხვა ახალგაზრდები დააყენეს. მიუხედავად იმისა, რომ ოფიციალური აღიარება არ ჰპოვა, შენგელია დღეს მილოცვებს მაინც იღებდა. ხუმრობა ხომ არაა, მან ლამის 27 ათასი ხმა მიიღო და მთელი 12 831-ით აჯობა ლიტველ ვალანჩუნასს. თორნიკეს ბელგიაში შევეხმიანეთ და გულშემატკივართა აღიარება ჩვენც მივულოცეთ.
- თორნიკე, გილოცავ გამოკითხვაში გამარჯვებას. დღეს ბევრმა მოგილოცა?
- კი, ძირითადად საქართველოდან
- როგორ ფიქრობ, რატომ დაიმსახურე ამდენი ხმა?
- ჩემი მეგობრები და ახლობლები ინტერნეტით ყოველდღიურად მიჭერდნენ მხარს. ვებ-გვერდის ბმული, სადაც გამოკითხვა მიმდინარეობდა, ჩემი ფეისბუქის გვერდზე იდო, ასევე საქართველოს ფედერაციის საიტზე და სხვადასხვა სოციალურ ქსელში. იგივე ალბათობით შეიძლებოდა სხვა კანდიდატებსაც ჰქონოდათ ბმულები გავრცელებული, თუმცა საბოლოოდ ისე მოხდა, რომ ყველაზე მეტი ხმა მივიღე, რაც ძალიან მესიამოვნა.
- როგორ ფიქრობ, ხმების უმეტესობა რომელი ქვეყნიდან იყო?
- რა თქმა უნდა, საქართველოდან. ასევე ბელგიიდანაც იქნებოდნენ, რადგან ფეისბუქში არაერთი გულშემატკივარი მყავს და ისინიც აქტიურობდნენ. მინდა ყველა იმ ადამიანს დიდი მადლობა ვუთხრა, რომელმაც მხარი თუნდაც ერთხელ დამიჭირა. მოგეხსენებათ, ხმის მიცემა დღეში ერთხელ იყო ნებადართული.
- მიუხედავად იმისა, რომ დიდი უპირატესობით მოიგე ინტერნეტ-გამოკითხვა, საუკეთესოდ მაინც იონას ვალანჩუნასი დაასახელეს.
- როგორც მითხრეს, გულშემატკივრებს მხოლოდ 30 პროცენტის გადაწყვეტა შეეძლოთ. ანუ მთავარი ფიბა-ევროპის ექსპერტების შეფასებები იყო. გულშემატკივრების დახმარებით კი მოვიპოვე უპირატესობა, მაგრამ საბოლოო სიტყვა სპეციალისტებმა თქვეს, რომლებმაც ვალანჩუნასი გამოარჩიეს.
- დამსახურებულად მიიღო ვალანჩუნასმა ეს ჯილდო?
- არ იმსახურებდაო, ვერავინ იტყვის. იონასმა ძალიან მძლავრად ჩაატარა გასული წელი. ლიტვის ნაკრებს ევროპის ჩემპიონატი მოაგებინა, მსოფლიოს პირველობაზეც გამოირჩეოდა, დრაფტზე საკმაოდ მაღალ ნომრად აირჩიეს და ახლა "ლიეტუვოს რიტასში" საკმაოდ კარგად თამაშობს. ღირსეული კანდიდატები იყვნენ ნიკოლა მიროტიჩი და ენეს კანტერიც.
- შენი საქმეები როგორ მიდის? ტრავმა ვერ მოიშუშე?
- ჯერ ისევ ინდივიდუალურად ვვარჯიშობ და ვცდილობ, ფიზიკური ფორმა შევინარჩუნო. 20 თებერვალს რენტგენი უნდა გადამიღონ და სავარაუდოდ ამის შემდეგ ექიმები გუნდთან ერთად ვარჯიშის ნებას დამრთავენ. ამჟამად ტრენაჟორებზე და აუზში ვვარჯიშობ.
- შენს მიერ ზემოთ ჩამოთვლილმა კალათბურთელებმა წლეულს დრაფტი საკმაოდ წარმატებით მოილიეს. შენი ჯერი როდის დადგება?
- ძნელი სათქმელია. ისე კი სურვილი მაქვს, რომ კარიერა NBA-ში გავაგრძელო. ეს და კიდევ მომავალი წელიც მაქვს. ამ ორიდან რომელიმე წელს დრაფტზე უნდა დავდგე. ვნახოთ, რა იქნება. ტრავმის გამო დიდი ხანი გამიცდა და სეზონის დარჩენილ დროში დიდი ძალისხმევა მმართებს, რომ NBA-ს დრაფტზე დადგომა გადავწყვიტო.
gbf.ge
