ევრობასკეტის ორგანიზატორებმა სერიოზული სკანდალის შესახებ გამოაცხადეს. საბერძნეთის ნაკრების წარმომადგენელი სტავროს ელინიადისი პირველ ჯგუფურ ტურნირზე, საბერძნეთისა და ჩერნოგორიის მატჩის წინ გერმანელი მსაჯის რობერტ ლოტერმოსერის მოსყიდვას ცდილობდა. არბიტრმა სასწრაფოდ მიიღო სათანადო ზომები - შესაბამისი განცხადება დაწერა FIBA-Europe-ის მთავარი მსაჯის სახელზე.კალათბურთის საერთაშორისო ფედერაციამ ახსნა-განმარტება მოსთხოვა საბერძნეთის კალათბურთის ფედერაციას, თუმცა ბერძნულმა მხარემ უარყო მოსყიდვის ფაქტი და განაცხადა, რომ ადგილი ჰქონდა მხოლოდ არბიტრზე ზეწოლას.
საბოლოოდ, FIBA-მ ბერძნების დელეგაცია 15 ათასი ევროთი დააჯარიმა, ხოლო ელინიადისი აკრედიტირებულთა სიიდან ამოშალა. ტურნირის დირექტორატმა ეს ფაქტი მხოლოდ რამდენიმე დღის
შეგახსენებთ, რომ ბერძნებმა ჩერნოგორიას 71:55 მოუგო და ევრობასკეტის მეორე ეტაპზე გავიდა.
* * *
ევროპის 2015 წლის ჩემპიონატი, შესაძლოა, ოთხ ქვეყანაში ერთად გაიმართოს. უკვე მზად არის საფრანგეთის, გერმანიის, იტალიისა და ხორვატიის ერთობლივი განაცხადი. ორგანიზატორთა ჩანაფიქრით, ტურნირს შვიდმა ქალაქმა უნდა უმასპინძლოს. სამი ქალაქი იქნება საფრანგეთიდან (პარიზი, რომელიც პლეი ოფის თამაშებს უმასპინძლებს, სტრასბური, ლიონი და დუნკერკი), ორი გერმანიიდან (ბერლინი და აგრეთვე, კიოლნი ან დიუსელდორფი), და თითო ხორვატიიდან (ზაგრები) და იტალიიდან (მილანი).
ადრე ასეთი ვარიანტი წარმოუდგენელი იქნებოდა, მაგრამ ახლა, როცა ევროპის ჩემპიონატის ფინალისტთა რიცხვი 16-დან 24-მდე გაიზარდა, ოთხქვეყნიანმა განაცხადმა, შესაძლოა, მოწონება დაიმსახუროს.
* * *
ევრობასკეტზე მხოლოდ საქართველოს ნაკრები არ დაზარალებულა წამყვანი მოთამაშეების ტრავმების გამო. ორ კალათბურთელს მოუწევს ხანგრძლივი დროით დასვენება. ერთ-ერთია უკრაინის ნაკრების ცენტრი კირილ ფესენკო, რომელმაც ბელგიასთან მატჩში მიიღო მძიმე ტრავმა. მან მუხლის ჯვარედინა მყესები გაიწყვიტა და სამკურნალოდ ოპერაცია დასჭირდება. ფესენკოს მინიმუმ ორი თვის გამოტოვება მოუწევს.
ეს კალათბურთელი ევროპის ჩემპიონატზე საშუალოდ 5.0 ქულასა და 2.4 მოხსნას აგროვებდა.
კიდევ ერთი დაზარალებულია ხორვატი მცველი მარკო ტომასი. მანაც მუხლი დაიზიანა მაკედონიის წინააღმდეგ. ტურნირზე ტომასის წვლილი მოკრძალებული იყო -
საშუალოდ 3.5 ქულა.
* * *
უკრაინის კალათბურთის ფედერაციის პრეზიდენტმა ალექსანდრ ვოლკოვმა განაცხადა, რომ მოლაპარაკებას აწარმოებს ეროვნული ნაკრების ამერიკელ დამრიგებელთან მაიკ ფრატელოსთან კონტრაქტის გახანგრძლივების თაობაზე.
"ამჟამად მოლაპარაკებებს ვაწარმოებთ ფრატელოსთან. მისგან ნაკრების განვითარების ახალ პროგრამას ველოდებით. ლაპარაკია მუდმივ თანამშრომლობაზე - ის უკრაინაში მხოლოდ ზაფხულობით არ უნდა ჩამოდიოდეს, არამედ მუდმივად უნდა ადევნებდეს თვალს და აკონტროლებდეს ნაკრების კალათბურთელთა თამაშს მთელი საკლუბო სეზონის განმავლობაში", - განაცხადა ვოლკოვმა.
ყოველდღიური სპორტული გაზეთი "ლელო"
