"ჩიკაგო ბულზის" ცენტრმა ჟოაკიმ ნოამ კიდევ ერთხელ დაადასტურა ლიტვაში ევრობასკეტზე თამაში. ეს ფრანგ ვარსკვლავს იმის გამო დასჭირდა, რომ გასულ კვირას ექიმებმა ნოას დასვენება და ფეხის ტრავმის შემდეგ სრულად გამოჯანმრთელება ურჩიეს."ეს ტრავმა სერიოზული არ იყო და ამიტომაც მზად ვარ გუნდთან ერთად დავიწყო მზადება ევრობასკეტისთვის. აუცილებლად ვითამაშებ ამ ტურნირზე", - ამბობს ნოა NBC-თვის მიცემულ ინტერვიუში.
ასეთივე განწყობა აქვს "პორტლენდ თრეილ ბლეიზერსის" ფრანგ ლეგიონერს ნიკოლა ბატუმს, რომელიც კონკრეტული მიზნით მიემგზავრება ლიტვაში.
"პირადად მე ევრობასკეტის მოგება მინდა და ლიტვაში მხოლოდ ოქროს მედლისთვის მივემგზავრები.
ვიცი, რომ ჩვენს გუნდში ვარსკვლავი არ ვიქნები. უნდა დავეხმარო ტონი პარკერს, ჟოაკიმ ნოასა და ბორის დიაოს. ევროპის ჩემპიონატის მოსაგებად საჭიროა გუნდში ორი მაღალი კლასის ცენტრი გყავდეს. ჩვენთან ასეთები ნოა და რონი ტურიაფი არიან. ეს მოთამაშეები ნაკრებისთვის ძალიან მნიშვნელოვანი ფიგურები არიან", - განაცხადა ბატუმმა "ეკიპისთვის" მიცემულ ინტერვიუში.
* * *
ევრობასკეტის პარალელურად გაიმართება ამერიკის ჩემპიონატი, სადაც ასევე ოლიმპიადის საგზურები გათამაშდება. მნიშვნელოვანი შევსება ექნება არგენტინის ნაკრებს - კარიერის განახლება გადაწყვიტა ცენტრმა ფაბრისიო ობერტომ, რომელმაც ამ სეზონის შემდეგ აქტიურ სპორტს თავი დაანება. "სან ანტონიოსა" და "პორტლენდის" ყოფილმა მოთამაშემ ასეთი გადაწყვეტილება სწორედ ნაკრების დასახმარებლად მიიღო.
"დიდი ხანი ვმკურნალობდი და ხანგრძლივი რეაბილიტაციის შემდეგ შემიძლია განვაცხადო, რომ მზად ვარ მოედანზე დასაბრუნებლად, რათა არგენტინის ნაკრებს ამერიკის ჩემპიონატზე წარმატებით გამოსვლასა და ლონდონის ოლიმპიადის საგზურის მოპოვებაში დავეხმარო", - განაცხადა ობერტომ.
* * *
ლოკაუტის პერიოდში კიდევ ერთი ვარსკვლავი შეემატება თურქეთის ჩემპიონატს. "მილუოკი ბაქსის" თურქმა ფორვარდმა ერსან ილიასოვამ სტამბოლის "ფენერბაჰჩესთან" კონტრაქტზე ხელის მოწერა გადაწყვიტა.
აღსანიშნავია, რომ 24 წლის ილიასოვას მხოლოდ კარიერის დასაწყისში აქვს ნათამაშები სამშობლოში - 2004-05 წლების სეზონში ის "ულქერის" ღირსებას იცავდა. როგორც თურქული პრესა წერს, ილიასოვა ერთწლიანი კონტრაქტის სანაცვლოდ 3.5 მილიონ ევროს მიიღებს.
* * *
"ნიუ იორკ ნიქსის" ფორვარდი ამარე სტაუდმაიერი ჟურნალისტებს შეხვდა და მათ გამოუცხადა, რომ ბევრი უცხოური კლუბი გამოთქვამს მასთან კონტრაქტის გაფორმების სურვილს.
"ჩვენი გუნდის ოფისში უამრავი ზარი ისმის სხვადასხვა კლუბის წარმომადგენლებისგან და ისინი მუდმივად ჩემს გვარს ახსენებენ. დაინტერესებული გუნდები ისრაელის, თურქეთის, ესპანეთისა და ჩინეთის ჩემპიონატებში თამაშობენ. სხვა ქვეყნებიდანაც იყო ზარები.
შანსი იმისა, რომ საზღვარგარეთ წავალ სათამაშოდ, საკმაოდ მაღალია. მაგრამ მინდა ასი პროცენტით ვიყო მზად, სანამ რომელიმე გუნდს კონტრაქტს დავპირდები. შესაბამისად, ამ მომენტისთვის არც ერთ ვარიანტს არ განვიხილავთ, რადგან ზურგის ტრავმას ვმკურნალობ. თუმცა ამას მკურნალობას ვერ დავარქმევ - არანაირ პროცედურებს არ ვიტარებ, უბრალოდ ექიმებმა სამი კვირა სრული სიმშვიდე და დასვენება გამომიწერეს", - ამბობს სტაუდმაიერი ESPN-თან კომენტარში.
ყოველდღიური სპორტული გაზეთი "ლელო"
