"ლოს ანჯელეს ლეიკერსმა" პლეი ოფის სერიის პირველი მატჩი წააგო. პაუ გასოლისა და დუაიტ ჰოვარდის ორმაგი ცენტრის ტაქტიკა პრობლემა არ ყოფილა "სან ანტონიოსთვის", რომელმაც კალიფორნიელებს მხოლოდ 79 ქულა დააგროვებინა. მოკლედ, დასავლეთის მეშვიდე გუნდმა ყველა კომპონენტში დათმო შეხვედრა პლეი ოფის ერთ-ერთ ფავორიტთან. თითქოს განსაკუთრებული არაფერი მომხდარა, რადგან "ლეიკერსი" თავისი ლიდერის კობი ბრაიანტის გარეშე თამაშობდა, მაგრამ განვლილი მატჩის შემდეგ, სწორედ კობის გარშემო ატყდა აჟიოტაჟი."შავი მამბა" თავის "ტვიტერზე" ფაქტობრივად ონლაინ-ტრანსლიაციას აწარმოებდა და კომენტარს უკეთებდა თანაგუნდელების მოქმედებებს. "ვურჩევ პაუს დაფარებებზე ინადიროს: არ მოცილდეს იქაურობას,
საკმაოდ საჭირო რჩევებია კობისგან. ამიტომაც გასაკვირი არ იქნებოდა, თუ დიდი შესვენების დროს, მოთამაშეები არა მწვრთნელის ნოტაციების მოსმენას დაიწყებდნენ, არამედ საკუთარ მობილურ მოწყობილობებს ჩაუჯდებოდნენ საკუთარი ლიდერის რჩევების წასაკითხად. ამაში განსაკუთრებული არაფერია. უფრო ადრეც, მცველმა მატჩის შესვენების დროს დაურეკა პაუ გასოლს: მთავარი მწვრთნელის ასისტენტმა გერი ვიტიმ ყურმილი გადასცა ესპანელს, რომელმაც მიიღო საჭირო ინფორმაცია და "ლეიკერსს" მოაგებინა... "სან ანტონიოსთან" მატჩში. ეს მოხდა რეგულარულ ჩემპიონატში.
ნაწილობივ, ამ ვარაუდის დადასტურება შეიძლება იყოს სტივ ბლეიკის ციტატა: "კობი რომ აქ იყოს, სწორედ ის მოგვცემდა რჩევებს. ზუსტად გვეტყოდა, რა უნდა გაგვეკეთებინა მოედანზე. ახლა კი ის ცდილობს დაგვეხმაროს როგორც შეუძლია. კობი ყოველთვის მეომრად რჩება და ძალიან უნდა მოედანზე ყოფნა. ჩვენ ყველას გვინდა ეს. მაგრამ, სამწუხაროდ, მას მხოლოდ რჩევებით დახმარება შეუძლია".
აქ ისმის კითხვა - მაშინ რა საჭიროა მთავარი მწვრთნელი?..
შესაძლოა, სწორედ ამიტომაც, მატჩის შემდეგ მაიკ დ’ენტონიმ აკურატული რეპლიკით ოდნავ გადაკრა კობი ბრაიანტს. "კარგია, რომ ის თავის პოზიციებს აფიქსირებს. კობი ხომ ახლა გულშემატკივარია. უბრალოდ, საქმე ისაა, რომ ასეთი გულშემატკივრის შეტყობინებებზე ჟურნალისტები უფრო მეტად ამახვილებენ ყურადღებას, ვიდრე ამას საჭიროება მოითხოვს. ეს არის და ეს".
NBA-ის "ჩვეულებრივი" ხუთგზის ჩემპიონისა და "ყველა ვარსკვლავის მატჩის" 15-გზის მონაწილის რეაქციამ არ დააყოვნა: "მე გულშემატკივარი ვარ?! სასაცილოა", - დაწერა ბრაიანტმა.
და მაინც, იმისთვის, რომ მეოთხედფინალური სერია თავისი შეტყობინებებით არ გადაფაროს, კობიმ გადაწყვიტა რეალურ რეჟიმში აღარ გაუკეთოს კომენტარი მოედანზე მიმდინარე მოვლენებს. ახლა, ისღა რჩება, რომ თვალი მივადევნოთ მის გვერდს "ფეისბუკზე": კობის არ უთქვამს, რომ იქაც არ დაწერს მატჩის დროს. საინტერესოა, გაძლებს თუ არა "შავი მამბა" ისე, რომ "სან ანტონიოსთან" სერიის ბოლომდე კრინტი არ დაძრას.
დენგი: როუზის ფორმა ყოველთვის მზადაა
"ჩიკაგოს" ფორვარდმა ლუოლ დენგმა განაცხადა, რომ გუნდი ბოლომდე უჭერს მხარს გამთამაშებელ დერეკ როუზს, რომელიც არ ჩქარობს მოედანზე დაბრუნებას ოპერაციის შემდეგ.
"როუზს ძალიან უნდა თამაში. მას ძალიან გაუჭირდა ამ გადაწყვეტილების მიღება და მთელი ეს სიტუაცია ძალიან ცუდად მოქმედებს მასზე. ვიცი, როგორ უნდა მას ჩვენს გვერდით ყოფნა.
თუ დერიკი შემოვა გასახდელში და იტყვის, რომ ხვალ მოედანზე გასვლას აპირებს, მისი მაისურა მზად იქნება. თუ ეს არ მოხდა, ჩვენ მას 100 პროცენტით დავუჭერთ მხარს", - ამბობს დენგი CBS-თან კომენტარში.
დანკანი ტვიტერს ვერ იტანს
"სან ანტონიო სპურსის" ვეტერანმა ცენტრმა ტიმ დანკანმა აღიარა, რომ არ გახლავთ სოციალური ქსელის - "ტვიტერის" თაყვანისმცემელი.
"ერთხელაც არ შევსულვარ Twitter.com-ზე. ალბათ, ერთადერთი ადამიანი ვარ მთელს ლიგაში, რომელსაც საკუთარი გვერდი არ გააჩნია. არანაირი სურვილი არ მაქვს ყველას მოვუყვე იმის შესახებ, რით ვარ თავისუფალ დროს დაკავებული", - ამბობს ლეგენდარული კალათბურთელი.
ამარე მეორე რაუნდს უმიზნებს
"ნიუ იორკ ნიქსის" ფორვარდმა ამარე სტაუდმაიერმა, რომელმაც მარტში მარჯვენა მუხლზე ოპერაცია გადაიტანა, ჟურნალისტებს განუცხადა, რომ, შესაძლოა, პლეი ოფის მეორე რაუნდში შეძლოს მოედანზე დაბრუნება, - წერს გაზეთი "ნიუ იორკ პოსტი". მოთამაშემ აღნიშნა, რომ რეაბილიტაციის პროცესი ყოველგვარი შეფერხების გარეშე მიმდინარეობს.
ოპერაციამდე ხუთ მატჩში სტაუდმაიერი საშუალოდ 16.8 ქულასა და 5.4 მოხსნას აგროვებდა. თუმცა მის არყოფნაში "ნიქსმა" 19 მატჩში 17 გამარჯვების მოპოვება მოახერხა.
ყოველდღიური სპორტული გაზეთი "ლელო"
ასევე იხილეთ:
NBA. რეგულარული ჩემპიონატი: კობი ბრაიანტმა სეზონი დაამთავრა
