35 წლის არგენტინელი ვეტერანი პაბლო პრიჯიონი ერთ სეზონს ეროვნულ საკალათბურთო ასოციაციაში გაატარებს.არგენტინის ნაკრების გამთამაშებელმა ერთწლიანი კონტრაქტი გააფორმა "ნიუ იორკ ნიქსთან".
კალათბურთელის აგენტის თქმით, მოთამაშის ხელფასი 473 ათასი დოლარი იქნება.
თანამედროვე კალათბურთის ერთ-ერთმა ყველაზე გონიერმა მოთამაშემ მთელი კარიერა ესპანეთში გაატარა.
ის შვიდი წელი თამაშობდა "კახა ლაბორალში". ახლა კი პრიჯიონიმ NBA-ში თავის გამოჩენის შანსი მიიღო.
სავარაუდოდ, არგენტინელი "ნიქსში" კიდევ უფრო გამოცდილი ჯეისონ კიდის დუბლიორი იქნება.
გასულ სეზონში პრიჯიონი ესპანეთის ჩემპიონატში საშუალოდ 6.6 ქულასა და 3.9 შედეგიან გადაცემას აგროვებდა.
* * *
კლავერის "პორტლენდში" გადასვლა გასაკვირი არ არის - სამი წლის წინ, სწორედ ამ გუნდმა აირჩია დრაფტზე ეს ესპანელი. ამ დღეებში კლავერი ოფიციალურად დაშორდა "ვალენსიას" და NBA-ში იწყებს კარიერას. "პორტლენდში" მისი სათამაშო ნომერი 18 იქნება.
"ბლეიზერსის" კიდევ ერთი სამიზნეა ბრიტანელი ფორვარდი ჯოელ ფრილენდი. კალათბურთელს ერთი ნაბიჯი აკლია სანუკვარ კონტრაქტამდე.
პრობლემას წარმოადგენს ესპანეთის "უნიკახასთან" კონტრაქტი, რომლის ღირებულებაა 1.5 მილიონი ევრო.
ამერიკული პრესის ცნობით, ჯოელი მზად არის თავად გამოისყიდოს ეს ხელშეკრულება. ახლა, მხარეები აქტიურად მუშაობენ ბოლო დეტალებზე.
* * *
რადგან კრის კამანი გერმანიის ნაკრების წევრად ითვლება, მის შესახებ ახალ ინფორმაციას აქვე შემოგთავაზებთ. გუშინ, ამ მძიმე ფორვარდმა ერთწლიანი კონტრაქტი გააფორმა "დალას მავერიქსთან" და გერმანიის ნაკრებში თავისი პარტნიორის, დირკ ნოვიცკის მხარდამხარ ითამაშებს.
შეგახსენებთ, რომ გასული სეზონი კამანმა "ნიუ ორლეანის" რიგებში გაატარა, თუმცა ტრავმის გამო მხოლოდ 47 მატჩი ითამაშა და საშუალოდ 13.1 ქულა და 7.7 მოხსნა მიითვალა.
ყოველდღიური სპორტული გაზეთი "ლელო"
